Quantcast

ಅಂಜಲಿಗೀಗ ಇಪ್ಪತ್ಮೂರು..

sandeep eshanya

ಸಂದೀಪ್ ಈಶಾನ್ಯ

ಅಂಜಲಿಗೀಗ ಇಪ್ಪತ್ಮೂರು
ನೀಲಿಶಾಯಿಯಲ್ಲಿ ಬರೆದಿದ್ದ
ಹಾಜರಾತಿಯ ಅವಳ ಹೆಸರೀಗ ಮಾಸಿದೆ
ಅವಳು ಹಠಕ್ಕೆ ಬಿದ್ದು ಕೂರುತ್ತಿದ್ದ
ಕಿಟಕಿಯಂಚಿನ ಬೆಂಚಿನಲ್ಲಿ
ಅದೇ ಸ್ಕೂಲಿನ ಆಯಾಳ ಮಗಳಿದ್ದಾಳೆ

ಅಪ್ಪನ ಲೂನಾ ಮನೆಯ ಮೂಲೆಯಲ್ಲಿ
ಜೇಡರ ಬಲೆಯೊಂದಿಗೆ ಸೆಣಸುತ್ತ
ಧೂಳಿಯಿಡಿಯುತ್ತಿದೆ
cage sheಮನೆಯ ಮುಂದೆಯ ರಸ್ತೆಗೀಗ ಡಾಂಬರು ಬಂದಿದೆ
ಆದರೆ
ಅಂಜಲಿಯ ಮಂದಸ್ಮಿತ ಈಗಿಲ್ಲ

ಅವಳೀಗ
ಹುಟ್ಟುಹಬ್ಬಕ್ಕೆ ದುಂಬಾಲು ಬಿದ್ದು
ಜವಳಿ ಅಂಗಡಿಯಲ್ಲಿ ಬಟ್ಟೆ ಆರಿಸಿಕೊಳ್ಳುವುದಿಲ್ಲ
ಜತೆ ಕೂತು ತಿಂದ ಕೈ ಬೆವರಿಗೆ
ಅಂಟುವಂತ ಬಣ್ಣದ ಪೆಪ್ಪರಮೆಂಟಿನ
ರುಚಿಯ ನೆನಪಿಟ್ಟಕೊಂಡಿಲ್ಲ
ನಗುವೂ ಇಲ್ಲಾ
ಅವಳೀಗಾ ತೀರಾ ಮೌನಿ

ಅಂಜಲಿ
ನಿನ್ನ ನೆಚ್ಚಿನ ಸುಜಾತ ಮಿಸ್ಸು ಸ್ಕೂಲು ಬಿಟ್ಟರಂತೆ
ಅವರ ಗಂಡ ಮೊದಲಿನಂತೆ ಈಗಲೂ ಕುಡುಕ
ನಿನ್ನ ಕುಂಟೋಬಿಲ್ಲೆ ಆಟದ ಜತೆಗಾತಿ
ಶಶಿಕಲಾ ಈಗ ಎರಡು ಮಕ್ಕಳ ತಾಯಿ
ಮೊನ್ನೆ
ಮಕ್ಕಳಿಗೆ ಸಿರಪ್ ಖರೀದಿಸುವಾಗ ಸಿಕ್ಕಿದ್ದಳು
ಹಳೆಯದೆನ್ನಲ್ಲ ನೆನೆದು ಕಿಸಕ್ಕನೆ ನಕ್ಕಳು
ಗೊತ್ತಾ
ಸ್ಕೂಲಿನ ಕಡೆ ತಿರುವಿನಲ್ಲಿ
ಗೊಲ್ ಗಪ್ಪಾ ಬಂಡಿಯ
ರಾಜಸ್ಥಾನಿ ಹುಡುಗ ಇದ್ದನಲ್ಲ
ಅವನಂಗಡಿಯನ್ನು ಮುಚ್ಚಿಬಿಟ್ಟನಂತೆ
ಪಾಪಾ ಅವನಪ್ಪನಿಗೆ ಸಕ್ಕರೆ ಕಾಯಿಲೆ
ಮೈ ತುಂಬಾ ಹಿತ್ತಾಳೆ ಒಡವೆ ತೊಡುತ್ತಿದ್ದ
ಬಾಯಿ ಬಡಕಿ ಅವನಮ್ಮ ಇದ್ದಳಲ್ಲ
ಅವಳೀಗ ಬೇಡಿಕೊಂಡರು ಒಂದು
ಮಾತೂ ಆಡುತ್ತಿಲ್ಲ

ಅವತ್ತು
ಊರಿಗೆ ರೈಲು ಹಿಡಿಯುವ ಮುನ್ನ ಸಿಕ್ಕಿದ್ದ
ನಾಲ್ಕು ಸಾವಿರ ರೂಪಾಯಿ ಸಾಲ ಇದೆ
ಬಂದು ತೀರಿಸುತ್ತೇನೆ ಎಂದ
ನಾನು ಕೆಲಸ ಬಿಟ್ಟುಬಿಟ್ಟೆ ಎಂದೆ
ಒಳ್ಳೆಯದಾಯಿತು ಎಂದು ನಕ್ಕ
ಕಾಲ ನಿಲ್ಲುವುದಿಲ್ಲ ಎನಿಸುತ್ತಿದೆ
ಇವಗಳೂ ಬಹುತೇಕ ಹಳೆಯ ವಿಷಯಗಳೇ ಅಂಜಲಿ
ಎಲ್ಲವೂ ಬದಲಾಗುತ್ತಿದೆ ಇಲ್ಲಿ
ಸಾಧ್ಯವಾದರೆ ಬಿಡುವು ಮಾಡಿಕೊಂಡು ಸಿಗು
ಇಬ್ಬರೂ ಮತ್ತೆ ಜತೆ ಕೂತು ಒಂದಿಷ್ಟು ಮಾತನಾಡುವ
ಮರಳಿ ಅದೇ ಸ್ಕೂಲಿನ ಮಕ್ಕಳಾಗಿ ಬಿಡುವ

Add Comment

Leave a Reply

%d bloggers like this: