Quantcast

ಪ್ರಾಚೀ ನಿತಂಬಿನಿಯ ಜಡೆ..

l c sumitra

ಡಾ ಎಲ್ ಸಿ ಸುಮಿತ್ರಾ,ತೀರ್ಥಹಳ್ಳಿ

ಆಹಾ ನಿನ್ನ ಕೂದಲಿನ ಸೊಂಪು ಶಾಂಪೂವಿಂದ

ಬಂದಿದ್ದಲ್ಲ, ಮತ್ತಿಸೊಪ್ಪು, ನೆಲ್ಲಿಕಾಯಿ ಸೀಗೆ ಬೆರೆಸಿ

ಹಚ್ಚಿ ತೊಳೆದು ಒರೆಸಿ ಒಣಗಿಸಿ ಹಗೂರಾಗಿ ಬಾಚಿ

ಹೆಣೆದವರು ಯಾರೆ?

click kavite shilabalike

ತುದಿಯಲ್ಲಿ ಕನಕ ಮುದ್ರಿಕೆಯ ರೇಷಿಮೆ ಕುಚ್ಚು

ತಲೆಯಲ್ಲಿ ಸುವರ್ಣಪುಷ್ಪ, ಜಡೆಯಲ್ಲಿ ಬಿಲ್ಲೆಗಳ

ಭಾರ ಬೇಕಿರಲಿಲ್ಲ ನಿನ್ನ ಸಹಜ ಚೆಲುವಿಕೆಗೆ

ಮಾಡುವುದೇನು ಕಾಲ ಮಹಿಮೆ ,

 

ಅಯ್ಯೊ ಮೈಯೆ ಭಾರ ಮನವೆ ಭಾರ ನಿನ್ನ ಹರೆಯಕೆ

ವಂಕಿ, ಒಡ್ಯಾಣ ಮಾರುದ್ದ ಕೂದಲು ಹೊರುವೆ ಹೇಗೆ

ಪಾಪ ಬಿಗಿ ಜಡೆಯ ಗಂಟು, ಒಡವೆಯ ಭಾರ ,

ನೋಯುವ ಕಂಚುಕ, ಒತ್ತುವ ಸೀರೆ ತಾಳಲಾರದೆ

ನೀ ಕಲ್ಲಾದೆಯ?

 

ಅವರಳತೆಗೆ ತಕ್ಕಂತೆ ಕೊರೆದು, ಕೆತ್ತಿ, ನಿನ್ನ

ರೂಪಿಸಿದ್ದಾರೆಂದು ನಿನಗೆ ಕೋಪವೆ?

ನಿನ್ನ ದೇಹದ ಮೇಲೆ ನಿನಗೆ ಅಧಿಕಾರವಿಲ್ಲ.

ನೋಡುಗರ ಕಣ್ಣಿಗೆ ನೀ ಚೆಂದ ಕಾಣಬೇಕಷ್ಟೆ

 

ಮೊಗ ತಿರುವಿರುವಿಯೇಕೆ…ತುಟಿ, ಕಟಿ, ನಿತಂಬವೇ

ಹೆಣ್ಣೆಂದು ಕಟೆದಿರುವರು. ಭಾರ ಹೊರುವ ಕಷ್ಟ ಅವರೇನು ಬಲ್ಲರು.

ಅವರು ಹೇಗಾದರೂ ನೋಡಲಿ. ನನಗೆ ನೀನು ನೂರಾರು ವರ್ಷದ

ಇತಿಹಾಸ, ಆಭರಣ ಅಲಂಕಾರಗಳ ರೂಪದರ್ಶಿ,

 

ಜನ ಮೆಚ್ಚಲಿ ಟೀಕಿಸಲಿ  ನೀನಂತೂ “ಕಲ್ಲಾಗಿ’ ಮಾದರಿಯಾಗಿರುವಿ

ಇನ್ನೂ ನೂರ್ಕಾಲ ಬಾಳುವಿ, ಕಲ್ಲಾದರೆ ಮಾತ್ರ ಬಾಳುವೆ .?!

vijay abbigeri

ವಿಜಯ್ ಅಬ್ಬಿಗೇರಿ

ಬಾರದವನ ಬರುವಿಕೆಗಾಗಿ
ಕಾದು ಕಲ್ಲಾಗುವ ಮೊದಲು
ನೋಡೊಮ್ಮೆ ಹಿಂತಿರುಗಿ
ಕಾದಿರುವೆ ನಿನ್ನದೊಂದು ಅಪ್ಪಣೆಗಾಗಿ
long hair beautyನಿನ್ನ ಬೆನ್ನ ಹಿಂದೆ ಆಡಿಕೊಳ್ಳುವವರ
ನಾಲಿಗೆ ಸೀಳಲು

ಮೌನ ಮುರಿದು
ಮಾತಾಡಬೇಕಿದೆ ನೂರು ಮಾತು

ಆದರೆ ನಿನ್ನ ಮಾತಲ್ಲೂ
ಬರಿ ಅವನದ್ದೇ ನೆನಪು
ಅವನ ನೆನಪುಗಳಲ್ಲಿ ಬಂದಿಯಾಗಿರುವ
ನೀನವನ ಪ್ರೇಮಕೈದಿ
ನಾನಿನ್ನ ಕಾವಲುಗಾರ
ನಮ್ಮಿಬ್ಬರ ನಡುವೆ ಇನ್ನೆಂತಹ ಸಂಭಾಷಣೆ

ಹೇಳಬೇಕಿದೆ ಜಗಕೆ ಸಾರಿ ಸಾರಿ
ಯೋಗ್ಯನಲ್ಲ ಅವನು ನಿನ್ನ ಕಾಯುವಿಕೆಗೆ
ಆದರೆ ನೋಯಿಸಲಾರೆ ಅವನಂತೆ ನಾನು
ಕಾಯುವೆ ನಿನ್ನೊಲುಮೆಗೆ ನಿನ್ನಂತೆ ಕಲ್ಲಾಗಿ

ಅವನ ನೆನಪು ಬತ್ತಿ
ಚಿಗುರೋಡೆಯುವುದು ನನ್ನ ಪ್ರೀತಿ
ಕಾಯುವೆ ಅಲ್ಲಿಯವರೆಗೂ
ನಿನ್ನ ಬೆನ್ನ ಹಿಂದಿನ ನೆರಳಾಗಿ
ನಿನ್ನದೊಂದು ಒಪ್ಪಿಗೆಗಾಗಿ

6 Comments

  1. Ashok Kumar
    September 6, 2016
    • Anonymous
      September 9, 2016
  2. Anonymous
    August 26, 2016
  3. C. N. Ramachandran
    August 26, 2016
    • ಸುಮಿತ್ರಾ ಎಲ್ ಸಿ
      August 26, 2016
  4. Gurunath P D
    August 25, 2016

Add Comment

Leave a Reply

%d bloggers like this: