Quantcast

ಸೆಲ್ಫಿ

lakshman-370x315ಲಕ್ಷ್ಮಣ್

ಕವಿತೆಯೊಂದರ ಹಿಂಬದಿಯ ಪುಟ
ಖಾಲಿಯಿದೆ
ಯಾರದರೂ ಬರೆಯಬಹುದು
ಏನಾದರೂ ಬರೆಯಬಹುದು
ಶಿಲೆಯ ಬೆನ್ನು ಪುಟದ ಮೇಲೆ

ಯಾವ ಶಾಸನವೂ ಮೂಡುವುದಿಲ್ಲ
ಶಿಲೆಯ ಮೇಲೆ
ಎದೆಯೊಳಗೆ ಬರೆಯದ ಹೊರತು

ಡಾಬು, ದಾಗಿನ,
ತೋಳುಬಂಧಿ, ತೊಡೆಯ ಸಂಧಿ
ಎಲ್ಲ ಬರೆದವರಿದ್ದಾರೆ ದೇಹವೇ ದೇಗುಲವೆಂದು
ನನ್ನ ಬಹಿರಂಗದ ಕುರಿತು
ಅಂತರಂಗ ಬಗೆಯುವ ಉಳಿಯೊಂದ
ತುರ್ತಾಗಿ ತರಬೇಕಿದೆ

click kavite shilabalikeತಲೆಬಾಗಿ ನಡೆದವರಿಗೆ
ಮಾತ್ರ
ಒಳಬಾಗಿಲ ಪ್ರವೇಶವಿದೆ

ಏಳು ಹೆಡೆಯ
ಜಡೆ ನಾಗರವೊಂದು ಅನವರತ
ಕಾಯುತಿದೆ
ಒಳಮನೆಯ ನಿಗೂಢ ನಿಧಿಯ

ಜೈಲು ಸರಳುಗಳಿಂತಿರುವ
ನನ್ನೆದುರಿಗಿನ
ಸಾಲು ಕಂಬಗಳಲಿ
ಸಾವಿರದ ಕತೆಯಿದೆ ಪುರುಸೊತ್ತಿದ್ದರೆ
ಕೇಳಿಸಿಕೊ
ನನ್ನ ಹಸಿವು ನಿದ್ದೆ ನೀರಡಿಕೆ
ಒಂಟಿತನ
ನೀರವ ರಾತ್ರಿಯ ನಿಡುಸುಯ್ಯುವಿಕೆ
ಕತ್ತಲ ರಾತ್ರಿಯ ಬಿಕ್ಕಳಿಕೆ
ತುಟಿಯಂಚಿನಲಿಯ ವಿಷಾದ
ಉಳಿಯಾಡುವಾಗಿನ
ಒಡಲ ನೋವು
ಬೆನ್ನ ಮೇಲಿನ ಬೆವರು ಸಾಲಿನ
ಮುತ್ತ ಹನಿಯ ಹತಾಶೆ
ನಿನಗೊಂಚೂರು ಅರ್ಥವಾದರೆ
ಬರೆ
ಇಲ್ಲವೇ  ಸುಮ್ಮನೆ
ಸೆಲ್ಪೀ ತೆಗೆದು ಸಂಭ್ರಮಿಸು

ಅಕ್ಕ
ಬಿಗ್ ಬ್ಯಾಂಗ್ ಥಿಯರಿಯ
ಉಲ್ಕಾಪಾತದಿಂದ ಸಿಡಿದ ಯಃಕಶ್ಚಿತ್
ಶಿಲೆಯೊಂದು ಇಲ್ಲಿ
ಹೀಗೆ
ಚಿತ್ತವೇ ಕೆತ್ತಿದಂತ ಚಿತ್ರವಾಗಿರಲು
ಇದು
ಚೆನ್ನಮಲ್ಲಿಕಾರ್ಜುನನ ಪವಾಡವಲ್ಲದೆ
ಇನ್ನೇನು?

ಆದಿಮದ ಹೊತ್ತಿಗೆಯಲ್ಲಿ
ಗೀತೆ, ಕುರಾನ, ಬೈಬಲ್ಲಿನಲ್ಲಿ
ಈ ಇಂತಹ ಅನೇಕ ಕವಿತೆಗಳ
ಮುಟ್ಟಲಾರದ ಶಿಲೆಗಳ
ಹಿಂಬದಿಯ ಪುಟ ಇನ್ನೂ ಖಾಲಿಯಿದೆ
ಕೆಲವರು ಕಲ್ಲಿನಲಿ
ಬರೆದರು ಕೆಲವರು ಬಂಗಾರದಲಿ
ತಾಳೆ, ಹಿತ್ತಾಳೆ, ತಾಮ್ರಗಳಲಿ ಬರೆದ
ನಾಗರಿಕತೆಗಳು

ಹೇಳ ಹೆಸರಿಲ್ಲದೆ
ಬೆಳಕು ಹರಿಯುವುದರೊಳಗೆ
ಮಣ್ಣುಪಾಲಾಗಿವೆ
ಎದೆಯ ಮೇಲೆ ಶಾಶ್ವತವಾಗಿ
ಉಳಿಯುವ ಶಾಸನ ಬರೆಯಬಹುದಾದರೆ
ನೀನು
ಸದ್ಯಕ್ಕೆ ನನ್ನ ಬೆನ್ನ ಪುಟ
ಖಾಲಿಯಿದೆ  ಏನು ಬೇಕಾದರೂ
ಬರೆದುಕೊ

4 Comments

  1. kusuma patel
    August 25, 2016
  2. ಲಕ್ಷ್ಮಣ್ ವಿ ಎ
    August 25, 2016
  3. ಮಮತಾ ಅರಸೀಕೆರೆ
    August 25, 2016
  4. abhishek.v.s
    August 25, 2016

Add Comment

Leave a Reply

%d bloggers like this: