Quantcast

ಇಂದಿನ ಈ ಸುದ್ದಿ ಕೇಳಿ..

lakshmikanth itnal

ಧಾರವಾಡದಿಂದ ಲಕ್ಷ್ಮೀಕಾಂತ ಇಟ್ನಾಳ ರ ವಂದನೆಗಳು. ಓಡಿಶಾದ ಆ ಬಡವ ತನ್ನ ಹೆಂಡತಿಯ ಶವವನ್ನು ಹೆಗಲ ಮೇಲೆ ಹೊತ್ತು ಸಾಗಿಸಿದ ದೃಶ್ಯ, ಮನಕಲಕಿತು, ಆವಧಿ ಈ ಕುರಿತು ಸ್ಪಂದಿಸಿದ್ದು, ಅದರ ಜೀವಂತಿಕೆಗೆ, ಸಾಮಾಜಿಕ ಕಳಕಳಿಗೆ ತಲೆಬಾಗುವೆ. ಪ್ರಸ್ತುತ ಈ ಸಂದರ್ಭಕ್ಕೆ ಕವನ.

ಆಂಸೂ
(ಕಂಬನಿ)

ಜಾವೇದ್ ಅಖ್ತರ್
ಅನು: ಲಕ್ಷ್ಮೀಕಾಂತ ಇಟ್ನಾಳ

ಇಂದಿನ ಈ ಸುದ್ದಿ ಕೇಳಿ, ನನ್ನ ಕಣ್ಣಲ್ಲೊಂದು
ಕಂಬನಿಯ ಹನಿಯೊಂದು ಬಂದು ಕುಳಿತಿದೆಯಲ್ಲಾ,
ಅಸಲು, ಇದೇನಿರಬಹುದು
ಈ ಕಂಬನಿ?

ಏನಿರಬಹುದು….ಈ ಕಂಬನಿ,
ಇದೊಂದು ಸಾಕ್ಷಿಯೇ
ನನ್ನ ಸಹಾನುಭೂತಿಗೆ, ಮಾನವೀಯತೆಗೆ!
ಅಥವಾ ಇನ್ನೂ ಬದುಕಿದಂತಿರುವ ನನ್ನಲ್ಲಿ,
ನನ್ನ ಎದೆಯಲ್ಲೊಂದು ಕರುಣೆಯ
ಹೃದಯವಿದೆಯೆಂದು ಹೇಳುತ್ತಿದೆಯೇ??
ಇಲ್ಲವೆ,
painಆರ್ತತೆಯ ಕರುಣಾಭರಿತ ಕಥೆಯೊಂದನ್ನು ಕೇಳಿ,
ನನ್ನೊಳಗಿನ ಕಳವಳದಲ್ಲಿ ಕುದಿಯುತ್ತಿರುವ,
ಕರಗುತ್ತಿರುವ,
ಕರುಳು ಹಿಂಡಿದ ಈ ಸ್ಥಿತಿಗೆ, ಮಮ್ಮಲ ಮರುಗುವ
ಕೋಮಲ ಮನಸೊಂದಕ್ಕೆ
ಆಧಾರವೇ!?

ಆದರೆ, ನನ್ನನ್ನೇ ಮತ್ತೊಮ್ಮೆ ಸ್ವಯಂ ಕೇಳಿಕೊಳ್ಳುವೆನು ನಾನು
ಇದೇನು ಈ ಕಥೆಯನ್ನು ಈಗ ಕೇಳಿದೆನಲ್ಲಾ,
ಈ ಕಂಬನಿಯೂ ಕೂಡ ಈಗ ಜನಿಸಿದ್ದೆ
ಇದು ಈ ಮೊದಲು ಇದ್ದಿರಲೇ ಇಲ್ಲವೆಂದು
ತಿಳಿಯಲೇ ಹೇಗೆ!

ನನಗಂತೂ ಖಂಡಿತ ಸಂಶಯವಿದೆ,
ಇದು ಈ ಮೊದಲು ಅದೆಲ್ಲೋ ಇತ್ತೆಂದು!
ಇದು ನನ್ನ ಹೃದಯ ಹಾಗು ಈ ಕಣ್ಣುಗಳ ನಡುವೆ
ಒಂದೇನು ಅಂತರವಿದಯೆಲ್ಲ, ಹಾಂ, ಅಲ್ಲಿ
ಅಲ್ಲೊಂದು ಕಲ್ಪನೆಯ ಶಹರವೊಂದು ಜೀವಂತವಿದೆ
ಮತ್ತೆ ಕನಸುಗಳ ಗೋರಿಗಳಿವೆ!
ಅಲ್ಲಿ ಪ್ರೀತಿ, ಒಲವಿನ ಪಾಳು ಉದ್ಯಾನದಲ್ಲಿ
ವಿಷಮುಳ್ಳಿನ ಜಾಲಿ ಮರಗಳಿವೆ
ಅದು ಬಿಟ್ಟು ಇನ್ನೇನೂ ಇಲ್ಲ ಅಲ್ಲಿ!

ಅಲ್ಲಿಂದಲೂ ತುಸು ಅಚೆ
ವಿಘ್ನ, ವಿಪರೀತಗಳ ದಟ್ಟ ಕಾಡು ಇದೆ
ಈ ಕಂಬನಿಯು
ಬಹುಶ: ಬಹು ದಿನಗಳಿಂದ
ಅಲ್ಲೇ ಅಡಗಿತ್ತು
ಯಾವುದು ಇದಕ್ಕೆ ಜನ್ಮ ನೀಡಿತ್ತೋ ಅದು,
ಆ ವ್ಯಸನಿತ ದು:ಖವು, ಮಸಲತ್ತಿನ ಕೈಯಲ್ಲಿ
ಅದೆಂದೋ ಕಗ್ಗೊಲೆಯಾಗಿ ಹೋಗಿತ್ತು
ಇನ್ನೇನು ಮಾಡೀತು ಈ ಬಡಪಾಯಿ ಕಂಬನಿಯು
ಯಾವ ಗರ್ವವನ್ನು ತಬ್ಬೀತು, ನಿರಾಶ್ರಿತ ಕಂಬನಿ?
ಅನಾಥ ಕಂಬನಿ, ಮುಗ್ಧ ಕಂಬನಿ,
ಭರವಸೆಯಿಲ್ಲದ,
ಬದುಕುವ ದಾರಿಗಳ ಗುರುತು ಪರಿಚಯವೇ ಇಲ್ಲದ
ದಿಕ್ಕು ದಿಶೆಗಳ ಅರಿವಿಲ್ಲದ
ನಡೆದು ನಡೆದೂ ಸುಸ್ತಾಗಿ ಹೋಗಿತ್ತು
ನಿರುಪಾಯವಾಗಿತ್ತು, ಅಸಹಾಯಕವಾಗಿತ್ತು,

ಅಲ್ಲಿಂದಲೇ ಇಂದೊಂದು ಯಾವುದೋ ದು:ಖದ
ಕಥಾನಕವೊಂದರ ಯಾತ್ರಾರ್ಥಿಗಳ ಗುಂಪೊಂದು ಹೊರಟಿತ್ತಲ್ಲಾ,
ಅನಾಥ ಕಂಬನಿಗೆ ಇದು ತಿಳಿಯುತ್ತಲೇ
ಈ ಕಥಾನಕದ ಪೋಷಣೆ ಸಿಕ್ಕರೆ
ಸಿಕ್ಕೀತು ದಾರಿಯೊಂದು
ಎಂದು ಕಥೆಯೊಂದರ ಕೈಬೆರಳೊಂದು ಹಿಡಿದು
ತನ್ನ ದು:ಖವನ್ನೆಲ್ಲಾ ತೋಡಿಕೊಳ್ಳುತ್ತ
ಇದರೊಂದಿಗೆ ಖರೆಯೊಂದೋ, ಸುಳ್ಳೊಂದೋ ಪ್ರಶ್ನೆ ಕೇಳುತ್ತ
ಇದು ಈಗ ನನ್ನ ಕಣ್ಣುಗಳವರೆಗೆ ಬಂದು ತಲುಪಿದೆ!

6 Comments

  1. Dinesh
    August 29, 2016
    • ಲಕ್ಷ್ಮೀಕಾಂತ ಇಟ್ನಾಳ
      August 29, 2016
  2. ರಮೇಶ ಕಾಮತ್
    August 28, 2016
    • Anonymous
      August 28, 2016
  3. ಅಂಕ್ನಳ್ಳಿ ಜಯರಾಂ.
    August 28, 2016
    • Anonymous
      August 28, 2016

Add Comment

Leave a Reply

%d bloggers like this: