Quantcast

ಮೌನ ಮುರಿಯೋಣ ಬನ್ನಿ: ನನಗಾಗ ಹತ್ತು ವರ್ಷವಿದ್ದಿರಬೇಕು..

ಇದು ಖೋ ಸರಣಿ. ಇದನ್ನು ಓದಿದ ನಂತರ ದಯವಿಟ್ಟು ಶೇರ್ ಮಾಡಿ ನಿಮ್ಮ ಸ್ನೇಹಿತರಿಗೆ ಕಳಿಸಿ, ಅವರ ಅನುಭವಗಳನ್ನೂ ಸೇರಿಸಲು ಉತ್ತೇಜಿಸಿ.

whatsapp-image-2016-09-07-at-15-04-34ನನಗಾಗ ಹತ್ತು ವರ್ಷವಿದ್ದಿರಬೇಕು.

ಸ್ಕೂಲಿಗೆ ಹೋಗುತ್ತಿದ್ದ ಕೆಂಪು ಬಸ್ಸಿನಲ್ಲಿ ಕಂಡಕ್ಟರ್ ಒಬ್ಬ ಹೇಮಯ್ಯ ಅಂತ. ಅವನ ನಡವಳಿಕೆ ಸರಿ ಇರುತ್ತಿರಲಿಲ್ಲ. ಸ್ಕೂಲಿಗೆ ಹೋಗುತ್ತಿದ್ದ ನಮ್ಮನ್ನ ಮುದ್ದು ಮಾಡುವ ನೆಪದಲ್ಲಿ ಹೇಗೇಗೋ ಮುಟ್ಟೋದು, ಹುಡುಗೀರ ಚಡ್ಡಿ ಹೆಂಗಿರುತ್ತೆ ತೋರ್ಸಿ ಅಂತ ತನ್ನ ತೆವಲುಗಳನ್ನ ಆಟ ಆಡಿಸೋ ನೆಪದಲ್ಲಿ ತೀರಿಸಿಕೊಳ್ಳೋದು ಮಾಡುತ್ತಿದ್ದ.

ಬಹಳ ಹುಡುಗಿಯರು ಹೆದರುತ್ತಿದ್ದರು. ಬಸ್ಸಿಲ್ಲದೆ ಸ್ಕೂಲ್ ಇಲ್ಲ. ಬಸ್ ಹತ್ತಿದರೆ ’ರಷ್ಶು’ ’ಹಿಂದಕ್ಕೆ ಹೋಗ್ರೀ’ ಎನ್ನುವ ನೆವದಲ್ಲಿ ಇವನು ಎಲ್ಲರ ಮೈಗೆ ಮೈ ಉಜ್ಜಿಕೊಂಡು ಹೋಗೋ ಕಾಟ. ಮನೇಲಿ ಹೇಳಿದರೆ ’ಚೈಲ್ಡ್ ಸೆಕ್ಷುಯಲ್ ಅಬ್ಯೂಸ್’ ಎನ್ನುವ ಪದಜೋಡಣೆಯೇ ಗೊತ್ತಿಲ್ಲದ ಕಾಲವದು. ಸುಮ್ಮನೆ ಸ್ಕೂಲಿಗೆ ಚಕ್ಕರ್ ಹಾಕೋಕೆ ಇಲ್ಲದ ನೆಪ ಹೇಳ್ತಿದಾಳೆ ಅಂತ ಎಲ್ಲರ ಮನೇಲೂ ಬಯ್ಗುಳ.

ಯಾಕಂದ್ರೆ ಹೇಮಯ್ಯ ಎಲ್ಲಾ ಅಮ್ಮಂದಿರ ಪ್ರಕಾರ ಒಳ್ಳೆಯ ಕಂಡಕ್ಟರ್. ಮಕ್ಕಳಿಗೆ ಏನು ಮಾಡ್ತಿದ್ದ ಎನ್ನುವುದು ಮುಖ್ಯವಲ್ಲ. ಅವನು ಎಂದೂ ಚಿಲ್ಲರೆ ಕದಿಯುತ್ತಿರಲಿಲ್ಲ. ಮಕ್ಕಳೇ ಟಿಕೆಟ್ ತೆಗೆಸಿಕೊಂಡರೂ ಸರಿಯಾಗಿ ದುಡ್ಡು ವಾಪಾಸ್ ಕೊಡ್ತಿದ್ದ ಅನ್ನುವ ಕಾರಣಕ್ಕೆ ಅವನು ಮಹಾನ್ ದೈವಾಂಶಸಂಭೂತ. ಚಿಕ್ಕ ಸಂಬಳದಲ್ಲಿ ಸಂಸಾರ, ಬಳಗ, ಮಕ್ಕಳು, ಮರಿಗಳನ್ನು ಸಾಕುತ್ತಿದ್ದ ನಮ್ಮ ಹಿಂದಿನ ಪೀಳಿಗೆಗೆ ಮಾನಸಿಕ ಕಿರಿಕಿರಿ ಒಂದು ವಿಷಯವೇ ಅಲ್ಲ. ಅದು ಅವರ ಕಾಲದ ದೊಡ್ಡ ಸತ್ಯ.

ಹೇಮಯ್ಯನ ಬಗ್ಗೆ ಇಂಥದ್ದೇ ಕಂಪ್ಲೇಂಟ್ ಅಂತ ಹೇಳಲಿಕ್ಕೂ ಮಾತುಗಳಿರುತ್ತಿರಲಿಲ್ಲ. ಅಸಹನೆ ಬೆಳೆಯುತ್ತಾ ಬಂದಂತೆ ಒಂದು ದಿನ ನನ್ನ ಅಮ್ಮನಿಗೆ ನಾನು ಹೇಮಯ್ಯನ ಬಗ್ಗೆ ಹೇಳಿದೆ.

“ಇನ್ನೊಂದ್ ಸಾರಿ ಅವ್ನ್ ಹಂಗೆ ಮಾಡಿದಾ ಅಂದ್ರೆ ಜೋರು ಮಾಡು. ಗಲಾಟೆ ಮಾಡು. ಉಳಿದೋರು ಸಪೋರ್ಟ್ ಮಾಡ್ಲಿ, ಬಿಡ್ಲಿ…ನೀನು ಸುಮ್ನೆ ಇರ್ಬೇಡ. ಕಳ್ರು ಸುಮ್ಮನಿದ್ರೆ ಇನ್ನೂ ಜಾಸ್ತಿ ಮಾಡ್ತಾರೆ. ಪಬ್ಲಿಕ್ಕಾಗಿ ಗಲಾಟೆ ಮಾಡು, ಆಮೇಲೆನಾಗುತ್ತೆ ನೋಡನ”

ಹಳ್ಳಿಯಲ್ಲಿ ಹುಟ್ಟಿ ದಾವಣಗೆರೆಗೆ ಬಂದು ಪಿ ಯು ಸಿ ಕೂಡ ಮುಗಿಸದ ನನ್ನ ಅಮ್ಮ ಶಶಿಕಲಾ ನನಗೆ ಧೈರ್ಯದ ಪಾಠ ಹೀಗೆ ಹೇಳಿಕೊಟ್ಟಳು. ನಾನು ಗಲಾಟೆ ಮಾಡಿದೆ. ನನ್ನ ಬೆಂಬಲಕ್ಕೆ ಬೇರೆಯವರೂ ಕೂಡ ಬಂದರು. ಹೇಮಯ್ಯ ಮತ್ತು ಅವನ ಥರದ ವಿಕೃತಿಯನ್ನು ಎದುರಿಸಲು ನನ್ನ ಅಮ್ಮ ಹೇಳಿಕೊಟ್ಟ ’ವಿರೋಧ’ದ ಅಸ್ತ್ರ ಈವತ್ತಿಗೂ ನನ್ನ ಬತ್ತಳಿಕೆಯಲ್ಲಿದೆ.

ಅದನ್ನೇ ’ಅಮ್ಮ ಕೊಟ್ಟ ಬಂಗಾರ’ ಅಂತ ನನ್ನ ಮಕ್ಕಳಿಗೂ ಧಾರಾಳವಾಗಿ ಕೊಟ್ಟಿದ್ದೀನಿ. ಎಲ್ರೂ ಗಲಾಟೆ ಮಾಡ್ಕೊಂಡು ಆರಾಮಾಗಿದ್ದಾರೆ.

One Response

  1. Sangeeta Kalmane
    September 8, 2016

Add Comment

Leave a Reply

%d bloggers like this: