Quantcast

ಹೇ ನಿತಂಬಿನಿ..

CNR

ಸಿ. ಎನ್.ರಾಮಚಂದ್ರನ್

ಹೇ ನಿತಂಬಿನಿ
ಕಲ್ಲಾಗಿಯೇ ಇರು ನೀ ಹೇ ನಿತಂಬಿನಿ,
ಜೀವ ತಳೆದರೆ ನೀ ನಡೆದಾಡುವುದಾದರೂ ಹೇಗೆ?

click-kavite-shilabalikeಕುಂಭಸ್ತನಿಯಾಗಿ, ನಿತಂಬಿನಿಯಾಗಿ,
ಬಡ ಒಡಲಿನ, ಪುಸಿ ನಡುವಿನ,
ಓ ಸಾಲಂಕೃತ ಕಾಳಾಹಿವೇಣಿ,
ಜೀವ ತಳೆದರೆ ನೀ ಬಸಿರುಬೇನೆಯನು ತಾಳುವುದಾದರೂ ಹೇಗೆ?
ಬಿಸಿಲು ಮಳೆ ಗಾಳಿಯಲಿ, ಹಗಲು ರಾತ್ರಿಯಲಿ
ನಿನ್ನ ರೂಪಿಸಿದ ಶಿಲ್ಪಿ ಕೆತ್ತಿದನೆ ತನ್ನಿಚ್ಛೆಯಂತೆ?
ಉಸಿರಾಡುವ ನಡೆದಾಡುವ ಸತಿಯಿದ್ದರೂ ಬಳಿ
ಅವನ ಕಣ್ಮನಗಳು ನಿನ್ನ ಕೊರೆದುದಾದರೂ ಹೇಗೆ?
ಹುಟ್ಟುವಾಗಲೆ ‘ಚಾಪವರ್ಮೋತ್ತರ ಸಹಿತ’ ಧೃಷ್ಟದ್ಯುಮ್ನ,
ಹುಟ್ಟುವಾಗಲೇ ‘ಕಾಮನ ಕೈದು’ ಈ ಕೃಷ್ಣೆ.
ಈ ಪ್ರತಿಮೆಗಳ ಪರಿವೇಶದಲಿ ನೀ
ಬದುಕುವುದು ಹೇಗೆ? ಬಾಯ್ಬಿಡುವುದಾದರೂ ಹೇಗೆ?

ಕುಣಿಯಬೇಕಿಲ್ಲ ನೀ ಕೈಸನ್ನೆಯನ್ನನುಸರಿಸಿ;
ನಟಿಸಬೇಕಿಲ್ಲ ನೀ ಸಮರಾತ್ರಿಯಲಿ ಸಮಭೋಗವನು;
ಉರಿಯಬೇಕಿಲ್ಲ ನೀ ಕೊಳೆತ ದೇಹವನು ಅಪ್ಪಿ,
ಕಲ್ಲಾಗಿಯೇ ನೀ ಇರುವ ತನಕ, ಮುಖಮುಚ್ಚಿ.
ಬೆದರಬೇಕಿಲ್ಲ, ಬೆವರಿದರೂ ಬೆವರದಂತಿರಲು,
ನಡುಗಬೇಕಿಲ್ಲ ನೀ ನಡುಮುರಿದರೂ ನಗಲು ನೇರ.
ಮತ್ಸ್ಯಗಂಧಿ ನೀ ಆಗಬೇಕಿಲ್ಲ ಯೋಜನಗಂದಿ,
ಅಳಬೇಕಿಲ್ಲ ಅಳಿಸುವುದಿಲ್ಲ ನೋವಿಲ್ಲ ಸಾವಿಲ್ಲ ನಿನಗೆ.

ಕಾಮದಗ್ಧ ಭಂಗಿಯಲಿ, ಅಂಗಾಂಗ ಸಮೃದ್ಧಿಯಲಿ,
ಕಲ್ಲಾಗಿಯೇ ಇರು ನೀ ಕಲಭಮದಯಾನೆ,
ಪ್ರಾಚೀನ ಸಂಸ್ಕೃತಿಯ ಹೆಣ ಭಾರ ಹೊತ್ತು.

7 Comments

  1. ಸುಮಿತ್ರಾ ಎಲ್ ಸಿ
    September 12, 2016
    • ಸುಮಿತ್ರಾ ಎಲ್ ಸಿ
      September 12, 2016
  2. C. N. Ramachandran
    September 9, 2016
  3. Narayan Hegde
    September 8, 2016
  4. Anonymous
    September 8, 2016
  5. ಎಚ್.ಎಸ್.ವೆಂಕಟೇಶಮೂರ್ತಿ
    September 8, 2016
  6. Sangeeta Kalmane
    September 8, 2016

Add Comment

Leave a Reply

%d bloggers like this: