Quantcast

ಕಾಲ ಬಿಂಬದ ಮರೀಚಿಕೆಯ ಬೆನ್ನತ್ತಿ

na divakarನಾ ದಿವಾಕರ

ಇಟ್ಟ ಹೆಜ್ಜೆಗಳ ಮರೆತು

ದಿಟ್ಟತನದಲಿ ಮೆರೆದು  ಹೆಜ್ಜೆ

ಗುರುತುಗಳನಳಿಸಿ ಗತಿಸಿದ

ಗೆಜ್ಜೆ ನಾದಗಳ ತೊರೆದು ತನ್ನ

ನೆರಳ ಕಾಣದೆ ಮುನ್ನಡೆವ ಜೀವಕೆ

ಇದೋ ದೂರದಲ್ಲೊಂದು ಪ್ರಣತಿ !

 

ಕಾಲದ ಬಿಂಬ  ಅಸ್ಪಷ್ಟclick_aytu_kavite

ಬಿಂಬಿತ ಕಾಲವೂ ಅಷ್ಟೇ

ಎತ್ತಲೋ ಹೊರಟ ಹೆಜ್ಜೆಗಳು

ಪಳೆಯುಳಿಕೆಗಳನರಸಿ

ಹಿಂದಿರುಗಿದಾಗ ನೆರಳು

ಹಿಂಬಾಲಿಸುತ್ತದೆ ಕಾಲನ

ಕಾಲ ಸದ್ದನು ನೆನೆದು !

 

ಗೆಜ್ಜೆಯ ನಾದವೋ

ಹೆಜ್ಜೆಯ ಉನ್ಮಾದವೋ ಸುತ್ತ

ಆವರಿಸಿದ ಮಬ್ಬಿನಲಿ

ದಿಕ್ಕುಗಾಣದಂತಾದಾಗ

ನೆನಪಾಗುತ್ತದೆ ಇಟ್ಟ ದಿಟ್ಟ

ಹೆಜ್ಜೆಗಳು ಸುಟ್ಟ

ಬಿಟ್ಟ ದಟ್ಟ ಭಾವನೆಗಳು !

 

ಹೊರೆಯಾಗದು ಬಾಳು

ನೆರೆಯ ತೊರೆಯಲಿ ಮಿಂದು

ಸೆರೆಯ ಸೆಲೆಯನು ತೊರೆದು

ಮುಂದಡಿ ಇಡುವಾಗ

ಹೊರೆಯಾಗದು ಬಾಳು ;

ಎಲ್ಲೋ ಒಂದು

ಸದ್ದು ಗುನುಗುನಿಸುತ್ತದೆ

ತಪ್ಪು ಹೆಜ್ಜೆಗಳನಿಡುವಾಗ !

 

ಬಿಂಬ ಪ್ರತಿಬಿಂಬಗಳೊಡನಾಟದಿ

ಧ್ವನಿ ಪ್ರತಿಧ್ವನಿಯ ಹೊಯ್ದಾಟದಿ

ದನಿ ಅಡಗಿದಾಗ ಮಾರ್ದನಿಸುತ್ತದೆ

ಕಾಲನ ಕರೆ ;

ಎನಿತು ಕ್ರಮಿಸಿದರೂ

ಎನಿತು ಶ್ರಮಿಸಿದರೂ

ಬಾಹುಗಳು ತೆರೆದಿರುತ್ತವೆ

ಆಲಂಗಿಸಲು

ಸಾಕ್ಷಾತ್ಕಾರದ ನೆಲೆ

ತೋರಲು !

 

ಕ್ಷಣ ಕ್ಷಣದ ಮಾಧುರ್ಯ

ಕಣಕಣಗಳಲಿ ಬೆರೆತು

ಗತಕಾಲವ ನೆನಪಿಸುವಾಗ

ಕನ್ನಡಿಯೊಳಗಿನ ಗಂಟು

ಕಗ್ಗಂಟಾಗುತ್ತದೆ ;

ಬಿಂಬ ಪ್ರತಿಬಿಂಬದ

ನಡುವೆ ಜೀವ

ದಿಗಂತದ ಮೆಟ್ಟಿಲೇರುವಾಗ

ಕಾಲನ ಸದ್ದೊಂದೇ ಸತ್ಯ

ಉಳಿದುದೆಲ್ಲವೂ ಮಿಥ್ಯ !

Add Comment

Leave a Reply

%d bloggers like this: