Quantcast

ಕ್ಲಿಕ್ ಆಯ್ತು ಕವಿತೆ: ಜಾರಿ ಬೀಳ್ವವಳಲ್ಲ ಏರಿ ನಿಂತವಳು ನೀ

ಮರ್ಧನವೋ ಮಂಥನದ ಕಾಣ್ಮೆಯೋ !

na divakar

ನಾ ದಿವಾಕರ

 

ಭದ್ರ ಕಾಳಿಯ ಭಂಗಿ

ರೌದ್ರಾವತಾರದ ಹಾವಭಾವ

ಮೆಟ್ಟಿ ಮಥಿಸಿ ನಿಂತ

ನೃತ್ಯಾಂಗನೆ

click-aytu-kavite-5ನಿನ್ನ ಕಂಗಳೊಳಗಿರುವುದೇನು ?

ಆಕ್ರೋಶದ ಕಿಡಿಗಳೋ

ಹತಾಶೆಯ ನೆರಳೋ

ಮೆಟ್ಟಿ ನಿಲ್ಲಲೆತ್ನಿಸುವ

ಪೌರುಷೇಯವ

ಕೆಣಕುವ ಛಲವೋ ?

 

ಪುರುಷ ಸೂಕ್ತದ

ಕಬಂಧ ಬಾಹುಗಳು

ಕೆಕ್ಕರಿಸಿ ನೋಡುತ್ತಿವೆ

ಮಧಿಸುವ ಶಕ್ತಿಯ

ತಾಂಡವವನು ;

ವೀರ ಬಾಹುಗಳ

ಅಹಮಿಕೆಯ ಚಾಪಲ್ಯಕ್ಕೆ

ತುತ್ತಾದ ನಿನ್ನೊಡನಾಡಿಗಳಿಗೆ

ಮಥಿಸಿ ಮಧಿಸುವ

ಕಿಂಕಿಣಿಯಂತೆ

ಕಾಣುತ್ತಿರುವೆ  !

ಜಾರಿ ಬೀಳ್ವವಳಲ್ಲ

ಏರಿ ನಿಂತವಳು ನೀ

ಮೆಟ್ಟಿ ನಿಲ್ವವಳು

ಶತಮಾನಗಳ

ಅಪಮಾನಗಳ ನುಂಗಿ

ದಿಗಂತದೆಡೆಗಿನ

ಬೃಹನ್ನಡಿಗೆಗೆ

ಪುರುಷಾಧಿಪತ್ಯದ

ಅಡಿಗಲ್ಲುಗಳು !

ಕಣ್ಣಾವೆಗಳ

ಕಿಡಿಗಳು ರವಿಕಿರಣಗಳ

ಮರೆಮಾಚುವಂತಿದೆಯಲ್ಲಾ ;

ಅದೋ

ಒಮ್ಮೆ ಕಣ್ಹಾಯಿಸು

ನೀ ಮಧಿಸಿದ ಅಹಮಿಕೆಗಳು

ಕಿಂಡಿಗಳಲಿ ನುಸುಳುತ್ತಿವೆ

ಮತ್ತೋರ್ವ

ನಿರ್ಭಯಳನ್ನರಸಿ !

ನೀ ನಿರ್ಭಯಳಲ್ಲ

ಪುರುಷ ಗರ್ಭವ

ಸೀಳಿ ಮಧಿಸಿರುವ

ರುದ್ರಮೌನಿ ;

ಹಾವಭಾವಗಳೇನೇ ಇರಲಿ

ನಿನ್ನೊಡಲ ನೋವು

ಮರೆಯಾಗಲಿದೆ

ಮಥಿಸು ನರ್ತಿಸು

ದಿಗ್ವಿಜಯದ ಪತಾಕೆ

ಹಿಡಿದು

ಪ್ರತಿಧ್ವನಿಸು !

ನಿನ್ನಡಿಯ

ವಿರಾಟ್ ವಿಶ್ವವ ಜಯಿಸಿ

ಅಂತ್ಯಗೊಳಿಸು

ಪುರುಷಾಧಿಪತ್ಯವನು ;

ಧಾತ್ರಿಯ ಮಡಿಲಲಿ

ನಿನ್ನಂತರಾಳದ

ಕನವರಿಕೆಗಳ

ಸಾಕ್ಷಾತ್ಕಾರಕೆ

ಭೂಮಿಕೆ

ಈ ರುದ್ರ ನರ್ತನ ;

ನರ್ತಿಸುತ್ತಲೇ ಇರು

ನಿರಂತರವಾಗಿ

ಚಿರಂತನವಾಗಿ

 

Add Comment

Leave a Reply

%d bloggers like this: