Quantcast

ಕ್ಲಿಕ್ ಆಯ್ತು ಕವಿತೆ: ನಿನ್ನ ತೊಡೆಯ ಮೇಲೂ ಇಟ್ಟಿದ್ದೇನೆ..

  naveen-soraba

ನವೀನ ಸೊರಬ

ತ್ರಿಭಂಗ ನೃತ್ಯ
ಅಷ್ಟು ಸುಲಭವಲ್ಲ ನೀ ಎಣಿಸಿದಂತೆ
ನನ್ನ ತೊಡೆಯ ಮೇಲಿರುವಷ್ಟೇ
ನಂಬಿಕೆಯನ್ನು ನಿನ್ನ ತೊಡೆಯ
ಮೇಲೂ ಇಟ್ಟಿದ್ದೇನೆ..

click-aytu-kavite-5ಹಣೆಯಗಲ ಕುಂಕುಮ
ಕೈಗೆ ಬೆಳ್ಳಿ ಖಡ ತೊಟ್ಟು
ಜಗಮಗಿಸುವ ಲೈಟುಗಳ ಮಧ್ಯೆ
ದೊಡ್ಡಗಣ್ಣುಗಳಲ್ಲಿ ಪ್ರೇಕ್ಷಕರ
ನೋಡುತ್ತಿದ್ದೇನೆ
ನಿನ್ನ ತೊಡೆಯ ಮೇಲೆ ನಂಬಿಕೆಯನಿಟ್ಟು..

ಏಕೆಂದರೆ ಬ್ಯಾಲೆನ್ಸ್ ತಪ್ಪುವುದು
ಬೇಡ ನೋಡು, ಕಲೆಯಿದು;
ಮುಗ್ಗರಿಸಿ ಬಿದ್ದರೆ ಬದುಕಿಗೆ
ಕಪ್ಪು ಚುಕ್ಕೆಯಿದು.

ಬಹಳ ನಂಬಿಕೆಯಿಟ್ಟಿದ್ದೇನೆ
ನಿನ್ನ ತೊಡೆಯ ಮೇಲೆ
ಭಂಗಿಗೆ ಭಂಗ ತರುವುದು ಬೇಡ

ನನ್ನ ಭಾವ, ಭಾರಗಳನ್ನೆಲ್ಲಾ
ನಿನ್ನ ಮಂದಹಾಸದಲ್ಲಿ ಬಚ್ಚಿಟ್ಟುಕೋ
ಮನದ ಅಭಾವ , ಬೇಗುದಿಗಳನ್ನೆಲ್ಲಾ
ಪ್ರೇಕ್ಷಕರಿಗೆ ತಲುಪದಂತೆ ಹಿಡಿದಿಟ್ಟುಕೋ

ನಿನ್ನ ಸ್ಥೈರ್ಯದ ನಿಲುವೇ
ನನಗೆ ಪಾಠ ಶಾಲೆ
ಬಹಳ ನಂಬಿಕೆಯಿಟ್ಪಿದ್ದೇನೆ
ನಿನ್ನ ತೊಡೆಯ ಮೇಲೆ..

Add Comment

Leave a Reply

%d bloggers like this: