Quantcast

ಬೆಂಕಿ ಒಯ್ಯುವ ದೋಣಿ

ಚೈತ್ರಿಕಾ. ಶ್ರೀಧರ್. ಹೆಗಡೆ

ಈಗಷ್ಟೆ ಎದ್ದ ಕೆಂಪು ಮುಸ್ಸಂಜೆ
ಕಡಲ ಬಿಕ್ಕಲ್ಲಿ
ಮುಖತೊಳೆದುಕೊಳ್ಳುತ್ತಿದೆ,
ನಿನ್ನ ಪೂರ್ತಿ ಮರೆತ ಅಲೆ
ಮತ್ತೆ ಮತ್ತೆ ನನ್ನ ನೋಡಿ
ನಗುತ್ತಿದೆ,
ಅದೇ ಅಲ್ಲ್ಯಾವುದೋ ದೋಣಿ
ಬೆಂಕಿಯನ್ನೊಯ್ಯುತ್ತಿದೆ
ಯಾರ ಎದೆ ಸುಡವ
ನೆನಪುಗಳಿಗೆ ಅಗ್ನಿಸ್ಪರ್ಷ
ಇಡಲೋ?

*boats in the hair

ನಿನ್ನೆಗಳ ದಬ್ಬೆ ಸಂಕ ದಾಟಿ
ದೂರ ನಡೆದಿದೆ ಮರೆವಿನೊರಲೆ..

ಕೆನ್ನೆ ಮೇಲುದುರಿದ ರೆಪ್ಪೆಗೂದಲ
ಹಿಡಿದು ಆಸೆಗಳ ಹೇಳಿ
ಊದಿದ ದಿನಗಳು,
ಗುಲಾಬಿ ಎಸಳ ಚಿತ್ರದ
ನಿನ್ನ ಕರ್ಚೀಪು,
ಅರ್ಧ ಹಾಕಿಕೊಳ್ಳುತ್ತಿದ್ದ ಆ
ಚರ್ ಪರ್ ಚಪ್ಪಲಿ
ಇವೆಲ್ಲ ಇನ್ನೂ ಯಾಕೆ
ಹಂಬಲಿವೆ ನನಗೆ?

ಇನ್ನು
ನೆನಪಿಟ್ಟುಕೊಳ್ಳಲಾಗುವುದಿಲ್ಲ
ನಿನ್ನನ್ನು , ಅಗ್ದಿ ಕಾಡುವ
ಅಪ್ಪನ ಸಾವನ್ನು,
ಉಪ್ಪಲ್ಲಿ ಅದ್ದಿ ತೆಗೆದಂತಾಗುವ
ಅಮ್ಮನ ಕಣ್ಣುಗಳನ್ನು..
ಹಾಗಂತ
ಮರೆಯಲೂ ಆಗುವುದಿಲ್ಲ

*

ಮರುಕಾಷ್ಠ, ಅಸ್ತಿ
ಸಂಚಯನೆ ಯಾವುದರ
ತಲೆಬಿಸಿಯೂ ಇಲ್ಲದಂತೆ
ನಿನ್ನೆಗಳ ಸುಡುವುದಾದರೆ
ನನ್ನಲ್ಲೂ ತೇಲಲಿ
ಆ ದೋಣಿ,
ಕಣ್ಣೆದುರೇ ಬೂದಿಯಾಗಲಿ
ಬಿಕ್ಕುವ ಕಡಲು,
ಕೆಂಪುಸಂಜೆಯ ಕಳೇಬರದ
ಮೇಲೆ ಚಂದ್ರನ ಹೂವಿಡುವ
ಇರುಳಲಿ ಅಳದೆ ಬೆಚ್ಚ
ಮಲಗಿಬಿಡಲಿ ಅಮ್ಮ..

ನಿನ್ನ ಕೆನ್ನೆ ಮೇಲುದುರಿದ
ಕೂದಲ ಊದಿ ಬೇಡಲೇ
ಆ ಬೆಂಕಿ ಒಯ್ಯುವ
ದೋಣಿಗಾಗಿ…

One Response

  1. subbanna
    November 4, 2016

Add Comment

Leave a Reply

%d bloggers like this: