Quantcast

ಸದ್ದಿಗಾಗಿ ಕಾತರಿಸುತ್ತೇನೆ..

ಹೆಣದ ಪಕ್ಕ ಮಲಗುವ ಯೋಗವಿನ್ನೂ ಒಲಿದಿಲ್ಲ

ವಿ.ಆರ್.ಕಾರ್ಪೆಂಟರ್

 

ರೈಲು ಬಸ್ಸಿನಲ್ಲಿ ಚಲಿಸುವಾಗ
ಹಾಗೆಯೇ ನಿದ್ರೆ ಆವರಿಸುತ್ತದೆ
ಕೊಳ್ಳುವ ವಸ್ತುಗಳು ಕಣ್ತಪ್ಪುವ
ಕಾರಣ ಸಂತೆಯೊಳು ನಿದ್ದೆ ಬರದು

ಪಕ್ಕ ಮಲಗಿದ ಜೀವದ ಉಸಿರಾಟವ
ಆಲಿಸಿ ನೆಮ್ಮದಿಯಾಗಿ ಮಲಗುವೆ;
ಹೆಣದ ಪಕ್ಕ ಮಲಗುವ ಯೋಗವಿನ್ನೂ ಒಲಿದಿಲ್ಲ

ನಾಯಿಗಳು ಬೊಗಳುವ ಸದ್ದು
ಮನುಷ್ಯರಿನ್ನೂ ಬದುಕಿರುವ ಸಾಕ್ಷ್ಯ
ಹಾಗೆ ಠಕ್ಕರ ಸುಳಿವೂ ಕೂಡ

ಹೂವು ತನ್ನ ಪಕಳೆಯುರುಳಿಸುವ
ಸದ್ದಿಗಾಗಿ ಕಾತರಿಸುತ್ತೇನೆ
ಏಕೆಂದರೆ ನಾನು ಕ್ಷುಲ್ಲಕ ಮನುಷ್ಯ
ನಿರ್ವಾತವೆಂದರೆ ಉಸಿರುಗಟ್ಟುತ್ತದೆ
ಸದಾ ಗಿಜಿಗುಡುವ ಪ್ರತಿಯೊಂದು
ಕ್ಷಣ-ಕಣವೂ ನನಗಾಪ್ತ

ಇನ್ನು ನನ್ನ ಸಹಮಾನವನ ಆರ್ತನಾದವೋ,
ಅಜಾನ್, ಪ್ರಾರ್ಥನಾ ಪ್ರಯೋಗಗಳನ್ನೋ
ಬೇಡವೆನ್ನುವಷ್ಟು ನಿರ್ವಾಣದಲ್ಲಿ ಬದುಕುವ
ಕಲೆಯಿನ್ನೂ ಸಿದ್ಧಿಸಿಲ್ಲ
ಅಥವಾ
ನಾನದಕ್ಕೆ ಒಗ್ಗಿಹೋಗಿರಬಹುದು

3 Comments

  1. Kaligananath Gudadur
    April 23, 2017
  2. ಆರನಕಟ್ಟೆ ರಂಗನಾಥ
    April 20, 2017
    • ವಿ.ಆರ್.ಕಾರ್ಪೆಂಟರ್
      April 23, 2017

Add Comment

Leave a Reply