ಈ ಆಸಾಮಿ ನನ್ನೂರ ಅಸಾದಿಯಂತಲ್ಲ 

 

 

 

 

 

 

 

ಸಿ ಜೆ ರಾಜೀವ 

 

ನನ್ನೂರ ದೇವತೆ
ದುರ್ಗಮ್ಮನ ದೊಡ್ಡಕ್ಕ
ಕರಿಯಮ್ಮನಿಗೆ ಪ್ರತಿ ಜಾತ್ರೆಯಲೂ ನಿಂದನೆಯ ಮಜ್ಜನ
ನನ್ನ ಅಸಾದಿಗಳು ಬೈದದ್ದೇ ಬೈದದ್ದು !
ನೀನು ಹಾದರದವಳು, ನಡತೆಗೆಟ್ಟವಳು
ದಾನವೇಂದ್ರ ರಾವನಣನ್ನು ಕೊಂದದ್ದೇಕೆ
ಆತನೇನು ಧರ್ಮ ಭ್ರಷ್ಟನಲ್ಲ..
ಅದೇನು ಬೈಗುಳ, ಅದೆಂಥಾ ಪ್ರಶ್ನೆ
ಅನಕ್ಷರಸ್ಥ ಅಸಾದಿಯ
ನಂಜಿಲ್ಲದ ಗೇಲಿಗೆ
ಕರಿಯಮ್ಮಒಲಿವಳು, ನಲಿವಳು
ನೆರೆದ ಊರ ಭಕುತರು ಬೈಗುಳಕೆ
ಎನುವರು ಉಘೇ ಉಘೇ

ಯಾಕೆ ಹೀಗೆ ?
ಊರ ಕಾಯುವ ದೇವತೆಗೆ
ಬೈಗುಳವೇಕೆ ?
ಎಂದಾದರೂ ಅರಿವು ಬಂದು
ಕರಿಯಮ್ಮ ಕೆರಳಿ ಕೆಂಡವಾದರೆ ?
ಭಕುತರು ಬೀದಿಗಿಳಿದರೆ..
ನನ್ನದೋ ಕಾಳಜಿಯ ಕಕ್ಕುಲಾತಿ !
ನನ್ನವ್ವನ ಮುಂದೆ ಅನುಮಾನ ಹರಡಿದೆ

ಆಕೆ ನಕ್ಕು ಹೇಳಿದಳು-
ಅಯ್ಯೋ ಮಗನೇ,
ಆಸಾದಿಯ ಸತ್ಯದ ಹಾಡಿಗೆ
ಕೋಪವೇಕೆ ತಾಪವೇಕೆ ?
ನರ ಮನುಷ್ಯಳಾದ ಮೇಲಲ್ಲವೇ
ಕರಿಯಮ್ಮ ದೇವರಾಗಿದ್ದು
ಅದಕೂ ಮುನ್ನ ಆಕೆಯೂ
ಎಡವಿರಬಹುದು ಹತ್ತಾರು ಬಾರಿ
ಆಕೆ ತಪ್ಪು ಒಪ್ಪುಗಳ ಅಮ್ಮ !
ಸಂಭ್ರಮದ ಹೊತ್ತಲ್ಲೂ ಕರಿಯಮ್ಮನ
ಕಾಲು ನೆಲದ ಮೇಲೇ ಇರಬೇಕಲ್ಲವೇ ?
ಅದಕಾಗಿ ಆಸಾದಿಯ ನೆನೆಕೆ ಸೇವೆ !
ಇದು ಕರಿಯಮ್ಮನಿಗೂ ಭಕುತರಿಗೂ
ಅರಿವಿಲ್ಲ ಎಂದಲ್ಲ
ತಿಳಿದೇ ನಡೆಯುವ ಜಾತ್ರೆಯಾಟವಿದು !

ಇಲ್ಲೊಬ್ಬ ಅಕ್ಷರಸ್ಥ ಆಸಾಮಿ
ಪ್ರತಿ ದಸರೆಯಲ್ಲೂ
ದುರ್ಗೆಯನ್ನು ತೆಗಳುತ್ತಾನೆ
ಮಹಿಷನನ್ನು ಭಜಿಸುತ್ತಾನೆ
ಆಸಾದಿಯಂತೆ ಸತ್ಯ ಹೇಳುತ್ತಾನೆ
ಆದರೆ, ಭಾಷೆಯಲಿ ಅಂದವಿಲ್ಲ
ಮಾತಿನಲ್ಲಿ ಚೆಂದವಿಲ್ಲ
ಇದೆ- ನಾಲಿಗೆ ತುಂಬಾ ನಂಜು
ಬೌದ್ಧಿಕತೆಯ ಬಡಿವಾರ
ಬೈಗುಳಕೆ ದುರ್ಗೆ ಕನಲಿರಬಹುದು
ಭಕುತರಂತೂ ಬೀದಿಗಿಳಿದಿದ್ದಾರೆ
ಆಸಾಮಿಗೆ ನಡೆದಿದೆ
ದ್ವೇಷಪೂರಿತ ಮಾತಿನ ಮಂಗಳಾರತಿ !

ಮತ್ತೆ ನನ್ನವ್ವನ ಕೇಳಿದೆ
ಹೇಗಿದೆ ಹೊಸ ನಿಂದಾ ಸ್ತುತಿ ?
ಆಕೆ ನಗಲಿಲ್ಲ, ಆತಂಕದಲಿ ಅಂದಳು:
ಭಯವಾಗುತಿದೆ ಮಗನೆ,
ಏನ ಹೇಳಲಿ ?
ತಿಳಿದೇ ನಡೆಯುವ
ಅರಿವುಗೇಡಿನ ಆಟವಿದು
ಕರಿಯಮ್ಮನ ಬೈಯುವ
ನಮ್ಮುರ ಆಸಾದಿಯೇ ಬೇರೆ
ದುರ್ಗೆಯನು ತೆಗಳುವ
ಈ ಊರಿನ ಆಸಾಮಿಯೇ ಬೇರೆ
ಬೈಯುವವರೆಲ್ಲಾ
ಆಸಾದಿಗಳಲ್ಲ
ದ್ವೇಷಿಸುವವರು ಭಕುತರಲ್ಲ !

 

3 Responses

  1. Dadapeer says:

    Super

  2. Lalitha siddabasavayya says:

    ಗದ್ಯಕ್ಕೇ ಅಂತ ಬರೆದುಬಿಟ್ಟು ಕೈ ತೊಳಕೊಂಡಿರುವ ಇಂತಹ ವಸ್ತುವನ್ನು ಕವಿತೆಯಾಗಿಸಲು ಪ್ರಯತ್ನಿಸುವುದೇ ನಿಜವಾದ ಹೊಸಮಾರ್ಗ ಎಂದು ನಾನು ಅಂದುಕೊಳ್ಳುವೆ . ಇಲ್ಲಿ ಇನ್ನಷ್ಟು ಕೊಂಬೆರೆಂಬೆ ಸವರಿದ್ದರೆ ಈ ಕವಿತೆಗಿಡ ಇನ್ನೂ ಚೆನ್ನಾಗಿರುತ್ತಿತ್ತು. ಆದರೂ ಈಗಲೂ ಕವಿತೆ ಅದರ ಹೊಸಮಾರ್ಗದಿಂದಲೆ ತಿರುಗಿ ನೋಡುವಂತಹ ಹೊಸಬೆಳೆಯಾಗಿದೆ. ಅಸಾದಿಗಳ ಬೈಗುಳವನ್ನು ಕೇಳಿದ್ದವರಾದರೆ ಇದು ಥಟ್ಟನೆ ಮನಸ್ಸಿಗಿಳಿಯುತ್ತದೆ.

  3. C J Rajeeva says:

    ಥ್ಯಾಂಕ್ಯೂ ಮೇಡಂ.. ಕಾವ್ಯವಾಗಲು ಯತ್ನಿಸಿರುವ ಸಾಲುಗಳಿವು ಎಂಬ ಭಾವದಲ್ಲಿಯೇ, ಓದಿ ಪ್ರತಿಕ್ರಿಯಿಸಲಿ ಎಂದು ಮೋಹನ್ ಸರ್ ಗೆ ವಾಟ್ಸಾಪ್ ಮಾಡಿದ್ದೆ. ಅವರು ಕಾವ್ಯದ ಚೌಕಟ್ಡಿಗೆ ಎಳೆತಂದು ಪ್ರಕಟಿಸಿದ್ದಾರೆ.ಅವರ ಪ್ರೀತಿ-ಪ್ತೋತ್ಸಾಹಕ್ಕೆ ಋಣಿ.
    ನಿಮ್ಮಪ್ರತಿಕ್ರಿಯೆಗೆ ಮತ್ತೊಮ್ಮೆ ಧನ್ಯವಾದಗಳು.
    ರಾಜೀವ

Leave a Reply

%d bloggers like this: