ಸಿಜಿಕೆ ಉತ್ಸವದಲ್ಲಿ ಇಂದು ಚಂದ್ರಕೀರ್ತಿಯ ನಾಟಕ

ನಾಟಕ : ಕಕೇಶಿಯನ್ ಚಾಕ್ ಸರ್ಕಲ್
ಮೂಲ : ಬರ್ಟೋಲ್ ಬ್ರೆಕ್ಟ್
ಕನ್ನಡಕ್ಕೆ :ಜಿ. ಎನ್. ರಂಗನಾಥರಾವ್
ನಿರ್ದೇಶನ :ಚಂದ್ರಕೀರ್ತಿ. ಬಿ
ತಂಡ : ಥಿಯೇಟರ್ ಆರ್ಟಿಸ್ಟ್ರಿ

ನಾಟಕ :

ಜರ್ಮನ್ ನಾಟಕಕಾರ ಬರ್ಟೋಲ್ ಬ್ರೆಕ್ಟ್ ‘ಕಕೇಸಿಯನ್ ಚಾಕ್ ಸರ್ಕಲ್’ ನಾಟಕವನ್ನು ಕನ್ನಡಕ್ಕೆ ಜಿ. ಎನ್. ರಂಗನಾಥರಾವ್ ಅವರು ಅನುವಾದಿಸಿದ್ದು, ಈ ನಾಟಕ ‘ತಾಯ್ತನ’ದ ಹೊಸ ವ್ಯಾಖ್ಯಾನವನ್ನು ಬಿಂಬಿಸುತ್ತದೆ. ತಾಯಿ ಎನ್ನುವುದು ವಾಸ್ತವವಾಗಿ ಹೆಣ್ಣಿನ ಜೈವಿಕತೆಯನ್ನು ನೆನಪಿಸುವ ಪದ. ಆದರೆತಾಯಿ ಎನ್ನುವುದು ಬರಿಯ ದೇಹವಲ್ಲ; ಅದೊಂದು ಮನಸ್ಸು, ಮನಃಸ್ಥಿತಿ. ತಾಯ್ತನವೆನ್ನುವುದು ಒಂದು ಭಾವ.

ಈ ನಾಟಕ ಒಂದು ಮಗುವಿನ ನಿಜವಾದ ತಾಯಿ ಯಾರು ಎಂಬ ಸಮಸ್ಯೆಯನ್ನು ಬಿಡಿಸಲೆಂದು ಚಾಕ್ಸರ್ಕಲ್ ಅನ್ನು ಬರೆದು ಅದರೊಳಗೆ ಮಗುವನ್ನುನಿಲ್ಲಿಸಿ, ಮಗು ತಮ್ಮದೆಂದು ಜಗಳವಾಡುತ್ತಿದ್ದ ಇಬ್ಬರು ತಾಯಂದಿರಿಗೆ ಮಗುವಿನ ಕೈಗಳನ್ನ ಎಳೆಯಲು ತಿಳಿಸುತ್ತಾರೆ. ಯಾರು ಜೋರಾಗಿ ಎಳೆದುಕೊಳ್ಳುತ್ತಾರೊ ಅವರಿಗೆ ಮಗು ಸೇರುತ್ತದೆ ಎನ್ನುತ್ತಾರೆ.
ಬ್ರೆಕ್ಟ್ ತನ್ನ ನಾಟಕದಲ್ಲಿ ಜೈವಿಕವಾಗಿ ಹೆತ್ತ ತಾಯಿ ಮಗುವನ್ನು ಪಡೆಯುವುದಕ್ಕೆ ಪ್ರಾಶಸ್ತ್ಯ ನೀಡುವುದೇ ಇಲ್ಲ. ಅವನ ಪ್ರಕಾರ ಜೈವಿಕತೆ ಸಂಬಂಧಗಳನ್ನು ನಿರ್ಧರಿಸುವಂಥದ್ದಲ್ಲ. ಆದ್ದರಿಂದ ಯಾರು ಮಗುವನ್ನು ಪ್ರೀತಿ-ಮಮತೆಯಿಂದ ಸಾಕಿರುತ್ತಾಳೊ ಅವಳಿಗೆ ಮಗುವನ್ನು ಸೇರುವಂತೆ ಮಾಡುತ್ತಾನೆ.

ಚಂದ್ರಕೀರ್ತಿ :

ಚಂದ್ರಕೀರ್ತಿ ಪ್ರೇಮಾ ಕಾರಂತರ “ಬೆನಕ ಮಕ್ಕಳ ನಾಟಕ ಕೇಂದ್ರದ ಮೂಲಕ ತಮ್ಮ ರಂಗಪಯಣ ಆರಂಭಿಸಿದವರು. ಸಿಂದಬಾದ್, ಅಳಿಲು ರಾಮಾಯಣ, ಕಕೇಶಿಯನ್ ಚಾಕ್ ಸರ್ಕಲ್, ಹುಚ್ಚು ದೊರೆ ಮತ್ತು ಮೂವರು ಮಕ್ಕಳು, ಬೊಮ್ಮನ ಹಳ್ಳಿಯ ಕಿಂದರಿ ಜೋಗಿ, ಮಾಮಾಮೋಶಿ ಮುಂತಾದ ಮಕ್ಕಳ ನಾಟಕಗಳಲ್ಲಿ ಮುಖ್ಯ ಪಾತ್ರಗಳನ್ನು ನಿರ್ವಹಿಸಿ ಬೆಳೆದ ಚಂದ್ರಕೀರ್ತಿ ನಂತರ ಬೆನಕ, ಕ್ರಿಯೇಟೀವ್ ಥಿಯೇಟರ್, ಸಮುದಾಯ ತಂಡದ ನಾಟಕಗಳಲ್ಲೂ ಅಭಿನಯಿಸುತ್ತಾ, ಸಂಚಾರಿ ಥಿಯೇಟರ್ ನ ನಾಟಕಗಳಲ್ಲಿ ನಟನಾಗಿ, ವಿನ್ಯಾಸಗಾರನಾಗಿ, ತಂತ್ರಜ್ಞನಾಗಿ ಕೆಲಸ ಮಾಡಿದ್ದಾರೆ.

ಅರಹಂತ, ನರಿಗಳಿಗೇಕೆ ಕೋಡಿಲ್ಲ, ಶ್ರೀದೇವಿ ಮಹಾತ್ಮೆ, ನಾಟಕಗಳಲ್ಲಿ ನಟನಾಗಿ, ಕಮಲಮಣಿ ಕಾಮಿಡಿ ಕಲ್ಯಾಣ ನಾಟಕಕ್ಕೆ ವಸ್ತ್ರ ವಿನ್ಯಾಸಗಾರನಾಗಿ, ವ್ಯಾನಿಟಿ ಬ್ಯಾಗ್ ನಾಟಕಕ್ಕೆ ತಂತ್ರಜ್ಞರಾಗಿ ಕೆಲಸ ಮಾಡಿರುವ ಕೀರ್ತಿ ರಂಗಭೂಮಿಯ ಚಟುವಟಿಕೆಗಳ ಪ್ರಚಾರದ ಕೆಲಸಗಳಿಗೆ ಯಾವಾಗಲೂ ಹೊಸ ದಾರಿ ಹುಡುಕುತ್ತಿರುತ್ತಾರೆ.

ಶಾಲೆಗಳಲ್ಲಿ ಮಕ್ಕಳಿಗೆ ರಂಗಭೂಮಿಯನ್ನು ಕಲಿಸುವ ಶಿಕ್ಷಕರಾಗಿ ಕೆಲಸ ಮಾಡುತ್ತಿದ್ದಾರೆ. ರಂಗಶಂಕರದ ’ಯಂಗ್ ಡೈರೆಕ್ಟರ್ಸ್’ ಯೋಜನೆಯಲ್ಲಿ ಈ ನಾಟಕ ನಿರ್ದೇಶಿಸಿದ ಚಂದ್ರಕೀರ್ತಿ ಈ ನಾಟಕಕ್ಕೆ ಪ್ರತಿಷ್ಟಿತ META ಪ್ರಶಸ್ತಿಯನ್ನು ಗಳಿಸಿದ್ದಾರೆ. ಈ ಸಲದ ಸಿಜಿಕೆ ರಾಷ್ಟ್ರೀಯ ನಾಟಕೋತ್ಸವದ ಕನ್ನಡ ನಾಟಕ ಇದು.

1 Response

  1. Chandra keerthi says:

    ತುಂಬು ಹೃದಯದ ಧನ್ಯವಾದಗಳು! 🙂

Leave a Reply

%d bloggers like this: