ಎಲ್ಲೆಡೆ ಅಕ್ಷರ ಸಾಂಗತ್ಯ. ಇದು ಹೇಗೆ?

-ಅಂತರ್ಮುಖಿ
ಒಳಗೂ..ಹೊರಗೂ..
ವಾಚಾಳಿಯಾಗಿಸಬಹುದಾದ `ಕತೆ’, ಮಾತುಮರೆಸುವ ಕವಿತೆ; ಇವುಗಳ ನಡುವೆ ಸಂಯಮದ ಉತ್ಸಾಹಿ ಸಂದೀಪ ನಾಯಕ. ಅವಸರದ ಸಾಹಿತ್ಯ ಸೃಷ್ಟಿಸುವ ಪತ್ರಕರ್ತನ ವೃತ್ತಿಯಲ್ಲಿದ್ದು ಒಳತೋಟಿಗಳಿಗೆ, ಸೂಕ್ಷ್ಮಗಳಿಗೆ ಸ್ಪಂದಿಸುವಷ್ಟು ಸಂವೇದನೆ ಉಳಿಸಿಕೊಂಡಿರುವ ಕತೆಗಾರ, ಕವಿ. ರೇಜಿಗೆ ಹುಟ್ಟಿಸುವಷ್ಟು ಅಕ್ಷರಲೋಕದಲ್ಲಿ ಮುಳುಗೇಳುತ್ತಿದ್ದರೂ, ಇವರ ಕತೆ, ಕವಿತೆಗಳಲ್ಲಿ ಅಪ್ಪಟ ಶಿರಸಿಯ ದಟ್ಟ ಕಾಡು, ಮಳೆ, ನೀರು ಪಸೆಪಸೆಯಾಗಿ ಓದುಗನನ್ನು ಆದ್ರ್ರಗೊಳಿಸುತ್ತದೆ. `ಕಾವ್ಯ ಮುಟ್ಟಿ ಮಾತಾಡಿಸಿದರೆ ಫಲ ಕೊಡುವ ಮಾಂತ್ರಿಕ ವೃಕ್ಷ’ ಎಂದೇ ನಂಬಿರುವ ಸಂದೀಪ, `ಅಗಣಿತ ಚಹರೆ’ ಎಂಬ ಕವಿತೆಗಳ ಸಂಕಲನವನ್ನು, `ಗೋಡೆಗೆ ಬರೆದ ನವಿಲು’ ಎಂಬ ಕಥಾ ಸಂಕಲನವನ್ನು ಪ್ರಕಟಿಸಿದ್ದಾರೆ. ಎರಡು ಭಿನ್ನ ಸಾಹಿತ್ಯ ಪ್ರಕಾರಗಳಲ್ಲಿ ಕ್ರಿಯಾಶೀಲರಾಗಿರುವ ಸಂದೀಪ ಇವತ್ತಿನ ಸನ್ನಿಧಾನದಲ್ಲಿ…
ಪತ್ರಕರ್ತ, ಕವಿ, ಕತೆಗಾರ, ಎಲ್ಲೆಡೆ ಅಕ್ಷರ ಸಾಂಗತ್ಯ. ಇದು ಹೇಗೆ ಶುರುವಾಯ್ತು?
ನಾನು ಅಕ್ಷರದ ಸೆಳೆತಕ್ಕೆ ಸಿಕ್ಕಿದ್ದು ಬಹಳ ಹಿಂದೆ. ಬಹುಶಃ ಹೈಸ್ಕೂಲಿನಲ್ಲಿದ್ದಾಗ ಎಂದು ಕಾಣುತ್ತದೆ. ಆಗಲೇ ನಾನು `ಚಂದಮಾಮ’ದ ಕಥೆಗಳಿಂದ ಪ್ರಭಾವಿತನಾಗಿ, ಅವುಗಳನ್ನು ಅನುಕರಿಸಿ ಕಥೆಗಳನ್ನು ಬರೆಯುತ್ತಿದ್ದೆ. ಆಮೇಲಷ್ಟೇ ಪ್ರಬಂಧ, ಕವಿತೆಗಳನ್ನು ಬರೆಯಲು ಶುರುಮಾಡಿದ್ದು, ಆನಂತರ ಕಥೆಗಳನ್ನು ಬರೆಯಲು ಶುರುಮಾಡಿದ್ದು ಇತ್ತೀಚೆಗಷ್ಚೇ. ಪ್ರೀತಿ, ಹರೆಯ ಹೇಗೆ ಶುರುವಾಯಿತು ಎಂದು ಹೇಳಲು ಸಾಧ್ಯವಿಲ್ಲವೋ ಹಾಗೆಯೇ ಅಕ್ಷರದ ಮೋಡಿಗೆ ಸಿಲುಕಿಕೊಂಡದ್ದನ್ನು ಹೇಳುವುದು ಅಸಾಧ್ಯ.
ಒಂದು ಹಂತ ದಾಟಿದ ಮೇಲೆ ಬರವಣಿಗೆ ಎನ್ನುವುದು ಅನಿವಾರ್ಯವಾಗುತ್ತದೆ. ಅದರ ಹಿಡಿತದಿಂದ ಬಿಡಿಸಿಕೊಳ್ಳುವುದು ಕಷ್ಟ. ಬರವಣಿಗೆ ಖುಷಿಗೆ ತಮ್ಮನ್ನು ಕೊಟ್ಟುಕೊಂಡ ಎಲ್ಲ ಲೇಖಕರ ಪಾಡು ಕೂಡ ಬಹುಷಃ ಇದೇ.
ವ್ಯವಧಾನವೇ ಇಲ್ಲದ ವೃತ್ತಿ, ಧ್ಯಾನಬಯಸುವ ಪ್ರವೃತ್ತಿ, ಇವುಗಳ ನಡುವೆ ನಿಮ್ಮನ್ನು ನೀವು ಹೇಗೆ ಕಾಣುತ್ತೀರಿ?
ಸಂತೆಯಲ್ಲಿ ಸಂತನಾಗುವುದೆಂದರೆ ಇದೇ ಇರಬೇಕು! ತೀವ್ರ ಚಡಪಡಿಕೆಯ ಮನಸ್ಥಿತಿ ಇದ್ದಾಗಲೇ ನಿಮಗೆ ಒಳ್ಳೆಯದನ್ನು ಬರೆಯಲು ಸಾಧ್ಯ. ವ್ಯವಧಾನ ಇಲ್ಲದ ಈ ವೃತ್ತಿಯ ನಡುವೆಯೇ ನನ್ನದೇ ಆದ ಸ್ಪೇಸ್ ಅನ್ನು, ಜಗತ್ತನ್ನು, ಸಮಯವನ್ನು ಕಲ್ಪಿಸಿಕೊಳ್ಳುವುದೇ ಧ್ಯಾನಸ್ಥನಾಗುವುದಕ್ಕೆ ಒಳ್ಳೆಯ ದಾರಿ, ಉಪಾಯ ಎಂದು ನನಗನಿಸುತ್ತದೆ. ಹಾಗೆಂದು ಪೂರ್ತಿ ಬಿಡುವು ಸಾಕಷ್ಟು ಸಮಯ ನಿಮಗಿದೆ ಎಂದರೂ ಬರೆಯಲು ಸಾಧ್ಯವಾಗುತ್ತದೆಯೇ ಎಂಬುದು ನನಗೆ ಅನುಮಾನ. ದೈನಿಕದ ಕೆಲಸಗಳ ನಡುವೆಯೇ ಬೇರೆ ಏನನ್ನೂ ಮೂಡಿಸಲು ಪ್ರಯತ್ನಿಸುವುದು ಒಬ್ಬ ಪತ್ರಕರ್ತನ ವೃತ್ತಿಯಲ್ಲಿರುವ ಬರಹಗಾರನಿಗೆ ಸಾಧ್ಯವಾಗಬೇಕು. ಹಾಗಿದ್ದಾಗಲೇ ಬದುಕಿನಿಂದ ಹೊರತಾಗಿರುವ ಸಾಹಿತ್ಯ ಬರುತ್ತದೆ
ನಿಮ್ಮ ಕವಿತೆಗಳನ್ನು ಓದುವಾಗ ಮುಖಕ್ಕೆ ಮಂಜು ಮುತ್ತಿದ ಹಿತ. ಅಷ್ಟೊಂದು ಆದ್ರ್ರತೆಗೆ ಕಾರಣವೇನು?
ನನ್ನ ಕವಿತೆ ನನ್ನ ಹಾಗೆ ಎನ್ನಬಹುದು. ಅಂಥ ನಿದರ್ಿಷ್ಟ ಕಾರಣವೇನೂ ಇಲ್ಲ, ನಾನು ಕವಿತೆಗಳಲ್ಲಿ ಪ್ರಯೋಗಗಳನ್ನು ನಡೆಸುತ್ತಿದ್ದಾಗ ನೀವು ಹೇಳುವ ಆದ್ರ್ರತೆ ಎನ್ನುವುದು ಕವಿತೆಗಳ ಒಂದು ಲಕ್ಷಣವಾಗಿ ಬಂದಿರಬಹುದೇನೋ.
ಕವಿತೆ ಒಂದು ರೂಪಕ ಅನ್ನೋದಾದರೆ, ಕತೆ ಏನು ಅನ್ನಿಸುತ್ತೆ?
ಕವಿತೆಯನ್ನು ಕೇವಲ ರೂಪಕ್ಕೆ ಸೀಮಿತಗೊಳಿಸುವುದು ಬೇಡ. ಆದರೂ ಕವಿತೆ ಜಗತ್ತಿಗೆ ರೂಪಕವಾದರೆ, ಕಥೆ ಎನ್ನುವುದು ಬದುಕಿಗೆ ಪ್ರತಿಮೆ ಎನ್ನಬಹುದು.
ಕನ್ನಡ ಕತೆಗಳಲ್ಲಿ ಏನಾದರೂ ಹೊಸತನ ಕಾಣಿಸುತ್ತಿದೆಯೇ?
ಕನ್ನಡ ಕಥೆಗಳಲ್ಲಿ ಅಂಥ ಹೊಸತನ ನನಗೆ ಕಾಣುತ್ತಿಲ್ಲ. ಏಕೆಂದರೆ, ಸರಳವಾಗಿ ಹೇಳಬೇಕಂದರೆ ಈ ಕಥೆಗಳಲ್ಲಿ ಬೇರೆಯ ಅನುಭವದ ಜಗತ್ತಿದೆ. ಇದನ್ನು ಓದದಿದ್ದರೆ ಬೇರೆ ಏನನ್ನೂ ಕಳೆದುಕೊಳ್ಳುತ್ತೇನೆ ಎಂಬಂಥ ತೀವ್ರವಾಗಿ ಓದಲೇ ಬೇಕೆನಿಸುವ ಹೊಸಕಥೆಗಳು ನನಗೆ ಕಾಣುತ್ತಿಲ್ಲ. ಹೊಸತನ ಎನ್ನುವುದು ಬೇರೆಯದೇ ಆದ ಅನುಭವದ ಮಂಡನೆ, ಅಭಿವ್ಯಕ್ತಿ ಕ್ರಮದಿಂದ ಬರುತ್ತದೆ ಎಂದುಕೊಂಡಿದ್ದೇನೆ. ಈಗಲೂ ನಾನು ಓದುವುದು ಮಾಸ್ತಿ, ಚಿತ್ತಾಲ, ಲಂಕೇಶ್, ತೇಜಸ್ವಿ, ಶಾಂತಿನಾಥ ದೇಸಾಯಿ, ಜಯಂತ ಕಾಯ್ಕಿಣಿ ಈ ಲೇಖಕರನ್ನೇ. ಅಂದರೆ ಈಗಲೂ, ಪ್ರತಿ ಬಾರಿ ಓದಿದಾಗಲೂ ಈ ಲೇಖಕರು ಮಂಡಿಸುವ ಲೋಕ ಹೊಸತಾಗಿಯೇ ನನಗೆ ಕಾಣುತ್ತದೆ. ಆದರೆ ಇತ್ತೀಚಿನ ಲೇಖಕರ ಕಥೆಗಳು ಇತ್ತೀಚೆಗೆ ಬರೆದವು ಎನ್ನುವುದನ್ನು ಬಿಟ್ಟರೆ ಹೊಸತಾಗೇನೂ ಕಂಡಿಲ್ಲ.
ಇವತ್ತಿನ ಬರಹಗಾರರನ್ನು ತೀವ್ರವಾಗಿ ಕಾಡುವ ಸಂಗತಿ ಯಾವುದಿರಬಹುದು?
ಯಾವ ಯಾವ ಲೇಖಕರಿಗೆ ಏನೇನು ಕಾಡುತ್ತದೆ ಎಂಬುದನ್ನು ನಾನು ಹೇಗೆ ಹೇಳುವುದು! ಎಲ್ಲರಿಗೂ ಅವರಿಗೆ ಪ್ರೀತಿಯುಂಟು ಮಾಡುವಂಥದ್ದು ಈ ಒಂದೇ ಬದುಕಿನಲ್ಲಿ ಕಾಡುವಂಥಾಗಲಿ, ಅದನ್ನು ತಮ್ಮ ಬರಹಗಳ ಮೂಲಕ ನಮ್ಮಂಥ ಓದುಗರಿಗೆ ಅವರು ಹೇಳುವಂತಾಗಲಿ.
ನಿಮ್ಮ ಕತೆ, ಕವಿತೆಗಳಲ್ಲಿ ಮಾರ್ದನಿಸುವ ಒಂದು ದನಿ…
ನನ್ನ ಕಥೆ ಕವಿತೆಗಳಲ್ಲಿ ಮಾರ್ದನಿಸುವ ಒಂದೇ ದನಿ ಯಾವುದೆಂದು ಹೇಳುವುದು ಸದ್ಯಕ್ಕೆ ಕಷ್ಟವಾಗುತ್ತದೆ. ಏಕೆಂದರೆ ಅವನ್ನೆಲ್ಲ ನಾನು ಒಟ್ಟಾಗಿ ಓದಿಲ್ಲದಿರುವುದರಿಂದ ಈ ಪ್ರಶ್ನೆಗೆ ಅವುಗಳನ್ನು ಓದಿ ಉತ್ತರ ಹೇಳಬೇಕಾಗುತ್ತದೆನೋ!
ಥಟ್ಟನೆ ಕತೆ ಎಂದರೆ ಏನು ನೆನಪಾಗುತ್ತೆ? ಕವಿತೆ ಎಂದರೆ ಯಾರು ನೆನಪಾಗುತ್ತಾರೆ?
ಕಥೆ ಎಂದರೆ… ಪಾತಿ ದೋಣಿ, ಹೊಳೆ ದಾಟುವ ತಾರಿ, ಬೇಣ, ಹಕ್ಕಲು, ಅಂಕೋಲೆ ಬಂಡಿಹಬ್ಬ, ಊರಿನ ಓಣಿಗಳು, ಮೀನು, ಪೇಟೆ, ಗನರ್ಾಲು ಸಾಹೇಬ, ಹೆದ್ದಾರಿಯಲ್ಲಿ ಹಾಯುತ್ತಲೇ ಇರುವ ವಾಹನಗಳು, ಮಳೆಗಾಲದಲ್ಲಿ ರುಮುಗುಡುವ ಸಮುದ್ರ ಜನರ ಮಾತೇ ಕೇಳಿಸದ ಮನೆಗಳು ಇನ್ನೂ ಏನೇನೋ ನೆನಪಾಗುತ್ತದೆ. ಕವಿತೆ ಎಂದೊಡನೆ ದಿನಕರ ದೇಸಾಯಿ, ಗಂಗಾಧರ ಚಿತ್ತಾಲ, ಜಯಂತ ಕಾಯ್ಕಿಣಿ ನೆನಪಾಗುತ್ತಾರೆ.
ತುಂಬಾ ಇಷ್ಟಪಡುವ ನಿಮ್ಮದೇ ಪದ್ಯ..
ಈವರೆಗೆ ಬರೆದವುಗಳಲ್ಲಿ ಬಹುಶಃ ಯಾವುದೂ ಇಲ್ಲ ಎಂದು ಕಾಣುತ್ತದೆ. ಮುಂದೆ ನಾನು ಬರೆಯಲಿರುವ ಕವಿತೆಯೇ ನನಗೆ ಇಷ್ಚವಾಗಬಹುದಾದ ಕವಿತೆ. ಅಂದರೆ, ನನಗೆ ಪ್ರಿಯವಾಗುವ ಕವಿತೆ ಭವಿಷ್ಯದಲ್ಲಿದೆ.

‍ಲೇಖಕರು avadhi

November 27, 2009

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This