ಕಾಪಿ ರೈಟ್ ಲೋಕದಲ್ಲಿ ಲೆಫ್ಟ್, ರೈಟ್..

– ಜಿ ಎನ್ ಮೋಹನ್

ಕೃಪೆ : ವಿಜಯ ಕರ್ನಾಟಕ

ಇಡೀ ಸಂಸತ್ತು ಜಾವೇದ್ ಅಕ್ತರ್ ಭಾಷಣವನ್ನು ಕಿವಿಗೊಟ್ಟು ಕೇಳುತ್ತಿತ್ತು. ಜಾವೇದ್ ಅಕ್ತರ್ ತಾವು ಕಂಡ ಚಿತ್ರರಂಗದ ಒಂದೊಂದೇ ಕಣ್ಣೀರ ಕಥೆಗಳನ್ನು ಸಂಸತ್ತಿನ ಮುಂದೆ ಹರಡುತ್ತಾ ಹೋದರು. ಅದು ನಿಟ್ಟುಸಿರಿನ ಗಾಥೆ. ಮನಕರಗಿದ ಸಂಸತ್ತು ಕಾಪಿರೈಟ್ ತಿದ್ದುಪಡಿ ಮಸೂದೆಗೆ ಒಪ್ಪಿಗೆ ಸೂಚಿಸಿಯೇ ಬಿಟ್ಟಿತು. ಆನಂತರ ಎಲ್ಲೆಡೆಯೂ ಅದೇ ಚರ್ಚೆ. ಜಾವೇದ್ ಹೇಳಿದ ಕಥೆಗಳು ಜನರ ಮನದಾಳದಲ್ಲಿ ಇಳಿಯಲು ಸಜ್ಜಾಗುತ್ತಿತ್ತು. ಆಗಲೇ ವಿಕ್ರಂ ವಿನ್ಸೆಂಟ್ ಫೇಸ್ ಬುಕ್ ನ ಗೋಡೆಯ ಮೇಲೆ ‘Copyright is copywrong. I support Copyleft’ ಅನ್ನುವ ಹೇಳಿಕೆಯನ್ನು ಏರಿಸಿದರು. ಕಾಪಿರೈಟ್ ಬಗ್ಗೆ ಮಾತನಾಡುತ್ತಿದ್ದವರಿಗೆ ಒಂದು ಪುಟ್ಟ ಷಾಕ್. ಇದುವರೆಗೆ ಸರಿ ಎಂದುಕೊಂಡಿದ್ದ ಕಾಪಿರೈಟ್, ಕಾಪಿ ‘ರಾಂಗ್’ ಆಗಿರಲೂ ಸಾಧ್ಯವೇ?. ಅದರಲ್ಲೂ ವಿಕ್ರಂ ಹೇಳುತ್ತಿರುವ ಈ ಕಾಪಿ ‘ಲೆಫ್ಟ್’ ಯಾವುದು? ಏನಿದು ಲೆಫ್ಟ್, ರೈಟ್..? ವಿಕ್ರಂ ವಿನ್ಸೆಂಟ್ ಸ್ವತಂತ್ರ ತಂತ್ರಾಂಶ ಚಳವಳಿಯಲ್ಲಿ ತೊಡಗಿಸಿಕೊಂಡಿರುವವರು. ಈಗ ಮುಂಬೈನ ಐ ಐ ಟಿ ಯಲ್ಲಿ ಪಿ ಎಚ್ ಡಿ ಮಾಡುತ್ತಿದ್ದಾರೆ. ಹಾಗೆಯೇ ಓಂ ಶಿವಪ್ರಕಾಶ್, ಜಯಕುಮಾರ್ ಎಚ್ ಎಸ್, ಹರಿಪ್ರಸಾದ್ ನಾಡಿಗ್, ರಸಿನೇಶ್, ಪಳನಿ, ರಘುರಾಮ್ ಈ ಎಲ್ಲರಿಂದಲೂ ನನಗೆ ಆಗೀಗ ಸ್ವತಂತ್ರ ತಂತ್ರಾಂಶದ ಬಗ್ಗೆ ಒಂದಿಷ್ಟು ಪಾಠವಾಗಿತ್ತು. ಓಂ ಶಿವಪ್ರಕಾಶ್ ಬರೆಯುತ್ತಿದ್ದ ‘ಲಿನಕ್ಸಾಯಣ’ಕ್ಕಂತೂ ನಾನು ಖಾಯಂ ಓದುಗ. ಈ ಮಧ್ಯೆ ಜಗತ್ತಿಗೇ ಸ್ವತಂತ್ರ ತಂತ್ರಾಂಶ ಎಂಬ ಪಾಠ ಕಲಿಸಿದ ರಿಚರ್ಡ್ ಎಂ ಸ್ಟಾಲ್ಮನ್ ಬೆಂಗಳೂರಿಗೆ ಬಂದಿದ್ದಾಗ ಈ ಸ್ವತಂತ್ರ ತಂತ್ರಾಂಶದ ಆಂದೋಲನದ ಜೊತೆಗೆ ನಾನು ಮತ್ತೆ ಮತ್ತೆ ಮುಖಾಮುಖಿಯಾಗಬೇಕಾಯಿತು. ಆಗಲೇ ನನಗೆ ಓಪನ್ ಸಾಫ್ಟ್ ವೇರ್, ಫ್ರೀ ಸಾಫ್ಟ್ ವೇರ್, ಕ್ರಿಯೇಟಿವ್ ಕಾಮನ್ಸ್, ಡಿಸೈನ್ ಸೈನ್ಸ್ ಲೈಸೆನ್ಸ್, ಗ್ನೂ ಲಿನಕ್ಸ್..ಹೀಗೆ ಒಂದೊಂದೇ ಪರಿಚಯವಾಗುತ್ತಾ ಹೋಗಿದ್ದು. ಈ ‘ಕಾಪಿಲೆಫ್ಟ್’ ವಿಕ್ರಂ ವಿನ್ಸೆಂಟ್ ಕಾಪಿ ರೈಟ್ ತಿದ್ದುಪಡಿ ಕಾಯಿದೆಯ ಬಗ್ಗೆ ಹೇಳುವುದು ಏನು ಎಂಬ ಕುತೂಹಲ ನನಗಂತೂ ಇತ್ತು. ಜಗತ್ತು ಒಂದು ದಿಕ್ಕಿನಿಂದ ನೋಡುತ್ತಿರುವಾಗ ಅದನ್ನು ಇನ್ನೊಂದು ದಿಕ್ಕಿನಿಂದ ನೋಡಿದರೆ ಆಶ್ಚರ್ಯವಾಗದೇ ಇರಲು ಹೇಗೆ ಸಾಧ್ಯ? ಹಾಗಾಗಿ ನಾನು ವಿನ್ಸೆಂಟ್ ಗೆ ಫೋನ್ ತಿರುಗಿಸಿಯೇ ಬಿಟ್ಟೆ. ಜಾವೇದ್ ಹೇಳಿದ್ದರಲ್ಲಿ ಏನು ತಪ್ಪಿದೆ ವಿನ್ಸೆಂಟ್? ಎಂದು ಪ್ರಶ್ನಿಸಿದೆ. ಜಯಂತ ಕಾಯ್ಕಿಣಿ ‘ಮುಂಗಾರು ಮಳೆ’ಗೆ ಬರೆದ ಹಾಡಿಗೆ ಅವರಿಗೆ ಸಂಭಾವನೆ ಸಿಕ್ಕಿರಬಹುದು. ಆದರೆ ಅದೇ ಟೆಲಿವಿಷನ್ ನಲ್ಲಿ, ರೇಡಿಯೋದಲ್ಲಿ, ಕೊನೆಗೆ ಮೊಬೈಲ್ ರಿಂಗ್ ಟೋನ್ ಆಗಿ, ಕಾರ್ ರಿವರ್ಸ್ ಗೇರ್ ನ ಎಚ್ಚರಿಕೆಯಾಗಿ, ಎಲ್ಲವೂ ಆಗಿ ಬದಲಾಗುತ್ತಲ್ಲಾ ಅದರ ಮೌಲ್ಯ ಲೆಕ್ಕ ಹಾಕುವವರು ಯಾರು ಎಂದೆ. ಆಗಲೇ ವಿನ್ಸೆಂಟ್ ಹೇಳಿದ್ದು. ‘ಜಾವೇದ್ ಅಕ್ತರ್ ಹೇಳಿರುವುದರಲ್ಲಿ ತಪ್ಪೇನಿಲ್ಲ. ತಿದ್ದುಪಡಿಯಲ್ಲೂ ಒಳ್ಳೆಯದಿಲ್ಲ ಎಂದಲ್ಲ. ಆದರೆ ಇಡೀ ಪ್ರಕರಣದಲ್ಲಿನ ಡಿಜಿಟಲ್ ಕಾಲದ ವೈರುಧ್ಯಗಳು ಅರ್ಥವಾಗಿಲ್ಲ’ ಎಂದು. ಡಿಜಿಟಲ್ ಯುಗದ ಕಬಂಧ ಬಾಹುಗಳು ಯಾರೂ ಅರ್ಥ ಮಾಡಿಕೊಳ್ಳಲಾಗದಷ್ಟು ಬೆಳೆಯುತ್ತಿದೆ ಎಂದು ಗೊತ್ತಾದಾಗಲೇ ಅಮೆರಿಕಾದ ಎಂಐಟಿ ಯಲ್ಲಿ ಕೆಲಸ ಮಾಡುತ್ತಿದ್ದ ಸ್ಟಾಲ್ಮನ್ ತಾವು ಕೆಲಸ ಮಾಡುತ್ತಿದ್ದ ಆರ್ಟಿಫಿಶಿಯಲ್ ಇಂಟಲಿಜೆನ್ಸ್ ಲ್ಯಾಬ್ ನಿಂದ ಸೀದಾ ಎದ್ದು ಹೊರಬಂದದ್ದು. ಇನ್ಫೋಸಿಸ್ ನ ಸಮ್ಮೇಳನ ಸಭಾಂಗಣಕ್ಕೆ ಬಂದ ಇನ್ನೊಬ್ಬ ಚಿಂತಕ ಥಾಮಸ್ ಫ್ರೀಡ್ಮನ್ ಈ ಡಿಜಿಟಲ್ ಯುಗದ ಅಗಾಧ ಸಾಧ್ಯತೆಯನ್ನು ಕಂಡೇ ‘ಭೂಮಿ ಗುಂಡಗಿದೆ’ ಎಂಬ ನಮ್ಮ ನಂಬಿಕೆಯನ್ನು ಅಳಿಸಿಹಾಕುವಂತೆ world is flat ಎಂದು ಉದ್ಘರಿಸಿದ್ದು. ಡಿಜಿಟಲ್ ಜಗತ್ತು ನಮ್ಮ ಎಲ್ಲಾ ಸ್ವಾತಂತ್ರ್ಯವನ್ನು ಕಿತ್ತುಕೊಳ್ಳುತ್ತಿದೆ. ‘ಫೇಸ್ ಬುಕ್ ನಲ್ಲಿ ನೀವು ‘ಲೈಕ್’ ಬಟನ್ ಒತ್ತುವುದರಿಂದ ಹಿಡಿದು, ಮೊಬೈಲ್ ನ ಜಿಪಿಎಸ್ ತಂತ್ರಜ್ಞಾನ ಬಳಸುವುದರಿಂದ ಹಿಡಿದು, ನಿಮ್ಮ ಆಧಾರ್ ಕಾರ್ಡ್ ವರೆಗೆ ನೀವು ನಿಮ್ಮ ಸ್ವಾತಂತ್ರ್ಯವನ್ನು ಕಳೆದುಕೊಳ್ಳುತ್ತಿದ್ದೀರಿ ಎಚ್ಚರ’ ಎಂದಾತ ಈ ಸ್ಟಾಲ್ಮನ್. ಥಾಮಸ್ ಫ್ರೀಡ್ಮನ್ ಈ ಡಿಜಿಟಲ್ ಲೋಕದ ಅನಂತ ಸಾಧ್ಯತೆಗಳನ್ನು ತೆರೆದಿಡುತ್ತಾ ಹೋದರೆ ಸ್ಟಾಲ್ಮನ್ ಇದೇ ಲೋಕ ಸ್ವಾತಂತ್ರ್ಯ ಹರಣ ಮಾಡುವುದನ್ನು ಬಿಚ್ಚಿಡುತ್ತಾ ಹೋದರು. ಇದಕ್ಕೆ ಅವರು ಮುಖ್ಯ ಗುರಿಯಾಗಿಸಿಕೊಂದದ್ದು ಸಾಫ್ಟ್ ವೇರ್ ಅನ್ನು. ‘ಸಾಫ್ಟ್ ವೇರ್ ಮಾಲೀಕರು ನಮ್ಮನ್ನು ಒಡೆಯುವ ಗೋಡೆಗಳನ್ನು ನಿರ್ಮಿಸುತ್ತಿದ್ದಾರೆ’ ಎಂದು ಎಚ್ಚರಿಸಿದ ಸ್ಟಾಲ್ಮನ್ ಆ ಕಾರಣಕ್ಕಾಗಿಯೇ ಸ್ವತಂತ್ರ ತಂತ್ರಾಂಶದ ಬಗ್ಗೆ ಜಗತ್ತನ್ನು ಅಣಿನೆರಸಲು ಆರಂಭಿಸಿದರು. ಸ್ವತಂತ್ರ ತಂತ್ರಾಂಶ ಎನ್ನುವುದು ಸ್ವಾತಂತ್ರ್ಯದ ವಿಷಯ ಎಂದು ಒತ್ತಿ ಹೇಳಿದ ಅವರು ಜಗತ್ತು ಕಂಪ್ಯೂಟರೀಕರಣಗೊಳ್ಳುತ್ತಾ ಹೋಗುತ್ತಿರುವ ವೇಗವನ್ನು ನೋಡಿದರೆ ಅಷ್ಟೇ ವೇಗದಲ್ಲಿ ನಾವು ಸ್ವಾತಂತ್ರವನ್ನೂ ಉಳಿಸಿಕೊಳ್ಳಬೇಕಾದ ತುರ್ತು ಇದೆ ಎಂದರು. ಜಗತ್ತಿನ ಜ್ಞಾನದ ಮೇಲೆ ಯಾರು ತಾನೇ ಹಕ್ಕು ಸಾಧಿಸಲು ಸಾಧ್ಯ? ಎನ್ನುವ ಆಶಯವೇ ಸ್ವತಂತ್ರ ತಂತ್ರಾಂಶದ ಆಂದೋಲನಕ್ಕೆ ಕಾರಣವಾಗಿದೆ. ಜ್ಞಾನ ಎನ್ನುವುದು ಪ್ರತಿಯೊಬ್ಬರ ಕೈಗೂ ಎಟುಕಬೇಕು. ಅದು ಜಗತ್ತನ್ನು ಒಂದೊಂದೇ ಹೆಜ್ಜೆ ಮುಂದೆ ಕೊಂಡೊಯ್ಯಲು ಕಾರಣವಾಗಬೇಕು. ಆ ಬದಲು ಈ ಜ್ಞಾನವನ್ನು ತಮ್ಮ ಮುಷ್ಟಿಯೊಳಗೆ ಹಿಡಿದಿಟ್ಟುಕೊಳ್ಳಲು ಬಯಸಿದರೆ ಅದಕ್ಕೆ ಅವಕಾಶ ನೀಡಲು ಹೇಗೆ ಸಾಧ್ಯ? ಎಂದು ಕೇಳುತ್ತಾರೆ ಸ್ವತಂತ್ರ ತಂತ್ರಾಂಶದ ಆಂದೋಲನದ ರೂವಾರಿಗಳು. ಜ್ಞಾನವನ್ನು ಬಂಧಿಸಿಡುವ ಬೀಗಗಳು ಹೆಚ್ಚಾಗುತ್ತಿವೆ. ನಮ್ಮ ಜ್ಞಾನಕ್ಕೆ ಬೀಗ ಜಡಿಯಲಾಗಿದೆ ಎನ್ನುವುದೂ ಗೊತ್ತಾಗಲು ಸಾಧ್ಯವಿಲ್ಲದಂತೆ ವ್ಯವಸ್ಥೆ ರೂಪಿಸಲಾಗಿದೆ ಎನ್ನುತ್ತಾರೆ. ಆದಿಮಾನವರು ಗುಹೆಗಳಲ್ಲಿ ಬರೆದಿಟ್ಟ ಚಿತ್ರಗಳನ್ನು ನೋಡಿ. ಅದು ಸಂದೇಶ ಸಾರುತ್ತಿದೆ. ಯಾವ ಸಂದೇಶ ಎನ್ನುವುದು ಮಾತ್ರ ನಮಗೆ ಗೊತ್ತಿಲ್ಲ. ಏಕೆಂದರೆ ಆದಿಮಾನವರು ಬರೆದ ಈ ಚಿತ್ರ ಎಂಬ ಪ್ರೋಗ್ರಾಮ್ ಅನ್ನು ಬಿಡಿಸಿ ಓದುವ ಡೀಕೋಡರ್ ನಮಗೆ ನೀಡಲಿಲ್ಲ. ಹಾಗಾಗಿ ನಮ್ಮ ಬಳಿ ಇರುವುದು ಚಿತ್ರ ಮಾತ್ರ. ಜ್ಞಾನವಲ್ಲ. ಈಗ ಆಗಿರುವುದೂ ಅದೇ. ನಮ್ಮ ಕೈನಲ್ಲಿ ಈ ಡಿಜಿಟಲ್ ಯಜಮಾನರುಗಳು ಚಿತ್ರಗಳನ್ನಿಟ್ಟಿದ್ದಾರೆ. ಅದನ್ನು ಓದುವ ವಿಧಾನವನ್ನು ತಮ್ಮ ಬಳಿಯೇ ಬಚ್ಚಿಟ್ಟುಕೊಂಡಿದ್ದಾರೆ. ಹಾಗಾಗಿ ಜ್ಞಾನ ಎನ್ನುವುದು ಅವರ ಕೈನಲ್ಲಿಯೇ ಇದೆ. ಹಾಗಾಗಿಯೇ ಈ ಜ್ಞಾನವನ್ನು ಜನರ ಕೈಗಿಡುವುದೇ ಫ್ರೀ ಸಾಫ್ಟ್ ವೇರ್ ಆಂದೋಲನ. ಫ್ರೀ ಸಾಫ್ಟ್ ವೇರ್ ಎನ್ನುವ ಹೆಸರಿನಲ್ಲಿ ಇರುವ ‘ಫ್ರೀ’ ಎನ್ನುವುದು ಎಲ್ಲರನ್ನೂ ಗೊಂದಲಕ್ಕೆ ದೂಡಿದೆ. ಎಷ್ಟೋ ಮಂದಿ ಫ್ರೀ ಎಂದರೆ ಉಚಿತ, ಉಚಿತವಾಗಿ ಸಿಗುವ ತಂತ್ರಾಂಶ ಎಂದು ತಿಳಿದುಕೊಂಡಿರುವವರೇ ಹೆಚ್ಚು. ಅದು ಹಾಗಲ್ಲ. ಇದು free speech ನಲ್ಲಿರುವ ಫ್ರೀ. ಇದು ಯಾರೋ ಕೆಲವರ ಕೈಗಳಲ್ಲಿ ಬಂಧಿಯಾಗಿರುವ ತಂತ್ರಾಂಶವನ್ನು ಅವರಿಂದ ಬಿಡಿಸುವ ಹೋರಾಟ. ತಂತ್ರಾಂಶದ ಉಗಮ, ವಿಕಾಸ ನೋಡಿದರೂ ಸಹಾ ತಂತ್ರಾಂಶ ಎನ್ನುವುದು ಮೊದಲಿನಿಂದಲೂ ಉಚಿತವಾಗಿ ಹಂಚಿಕೊಳ್ಳುವ, ತಿದ್ದುಪಡಿ ಮಾಡಿಕೊಳ್ಳುವ ಸ್ವಾತಂತ್ರ್ಯವನು ಹೊಂದಿತ್ತು. ಯಾರೋ ರೂಪಿಸಿದ ತಂತ್ರಾಂಶವನ್ನು ಎಲ್ಲರೂ ಹಂಚಿಕೊಳ್ಳುತ್ತಿದ್ದರು. ಅದನ್ನು ತಮಗೆ ಬೇಕಾದಂತೆ ತಿದ್ದುಪದಿಮಾಡಿಕೊಳ್ಳುತ್ತಿದ್ದರು. ಅದನ್ನು ಬೆಳೆಸುತ್ತಿದ್ದರು. ಅದರ ಫಲವನ್ನು ಎಲ್ಲರೂ ಉಣ್ಣುತ್ತಿದ್ದರು. ಆದರೆ 1970 ರ ನಂತರ ತಂತ್ರಾಂಶ ಕೆಲವರ ಕೈನಲ್ಲಿ ಸೇರುತ್ತಾ ಹೋಯಿತು. ತಿದ್ದುಪಡಿ ಮಾಡುವ ಮಾತು ಬಿಡಿ, ಅದನ್ನು ಹಂಚಿಕೊಳ್ಳದಂತೆಯೂ ಕೈ ಕಟ್ಟಿ ಹಾಕಲಾಯಿತು. 80ರ ನಂತರವಂತೂ ಇದು ಸಾಫ್ಟ್ ವೇರ್ ದೈತ್ಯ ಕಂಪನಿಗಳ ಮುಷ್ಟಿಯಲ್ಲಿ ಸಿಕ್ಕು ಹೋಯಿತು. ಒಂದೆಡೆ ಶರವೇಗದಲ್ಲಿ ಬೆಳೆಯುತ್ತಿರುವ ಸೈಬರ್ ಲೋಕ, ಇನ್ನೊಂದೆಡೆ ಇದರ ಕಿಟಕಿ ಬಾಗಿಲು ಕೆಲವೇ ಜನರ ಕೈನಲ್ಲಿ. ಒಂದು ನಿಮಿಷದೊಳಗೆ ಇಂಟರ್ ನೆಟ್ ಜಗತ್ತಿನೊಳಗೆ ಆಗುವ ಕೆಲಸ ಗೊತ್ತಾದರೆ ತಂತ್ರಾಂಶ ಸ್ವತಂತ್ರವಾಗಬೇಕಿರುವುದು ಏಕೆ ಎನ್ನುವುದರ ಸ್ಪಷ್ಟತೆ ಸಿಗುತ್ತದೆ. ಒಂದೇ ಒಂದು ನಿಮಿಷದಲ್ಲಿ 2.77 ಲಕ್ಷ ಮಂದಿ ಫೇಸ್ ಬುಕ್ ನೊಳಗೆ ಪ್ರವೇಶಿಸುತ್ತಾರೆ. ಅದೇ ಒಂದು ನಿಮಿಷದಲ್ಲಿ ಗೂಗಲ್ ನಲ್ಲಿ 2 ಮಿಲಿಯ ವಿಷಯಗಳ ಹುಡುಕಾಟ ನಡೆಯುತ್ತದೆ. ಅದೇ ನಿಮಿಷದಲ್ಲಿ 1.3 ಮಿಲಿಯ ವಿಡಿಯೋ ವೀಕ್ಷಣೆಯಾಗಿರುತ್ತದೆ. ಇದೇ ಒಂದು ನಿಮಿಷದಲ್ಲಿ 204 ಮಿಲಿಯ ಮೇಲ್ ಗಳು ಓಡಾಡಿರುತ್ತದೆ. ಸ್ವತಂತ್ರ ತಂತ್ರಾಂಶ ಎನ್ನುವುದು ಮುಕ್ತ ತಂತ್ರಾಂಶವಲ್ಲ ಎನ್ನುವುದನ್ನು ಮತ್ತೆ ಮತ್ತೆ ಈ ಆಂದೋಲನಕಾರರು ಒತ್ತಿ ಹೇಳುತ್ತಾರೆ. ಒಂದೆಡೆ ಇಡೀ ತಂತ್ರಾಂಶವನ್ನು ತಮ್ಮ ಬಳಿ ಇಟ್ಟುಕೊಂಡ ಯಜಮಾನರು, ಇನ್ನೊಂದೆಡೆ ಅದು ಮುಕ್ತವಾಗಿ ಬೇಕಾದರೆ ಇರಲಿ ಆದರೆ ಲಾಭ ಇರಲಿ ಎನ್ನುವವರು, ಈ ಎರಡಕ್ಕಿಂತ ಭಿನ್ನವಾಗಿ ಜ್ಞಾನವನ್ನು ಹರಡಬೇಕು, ಹಂಚಿಕೊಳ್ಳಬೇಕು ಎನ್ನುವ ಸ್ವತಂತ್ರ ತಂತ್ರಾಂಶ. ಕಾಪಿ ಲೆಫ್ಟ್ ಆಗಲೀ, ಕ್ರಿಯೇಟಿವ್ ಕಾಮನ್ಸ್ ಆಗಲೀ, ಡಿಸೈನ್ ಸೈನ್ಸ್ ಲೈಸೆನ್ಸ್ ಆಗಲೀ ಎಲ್ಲವೂ ಜ್ಞಾನದ ಪ್ರಸಾರಕ್ಕೆ ಒತ್ತುಕೊಟ್ಟ ಒಂದೇ ಆಂದೋಲನದ ವಿವಿಧ ಅಂಗಗಳು. ಇಷ್ಟೆಲ್ಲಾ ಆದರೂ ನನಗೆ ವಿನ್ಸೆಂಟ್ ಬಳಿ ಮಾತು ತೀರಿರಲಿಲ್ಲ. ಬರಹವನ್ನೇ ನಂಬಿರುವ ಜಾವೆದ್ ಅಕ್ತರ್, ಜಯಂತ ಕಾಯ್ಕಿಣಿಗೆ ಈ ಕಾಪಿ ಲೆಫ್ಟ್ ನಿಂದ ಉಪಯೋಗ ಆಗುವುದಾದರೂ ಹೇಗೆ ಎಂದು ಕೇಳಿದೆ. ಆಗಲೇ ಅವರು ‘ಕಾಪಿ ಲೆಫ್ಟ್ ಅಂದರೆ ಮತ್ತೆ ಉಚಿತವಾದದ್ದು ಎನ್ನುವ ಕಲ್ಪನೆಯಿಂದ ಆಚೆ ಬನ್ನಿ. ಕಾಪಿ ಲೆಫ್ಟ್ ಜ್ಞಾನದ ಪ್ರಸಾರಕ್ಕೆ ಒತ್ತು ಕೊಡುತ್ತದೆ, ಆದರೆ ಸಂಭಾವನೆ ಬರುವ ಮಾರ್ಗಗಳನ್ನು ಮುಚ್ಚುವುದಿಲ್ಲ’ ಎಂದರು. ನಾಗರಾಜ ವಸ್ತಾರೆಯವರ ಹೊಸ ಕಥಾ ಸಂಕಲನ ‘ನಿರವಯವ’ ಓದಿ ಇತ್ತೀಚೆಗೆ ಕೆಳಗಿಟ್ಟೆ. ಇಡೀ ಜಗತ್ತು ಒಂದು ಪ್ರೋಗ್ರಾಮ್. ಎಲ್ಲವೂ ಆ ಪ್ರೋಗ್ರಾಮ್ ನಂತೆ ನಡೆಯುತ್ತದೆ ಎನ್ನುವ ದನಿ ಅದರಲ್ಲಿ ಹೊರಡುತ್ತದೆ. ಇದೇ ಪ್ರೋಗ್ರಾಮ್ ಪ್ರಕಾರವೇ ಈ ಲೆಫ್ಟ್, ರೈಟ್ ವಿವಾದವೂ ಎದ್ದಿರಬಹುದೇ..?]]>

‍ಲೇಖಕರು G

June 20, 2012

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ದೇವನೂರು ಎಂಬ ‘ಜೋತಮ್ಮ’

ದೇವನೂರು ಎಂಬ ‘ಜೋತಮ್ಮ’

ಜಿ ಎನ್ ಮೋಹನ್ ಅದು ಮಾಧ್ಯಮ ಕುರಿತು ರಾಷ್ಟ್ರೀಯ ವಿಚಾರ ಸಂಕಿರಣ. ದೇಶದ ಪ್ರತಿಷ್ಠಿತ ಮಾಧ್ಯಮ ಕಾಲೇಜುಗಳ ಗಣ್ಯರು ನೆರೆದಿದ್ದರು. ಮಾಧ್ಯಮ...

‘ಎದೆ ತುಂಬಿ ಹಾಡಿದ’ ಎಸ್ ಪಿ ಸರ್…

‘ಎದೆ ತುಂಬಿ ಹಾಡಿದ’ ಎಸ್ ಪಿ ಸರ್…

-ಜಿ ಎನ್ ಮೋಹನ್ 'ಇದು ಕೇಳೋ ಪ್ರಶ್ನೆನಾ..' ಅಂತ ಗದರಿದ ದನಿಯಲ್ಲೇ ಕೇಳಿದೆ. ಎಸ್ ಪಿ ಬಾಲಸುಬ್ರಮಣ್ಯಂ ಅವರ 'ಎದೆ ತುಂಬಿ...

2 ಪ್ರತಿಕ್ರಿಯೆಗಳು

  1. D.RAVI VARMA

    ಡಿಜಿಟಲ್ ಜಗತ್ತು ನಮ್ಮ ಎಲ್ಲಾ ಸ್ವಾತಂತ್ರ್ಯವನ್ನು ಕಿತ್ತುಕೊಳ್ಳುತ್ತಿದೆ. ‘ಫೇಸ್ ಬುಕ್ ನಲ್ಲಿ ನೀವು ‘ಲೈಕ್’ ಬಟನ್ ಒತ್ತುವುದರಿಂದ ಹಿಡಿದು, ಮೊಬೈಲ್ ನ ಜಿಪಿಎಸ್ ತಂತ್ರಜ್ಞಾನ ಬಳಸುವುದರಿಂದ ಹಿಡಿದು, ನಿಮ್ಮ ಆಧಾರ್ ಕಾರ್ಡ್ ವರೆಗೆ ನೀವು ನಿಮ್ಮ ಸ್ವಾತಂತ್ರ್ಯವನ್ನು ಕಳೆದುಕೊಳ್ಳುತ್ತಿದ್ದೀರಿ ಎಚ್ಚರ’ ಎಂದಾತ ಈ ಸ್ಟಾಲ್ಮನ್. ಥಾಮಸ್ ಫ್ರೀಡ್ಮನ್ ಈ ಡಿಜಿಟಲ್ ಲೋಕದ ಅನಂತ ಸಾಧ್ಯತೆಗಳನ್ನು ತೆರೆದಿಡುತ್ತಾ ಹೋದರೆ ಸ್ಟಾಲ್ಮನ್ ಇದೇ ಲೋಕ ಸ್ವಾತಂತ್ರ್ಯ ಹರಣ ಮಾಡುವುದನ್ನು ಬಿಚ್ಚಿಡುತ್ತಾ ಹೋದರು. ಇದಕ್ಕೆ ಅವರು ಮುಖ್ಯ ಗುರಿಯಾಗಿಸಿಕೊಂದದ್ದು ಸಾಫ್ಟ್ ವೇರ್ ಅನ್ನು.
    ಜಗತ್ತಿನ ಜ್ಞಾನದ ಮೇಲೆ ಯಾರು ತಾನೇ ಹಕ್ಕು ಸಾಧಿಸಲು ಸಾಧ್ಯ? ಎನ್ನುವ ಆಶಯವೇ ಸ್ವತಂತ್ರ ತಂತ್ರಾಂಶದ ಆಂದೋಲನಕ್ಕೆ ಕಾರಣವಾಗಿದೆ. ಜ್ಞಾನ ಎನ್ನುವುದು ಪ್ರತಿಯೊಬ್ಬರ ಕೈಗೂ ಎಟುಕಬೇಕು. ಅದು ಜಗತ್ತನ್ನು ಒಂದೊಂದೇ ಹೆಜ್ಜೆ ಮುಂದೆ ಕೊಂಡೊಯ್ಯಲು ಕಾರಣವಾಗಬೇಕು. ಆ ಬದಲು ಈ ಜ್ಞಾನವನ್ನು ತಮ್ಮ ಮುಷ್ಟಿಯೊಳಗೆ ಹಿಡಿದಿಟ್ಟುಕೊಳ್ಳಲು ಬಯಸಿದರೆ ಅದಕ್ಕೆ ಅವಕಾಶ ನೀಡಲು ಹೇಗೆ ಸಾಧ್ಯ? ಎಂದು ಕೇಳುತ್ತಾರೆ ಸ್ವತಂತ್ರ ತಂತ್ರಾಂಶದ ಆಂದೋಲನದ ರೂವಾರಿಗಳು. ಜ್ಞಾನವನ್ನು ಬಂಧಿಸಿಡುವ ಬೀಗಗಳು ಹೆಚ್ಚಾಗುತ್ತಿವೆ. ನಮ್ಮ ಜ್ಞಾನಕ್ಕೆ ಬೀಗ ಜಡಿಯಲಾಗಿದೆ ಎನ್ನುವುದೂ ಗೊತ್ತಾಗಲು ಸಾಧ್ಯವಿಲ್ಲದಂತೆ ವ್ಯವಸ್ಥೆ ರೂಪಿಸಲಾಗಿದೆ ಎನ್ನುತ್ತಾರೆ.
    ಜಗತ್ತಿನ ಜ್ಞಾನದ ಮೇಲೆ ಯಾರು ತಾನೇ ಹಕ್ಕು ಸಾಧಿಸಲು ಸಾಧ್ಯ? ಎನ್ನುವ ಆಶಯವೇ ಸ್ವತಂತ್ರ ತಂತ್ರಾಂಶದ ಆಂದೋಲನಕ್ಕೆ ಕಾರಣವಾಗಿದೆ. ಜ್ಞಾನ ಎನ್ನುವುದು ಪ್ರತಿಯೊಬ್ಬರ ಕೈಗೂ ಎಟುಕಬೇಕು. ಅದು ಜಗತ್ತನ್ನು ಒಂದೊಂದೇ ಹೆಜ್ಜೆ ಮುಂದೆ ಕೊಂಡೊಯ್ಯಲು ಕಾರಣವಾಗಬೇಕು. ಆ ಬದಲು ಈ ಜ್ಞಾನವನ್ನು ತಮ್ಮ ಮುಷ್ಟಿಯೊಳಗೆ ಹಿಡಿದಿಟ್ಟುಕೊಳ್ಳಲು ಬಯಸಿದರೆ ಅದಕ್ಕೆ ಅವಕಾಶ ನೀಡಲು ಹೇಗೆ ಸಾಧ್ಯ? ಎಂದು ಕೇಳುತ್ತಾರೆ ಸ್ವತಂತ್ರ ತಂತ್ರಾಂಶದ ಆಂದೋಲನದ ರೂವಾರಿಗಳು. ಜ್ಞಾನವನ್ನು ಬಂಧಿಸಿಡುವ ಬೀಗಗಳು ಹೆಚ್ಚಾಗುತ್ತಿವೆ. ನಮ್ಮ ಜ್ಞಾನಕ್ಕೆ ಬೀಗ ಜಡಿಯಲಾಗಿದೆ ಎನ್ನುವುದೂ ಗೊತ್ತಾಗಲು ಸಾಧ್ಯವಿಲ್ಲದಂತೆ ವ್ಯವಸ್ಥೆ ರೂಪಿಸಲಾಗಿದೆ ಎನ್ನುತ್ತಾರೆ.
    ಸರ್, ನಮಸ್ಕಾರ. ಕಳೆದ ವರ್ಷದಿಂದ ನಾನು ಸೃಜನ್ ಗೆಳೆಯನಿಂದಾಗಿ ಈ ಅವಧಿ,ಕೆಂಡಸಂಪಿಗೆ ,ಓದುವುದನ್ನು ಕಲಿತೆ, ಹಾಗೆ ನೋಡಿದ್ರೆ ನಾನು ಎಂ,ಕಾಮ್, ಮಾಡಿ ಒಂದೆರಡು ವರ್ಷ ಉಪಾನ್ಯಸಕನ್ನಗಿ ಕೆಲಸ ಮಾಡಿದ್ದರು ಈ ತಂತ್ರಜ್ಞಾನದ ಬಗ್ಗೆ ಏನನ್ನು ತಿಳಿದು ಕೊಂಡಿರಲಿಲ್ಲ, ಆದರೆ ಆ ದಿನಗಳಲ್ಲಿ ಇದು ಇನ್ನು ತನ್ನ ಕಬಂಧ ಬಾಹುಗಳನ್ನುಇಸ್ಟೊಂದು ವ್ಯಾಪಿಸಿಕೊಂಡಿರಲಿಲ್ಲ, ಈಗ ನಿಮ್ಮ ಲೇಖನ ಓದುತಿದ್ದಂತೆ ಮೈ ಜುಮ್ಮೆನ್ನುತ್ತಿದೆ, ಒಂದರ್ಥದಲ್ಲಿ ಭಯವುಆವರಿಸಿಕೊಳ್ಳುತ್ತಿದೆ .ರವಿವಾರದ ಸಂಡೇ ಎಕ್ಷ್ಪ್ರೆಸ್ಸ ನಲ್ಲಿ “ಅ land without facebook ” ಓದಿದ್ದೆ,ಅದು ladaak ನ ಫೋಟೋಗ್ರಫಿ ಬಗ್ಗೆ ಇದೆ, ಈಗ ನಿಮ್ಮ ಲೇಖನ ಓದುತಿದ್ದಂತೆ ನನಗೆ ದಿಕ್ಕೇ ತೋಚದಂತಾಗಿದೆ, ಇಲ್ಲಿ ಜಾವೇದ್ ಅಕ್ತರ್, ವಿಕ್ರಂ ವಿನ್ಸೆಂಟ್, ಥೋಮಸ್ ಫ್ರೀಡ್ಮನ್ ಇವರ ಚಿಂತನೆಗಳು ನಮ್ಮ ಸಾಫ್ಟ್ವೇರ್ ಓದುವ ಹುಡುಗರಿಗೆ ತಲುಪುವುದಾದರೂ ಹೇಗೆ, ಈ freesoftwareಚಿಂತನೆಯನ್ನು ಇವರಿಗೆ ತಲುಪಿಸುವವರಾದರು ಯಾರು, “ಸಾಫ್ಟ್ವೇರ್ ಮಾಲೀಕರು ನಮ್ಮನ್ನು ಒಡೆಯುವ ಗೋಡೆಗಳನ್ನು ನಿರ್ಮಿಸುತ್ತಿದ್ದಾರೆ ” ಎಂದು ಎಚ್ಚರಿಸುತ್ತಿರುವ ಸ್ಟಾಲ್ಮನ್ ಅವರ ಅಳಲನ್ನು ,ಚಿಂತನೆಯನ್ನು ಈ ಯುವ ಸಾಫ್ಟ್ವೇರ್ ಜನಾಂಗಕ್ಕೆ ತಿಳಿಯುವುದಾದರೂ ಹೇಗೆ, ಇವೆಲ್ಲ ನನಗೆ ಕಾಡುತ್ತಿವೆ, ಇಸ್ಟೆಲ್ಲಾ ಬರೆಯುವಾಗ ಅಪ್ಪ ಸ್ವಲ್ಪ ಸಿಸ್ಟಮ್ ಬಿಡು ನಿನ್ನೆ ನನ್ನ ಬರ್ತ್ಡೇ wishes facebook ನೋಡಬೇಕು ಅನ್ನುತಿದ್ದಾಳೆ . ನನಗೆ ಒಂದು ರೀತಿಯ ಗೊಂದಲ ಸುರುವಾಗಿದೆ, ಆಕೆಗೆ ನಿಮ್ಮ ಲೇಖನ ಓದು ಎಂದೆ, ಆಯ್ತೆಳಪ್ಪ ಆಮೇಲೆ ನೋಡ್ತೀನಿ ಎಂದು ಹೇಳಿ ಹೋದಳು, ನಿಜ ಹೇಳಬೇಕೆಂದರೆ ನನಗೆ ಗೊಂದಲದ ಗೂಡಾಗಿರುವ ಈ ಸ್ಥಿತಿ enginearing ಓದುವ ಅವಳಿಗೆ ಅರ್ಥವಾದೀತೆ,
    ಸರ್, ಈ ಲೇಖನವನ್ನು ಮತ್ತೆ ಮತ್ತೆ ಓದುವೆ, ನಾನು ಈ ಎಚ್ಚ್ಚರಿಕೆಯ ,ಹಾಗು ಅಸ್ತೆ ಘಮ್ಬೀರವಾದ ವಿಷಯದ ಬಗ್ಗೆ ಬೆಳಕು ಚೆಲ್ಲಿದ ತಮಗೆ ನಾನು ಋಣಿ .
    ನನಗೆ ಶ್ರೀ,ಶ್ರೀ, ಒಂದು ಹಾಡು ನೆನಪು ಬರ್ತಿದೆ,
    “ಯವೊರೋ ವಸ್ತರನಿ,ಎದೋ ಚೆಸ್ತಾರನಿ,ಎದುರು ಚೂಸಿ ,ಮೊಸಪೋಕುಮಾ ,ನಿಜಂ,ಮರೆಚಿ ನಿದ್ರಪೋಕುಮಾ ”
    ಯಾರೋ ಬರುತ್ತಾರೆ,ಏನೋ ಮಾಡುತ್ತಾರೆ ,ಎಂದು ಎದುರುನೋಡಿ ಮೊಸಹೊಗಬೇಡ ,ನಿಜವನ್ನು ಮರೆತು ನಿದ್ರಿಸಬೇಡ ” ಈ ಎಚ್ಚರಿಕೆ ಹಾಡು ಮನದಲ್ಲಿ ಕಾಡುತ್ತಿದೆ.
    ರವಿ ವರ್ಮ ಹೊಸಪೇಟೆ .

    ಪ್ರತಿಕ್ರಿಯೆ
  2. ESSKAY

    ಮೋಹನ್ ಸರ್,
    ರಿಚರ್ಡ್ ಸ್ಟಾಲ್ಮನ್ , ಥಾಮಸ್ ಫ್ರೀಡ್ಮನ್ , ವಿಕ್ರಮ್ ವಿನ್ಸಂಟ್, ರವಿವರ್ಮಾ ಇವರೆಲ್ಲರ ಕಾಳಜಿಯ ಬಗ್ಗೆ ನಿಜವಾಗಿಯೂ ನಾವೆಲ್ಲರೂ ಯೋಚಿಸಬೇಕಿದೆ. ಇದನ್ನು ಎಲ್ಲರಿಗೂ ಮನದಟ್ಟಾಗುವಂತೆ ತಿಳಿ ಹೇಳಬೇಕಾಗಿದೆ , ಬಹು ಮುಖ್ಯವಾಗಿ ಇಂದಿನ ಜನಾಂಗಕ್ಕೆ ತಿಳಿಸುವುದು ಹೇಗೆ ?.
    ನಿಮ್ಮ ಲೇಖನ ನಮ್ಮನ್ನು ಈ ನಿಟ್ಟಿನಲ್ಲಿ ಯೋಚಿಸುವಂತೆ ಮಾಡಿದೆ, ಧನ್ಯವಾದಗಳು.
    – ಸುನೀಲ್ ಕೇಳ್ಕರ್

    ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: