ಕಿಚ್ಚssದ ಜಳಕ ನಿನ ಬಾಗ್ಯೆs

ಭುವನಾ ಹಿರೇಮಠ

ಹೊತ್ತೇರಿ ಮಾರಿ ತೊಳಿಬ್ಯಾಡ ಹೆಣ್ಣss
ಗುಟ್ಟೀಲೆ ನೀರ ಕುಡಿಬ್ಯಾಡ| ಅಂಗಳಕ
ದಿಟ್ಟಿsಯ ನೆಟ್ಟು ನಿಲಬ್ಯಾಡss

ಮಗ್ಗಲದ ಮುಳ್ಳ ಮರಿಬ್ಯಾಡ ಹೆಣ್ಣss
ಮಲ್ಲೀಗಿ ಹೂವ ಮುಡಿಬ್ಯಾಡ| ಹೊಳ್ಳೆಳ್ಳೆ
ನೀರೊಳಿ ನೀರಾಗ ಜಿಗಿಬ್ಯಾಡ

ಕುಂತsರ ಕುಣಿಬ್ಯಾಡ ಎದ್ದsರ ಮಣಿಬ್ಯಾಡ
ಕಣ್ಣೀಯ ಮಲುವ ಮರಿಬ್ಯಾಡ| ಹೆಣ್ಣ
ನಸಗುಣಕಿ ಬಲಿಗೆ ಬಿಳಬ್ಯಾಡss

ಕುಂಬೀಯ ಮ್ಯಾಲೊಂದು ಕುಂಭದ ಕುಡಕಿ
ನವಿಲಿsನ ಗರಿಯ ಇಡಬ್ಯಾಡ| ಮಲಿಕಟ್ಟ
ಮರವೀಲೆ ತಿರವಿ ನಿಲಬ್ಯಾಡss

ಮಣಕಾಲ ತೆಳಗ ನಿನ ಅರವು ಹೆಣ್ಣ
ಮಣಕೈಯ್ಯ ಕೆಳಗ ನಿನ ಬಳಿಯ| ನೆಲದಾಕಿ
ಗುಡ್ಡssದ ಸರಿಸಮ ನಿಲಬ್ಯಾಡss

ಹಂದರದ ಪೂಜಿಗೆ ಕಂದರದ ಕಣವಿsಗೆ
ಮುತ್ತೋದಿ ಕಂಬsದ ಕಂಕಣಕ| ಕೈಕೊಟ್ಟು
ತಲಿಬಾಗಿ ದಂಡೋತು ಹಾಕಬೇಕ| ಕುಂತಲ್ಲೆ
ಕಿಚ್ಚssದ ಜಳಕ ನಿನ ಬಾಗ್ಯೆs
ಕಿಚ್ಚssದ ಜಳಕ ನಿನ್ನೈಸಿರಿಯೆs

ಸಿವನೇ ಮಾದೇವ

ಆ ಸೀಮೆಯ ಹಣೆಗೆ ಐದೂ ಬೆರಳಿಟ್ಟು
ಸಿವನೇ ಮಾದೇವಾ ಎಂದು ನಡೆದು ಹೋಗುವ
ಭವಿಷ್ಯದ ಮುದುಕಿ ನಾನು
ಆವಾಗಲೂ ನಾಲಿಗೆ ಹಲ್ಲೊಳಗೇ ಅಡಗಿರುತ್ತದಾ
ಸಿವನೇ ಬಲ್ಲ ಮಾದೇವಾ ನನ್ನಿಂದ ದೂರ ದೂರ

ಆ ಹಾಸುಗಲ್ಲಿನ ಮೇಲೆ ಅಂಗಾತ ಮಲಗಿ
ಸಿವನೇ ಮಾದೇವಾ ಎಂದು ಜಪಿಸುತ್ತಲೇ
ಸೆರಗನೆ ಹೊದ್ದು ನಿದ್ದೆಗೆ ಜಾರುವ
ಭವಿಷ್ಯದ ಅರೆವಯಸ್ಸಿನ ಹೆಂಗಸು ನಾನು
ಆವಾಗಲೂ ನನ್ನ ಕಣ್ಣುಗಳು ದಿಕ್ಕು ಮರೆತಾವೆ
ಸಿವನೇ ಬಲ್ಲ ಮಾದೇವ ನನ್ನಿಂದ ದೂರ ದೂರ

ಈ ಹಾಸಿಗೆಯ ನೆಚ್ಚಿಕೊಂಡು
ನಿನ್ನ ತುದಿಬೆರಳ ಕೂಟದಲಿ ಮುಲುಕುವ
ಅರೆಬೆಂದ ಹೆಂಗಸು ನಾನು
ಈ ಹಸಿಬಿಸಿ ಇನ್ನೆಷ್ಟು ದಿನ
ಇದನ್ನೂ ಸಿವನೇ ಬಲ್ಲನೊ
ಮಾದೇವ ಹತ್ತಿರದಲ್ಲೆ ಇರುವಾಗ

ಹೆಂಗಸು ಬೇಯಬಾರದು ಒಳಗೆ
ಹಸಿಬಿಸಿಯಾಗಿರಬಾರದು ಹೊರಗೆ

ಅರೆವಯಸ್ಸಿನಲಿ ಹೆರಬಾರದು ಹೊರಗೆ
ಅರಳುತ್ತ ಹೊರಳುತ್ತಿರಬೇಕು ಒಳಗೊಳಗೆ

ಮುಪ್ಪಿನಲಿ ಮುದುಕಿ ಮಾಗಬೇಕು ಹೊರಗೆ
ಹಲ್ಲು ಬೀಳದಿದ್ದರೂ ಬಾಯೊಳಗೆ

ಸಿವನೂ ದೂರ ದೂರ
ಮಾದೇವನೂ ದೂರ ದೂರ
ಎದ್ದರೂ ಕುಂತರೂ
ಸಿವನೇ ಮಾದೇವ

‍ಲೇಖಕರು Avadhi

September 13, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಲೋಕದ ಕಣ್ಣು ಮರುಗಲೂಬಹುದು!

ಲೋಕದ ಕಣ್ಣು ಮರುಗಲೂಬಹುದು!

ಕೆ.ಜೆ.ಕೊಟ್ರಗೌಡ ತೂಲಹಳ್ಳಿ ಊರ ಬಯಲಿನ ದಿಬ್ಬದ ಮೇಲೆಈ ಮಳೆಗಾಲಕ್ಕೆಚಿಗುರೊಡೆದ ಹುಲ್ಲು ಗಂಬಳಿಯಹಾಸಿನಲಿನಾವಿಬ್ಬರೇ ಸಾನಿಧ್ಯವಹಿಸೋಣಅದೆಷ್ಟು...

ಸ್ಯಾನಿಟೈಜ್ ಆಗಬೇಕಾಗಿದೆ ಹೃದಯ

ಸ್ಯಾನಿಟೈಜ್ ಆಗಬೇಕಾಗಿದೆ ಹೃದಯ

ರಾಘವೇಂದ್ರ ದೇಶಪಾಂಡೆ ವಯಸ್ಸೊಂದಿತ್ತು ಆ ದಿನಗಳಲ್ಲಿಜಾದೂವಿನಲ್ಲು ನಂಬಿಕೆಯಿತ್ತು...ವಯಸ್ಸೊಂದಿದೆ ಇವಾಗವಾಸ್ತವತೆಯಲ್ಲು ಸಂಶಯವಿದೆ......

ಲಂಗರು ಕಚ್ಚಿದ ದೋಣಿ

ಲಂಗರು ಕಚ್ಚಿದ ದೋಣಿ

ಶ್ರೀಕಾಂತ್ ಪ್ರಭು ಲಂಗರು ಕಚ್ಚಿದ ದೋಣಿ ಮರಳ ಮೇಲೆಲ್ಲ ಹಾಯ್ದು ತೋಯಿಸಿ ಮೆತ್ತಗಾಗಿಸಿ ಮತ್ತೆ ಮತ್ತೆ ಮರಳುವ ಅಲೆ ಬೆಚ್ಚನೆಯ ಪಿಸು ಮಾತು...

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This