ಚರ್ಚ್ ರಸ್ತೆಯ ಹುಚ್ಚಿ..

                                                             ತೇಜಶ್ರೀ  ಹಾಸನ                                                       

ಅವಳಷ್ಟಕ್ಕೆ ಅವಳ ಮಾತು-
ತಲೆಕೆರೆದು ಒಮ್ಮೆ ಆಕಾಶ ನೋಡುತ್ತ,
ಮತ್ತೊಮ್ಮೆ ಸಣ್ಣ ಕಡ್ಡಿಯಲಿ ನೆಲವ ಗೀರುತ್ತ,
ಬೆರಳ ತುದಿಗೆ ಗೋಲಿ ಸಿಕ್ಕಿಸಿ ಹೊಡೆಯುತ್ತಿದ್ದುದ ನೆನಪಿಸುವಂತೆ
ಏನಕ್ಕೋ ಗುರಿ ನೆಟ್ಟ ಕಣ್ಣಲ್ಲಿ
ತುದಿಬೆರಳನ್ನೆಳೆದು ಬಿಗಿಯಾಗಿ
ಎದುರಿನ ಖಾಲಿಗೆ ಹೊಡೆಯುತ್ತ, ಅವಳು
ಮಾತನಾಡಿಕೊಳ್ಳುತ್ತಾಳೆ ತನ್ನಷ್ಟಕ್ಕೆ ತಾನೇ.

ಹೂದೋಟವೇ ಮೈಮೇಲೆ ಅರಳಿದಂತೆ
ಬಣ್ಣಬಣ್ಣದ ಹೂಗಳ ಅವಳ ಉದ್ದನೆ ಲಂಗ,
ಅದಕ್ಕೊಂದು ಬಿಳಿ ತುಂಬುದೋಳಿನ ಶರಟು.
ಯಾರು ತೊಡಿಸಿದ್ದೋ ಏನೋ?
-ಈ ಊರ ಗಾಳಿಯಲ್ಲಿ ಕರುಣೆ
ಇನ್ನೂ ಬದುಕಿದೆಯೆಂದು ಹೇಳುವಂತಿದೆ ಇದೆಲ್ಲ.

ಒಂದು ದಿನ, ಅವಳ ಉದ್ದನೆ ಕೂದಲು
ನೀಟಾಗಿ ಕತ್ತರಿಸಿ ಅವಳೀಗ ಬೇರೆಯೇ ಹುಡುಗಿ,
ಆ ಬಾಬುಕಟ್ಟಿನ ತಲೆಗೊಂದು ಕೆಂಪನೆ ರಿಬ್ಬನ್ನು,
ಇದು ಯಾವ ಲೋಕದ ಲೀಲೆ
ಈಗವಳು ಕಣ್ಣುಕುಕ್ಕುವ ಬಾಲೆ!

ಆಗೀಗ ಜಾಗ, ದಿಕ್ಕು ಬದಲಿಸುತ್ತ
ಅಲ್ಲೇ ಕೂತಿರುತ್ತಾಳೆ ಇಲ್ಲಾ ಮಲಗಿರುತ್ತಾಳೆ ಅವಳು
ಅದೇ ಚರ್ಚ್ ರಸ್ತೆಯಲ್ಲಿ ದಿನವೂ,
ಅದೇ ಅವಳ ವಿಳಾಸ:
‘ಇಲ್ಲಿ ಹುಟ್ಟಿದಳು ಈ ಚರ್ಚು ರಸ್ತೆಯಲ್ಲಿ
ಇಲ್ಲೇ ಬೆಳೆದಳು, ಇದೇ ಅವಳ ಕುರುಹು’
ಎನ್ನಬಹುದಾದಷ್ಟು ಪರಿಚಿತ ಆ ರಸ್ತೆಗೆ ಅವಳು,
ಅವಳಿಗೆ ಆ ರಸ್ತೆ.



ಇದ್ದಕ್ಕಿದ್ದಂತೆ ಒಂದು ದಿನ ಕಣ್ಮರೆಯಾದಳು ಅವಳು ಅಲ್ಲಿಂದ,
ಮೊದಮೊದಲು ಅವಳು ಕೂರುವ ಜಾಗ
ಆ ಮೂಲೆ, ರಸ್ತೆಯ ಈ ಕೋನ
ಎಲ್ಲ ಕಡೆ ಹೋಗುತ್ತ ಬರುತ್ತ ಹುಡುಕಿದರು ಜನ
ಎಲ್ಲಿಯೂ ಕಾಣಲಿಲ್ಲ ಅವಳು.

ದಿನ ಕಳೆದು ವಾರವಾಗಿ ತಿಂಗಳುಗಳು ಬಂದು
ಅವಳು ಉಳಿಸಿ ಹೋದ ಖಾಲಿ ಆ ರಸ್ತೆಯಲ್ಲಿ ಮಾಸುತ್ತಲಿರುವಾಗ
ಇದ್ದಕ್ಕಿದ್ದಂತೆ ಅವಳು ಮತ್ತೆ ಬಂದಳು ರಸ್ತೆಗೆ,
ಈಗವಳು ತುಂಬು ಬಸುರಿ.

ಮೈಮೇಲೆ ಅದೇ ಉದ್ದನೆ ಲಂಗ
ಅದರ ಮೇಲಿನ ಹೂಗಳ ಬಣ್ಣ ಮಾಸಿದೆ ಈಗ,
ಹರಿದಿದೆ ಬಿಳಿಯ ಬಣ್ಣದ ತುಂಬುದೋಳಿನ ಶರಟು ಅಲ್ಲಿಲ್ಲಿ,
ಲಂಗ, ಶರಟಿನ ಮೇಲೆಲ್ಲ ರಕ್ತದ ಕಲೆಗಳು ಸೇರಿಕೊಂಡಿವೆ ಹೊಸತಾಗಿ.

ಈಗಲೂ ಅವಳು ಮಾತನಾಡಿಕೊಳ್ಳುತ್ತಾಳೆ
ತನ್ನಷ್ಟಕ್ಕೆ ತಾನೇ.

‍ಲೇಖಕರು Avadhi

September 13, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಲೋಕದ ಕಣ್ಣು ಮರುಗಲೂಬಹುದು!

ಲೋಕದ ಕಣ್ಣು ಮರುಗಲೂಬಹುದು!

ಕೆ.ಜೆ.ಕೊಟ್ರಗೌಡ ತೂಲಹಳ್ಳಿ ಊರ ಬಯಲಿನ ದಿಬ್ಬದ ಮೇಲೆಈ ಮಳೆಗಾಲಕ್ಕೆಚಿಗುರೊಡೆದ ಹುಲ್ಲು ಗಂಬಳಿಯಹಾಸಿನಲಿನಾವಿಬ್ಬರೇ ಸಾನಿಧ್ಯವಹಿಸೋಣಅದೆಷ್ಟು...

ಸ್ಯಾನಿಟೈಜ್ ಆಗಬೇಕಾಗಿದೆ ಹೃದಯ

ಸ್ಯಾನಿಟೈಜ್ ಆಗಬೇಕಾಗಿದೆ ಹೃದಯ

ರಾಘವೇಂದ್ರ ದೇಶಪಾಂಡೆ ವಯಸ್ಸೊಂದಿತ್ತು ಆ ದಿನಗಳಲ್ಲಿಜಾದೂವಿನಲ್ಲು ನಂಬಿಕೆಯಿತ್ತು...ವಯಸ್ಸೊಂದಿದೆ ಇವಾಗವಾಸ್ತವತೆಯಲ್ಲು ಸಂಶಯವಿದೆ......

ಲಂಗರು ಕಚ್ಚಿದ ದೋಣಿ

ಲಂಗರು ಕಚ್ಚಿದ ದೋಣಿ

ಶ್ರೀಕಾಂತ್ ಪ್ರಭು ಲಂಗರು ಕಚ್ಚಿದ ದೋಣಿ ಮರಳ ಮೇಲೆಲ್ಲ ಹಾಯ್ದು ತೋಯಿಸಿ ಮೆತ್ತಗಾಗಿಸಿ ಮತ್ತೆ ಮತ್ತೆ ಮರಳುವ ಅಲೆ ಬೆಚ್ಚನೆಯ ಪಿಸು ಮಾತು...

೧ ಪ್ರತಿಕ್ರಿಯೆ

  1. Shylajahassan

    ಹೊಸ ಸ್ವರೂಪದ ಅವಧಿ ಸೊಗಸಾಗಿದೆ

    ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: