ಜಡೆ ನೋಡು, ನಡು ನೋಡು..

ದೇವ-ಶಿಲ್ಪಿ

sathyakama sharma kasaragod

ಸತ್ಯಕಾಮ ಶರ್ಮಾ ಕಾಸರಗೋಡು 

ಇರಬಹುದು ಸುಂದರ ಕಂಗಳಿಗೆ ನೋಡುಗರ
ಮರೆಮಾಚಿದೆ ಹಿಂದಿರುವ ಬೆವರ ಹಾರ
ಕಂಬನಿಗಳಿಬ್ಬನಿ ಪುರುಷ ಮಣಿಗಳಾದ ಹರುಷ ಕ್ಷಣಗಳು
ಉಳಿಪೆಟ್ಟುಗಳಿಗೆ ಚಿಮ್ಮಿ ಚಿಮ್ಮಿ ಕಂಗಳಲಿ ಕಣ್ಮರೆಯಾದ
ಕಲ್ಲು ಚೂರು ಪಾರು ಒಂದಿಷ್ಟು ಧೂಳು
ಬರಿಕಲ್ಲು ಹಲವರಿಗೆ ಕರುಣಿಸಿದ ಕೂಳು

ಶಿಲ್ಪಿಯನು ಹೊರಗಿಟ್ಟೆ ಶಿಲ್ಪವನು ಒಳಗೆ ಬಿಟ್ಟೆ
ಇದು ಸರಿಯೆ ದೇವನೆ ಹೇಳು
ಯಾಕಿಲ್ಲ ಎಲ್ಲಾ ಶಿಲೆಗಳಿಗೂ ಹೀಗೆ ಶಿಲ್ಪವಾಗಿ
ನಿನ್ನ ಪ್ರಭಾವಲಯದಲಿ ಸ್ಥಾಯಿಯಾಗಿ
ಜೀವತಳೆದು ನಿಲ್ಲುವ ಬಾಗ್ಯ?
ಈ ಜಗದ ಶಿಲ್ಪಿ ನೀನು ಸೋಜಿಗದ ಮೂರುತಿ ನಾನು
ಕಡೆವವನು ನೀನೆ
ಕೆಡಿಸುವವನು ನೀನೆ
ಕೆಡವುವವನು ನೀನೆ
ನನ್ನದೇನಿದೆ ಹೇಳು
ಕೊನೆಗೆ ಮಣ್ಣು, ಬಾಳು

ಜಡೆ ನೋಡು, ನಡು ನೋಡು
ಪೃಷ್ಠಗಳಲೂ ಸ್ಪಷ್ಟವಾದ ಕಲೆಗಾರಿಕೆ
ಕಮ್ಮಿಯೇನು?
ಅವನಿವಳ ಶಿಲ್ಪಿಯಾದರೂ ನೀನವನ ಶಿಲ್ಪಿ
ಅಲ್ಲವೇನು?
ಮತ್ತಿನ್ನೇನು ಶಿಲ್ಪವಾಗಿಯಾದರೂ ಸರಿ
ಹಾಗೆ ಪ್ರತ್ಯಕ್ಷನಾಗು
ನೀನಿಲ್ಲವೆನ್ನುವವರನು ಇಲ್ಲವಾಗಿಸಲಾದರೂ
ನಿಲ್ಲು ನಮ್ಮೆದುರು
ಹೇಗಿದ್ದರೂ ನೀನು
ಕಲ್ಪತರು

ಶಿಲ್ಪಗಳಾದ ಸಂಕಲ್ಪಗಳಲಿ
ಸಂಚಲನವನು ತರು

 

ಅಲೆಮಾರಿ

Shri-Talageri-262x300

ಶ್ರೀ ತಲಗೇರಿ

ಚಪ್ಪರದ ತೂತಿಂದ
ಸ್ಖಲಿತ ಭ್ರಮೆಯ ರಸಗವಳ
ತುಂಬಿಕೊಳಲೆಂದು ನಿಲ್ಲದಾ ಓಟ…
ಒಂದೇ ನೀಲಿ ಹಾಸಿನ ಅಡಿಗೆ
ವ್ಯಾಪ್ತಿಗಳ ಸಹಿಯಿಹುದೇ !
ದಿಕ್ಕು ಬದಲಿಸುವ ಹಣತೆಗಳಿಗೆ
ನಾ ಗೋಡೆ ಮೇಲಣ ನೆರಳೇ ?… !

ಅವಳ ದೇಹದ ಬೀದಿಯ
ಉಬ್ಬು ತಗ್ಗುಗಳಲ್ಲಿ ಇಣುಕಿದಾಗ
ಸ್ವೇದ ಟಿಸಿಲೊಡೆವ ಹಾದಿಯಲಿ
ಅದೆಂಥ ಕುಸುರಿಯೋ!
ಖಾಸಗಿ ಬಿಡಾರ ಹೂಡಲು
ತುಸು ತುಸುವೇ
ಋತುಗಳಿಗೆ ತುತ್ತ ನಿಡುತಿಹ
ಮೈಧೂಪ ಲಹರಿಯೋ…!
ನಿಯಮಿತವಲ್ಲ;
ಆಗಬಹುದು ನಾಳೆಯೇ ನಿರ್ವಾತ…

ಸುಟ್ಟಿರುವ ಹೂವ ಗಂಧ
ಸತ್ತಿದ್ದಾದರೂ ಹೇಗೆ ?
ಅಥವಾ ಇಲ್ಲೆಲ್ಲೋ ಗಾಳಿಯಲ್ಲಿ
ಅನಾಥವಾಗಿ ಅಲೆಯುತ್ತಿರಬಹುದೇ
ಮತ್ತೊಂದು ಹೂವರಳಲು ;
ಆತ್ಮದಂತೆ…!

ನಿಶೆಗೀಗ ಹಲವು ಬಣ್ಣ
ಬೆಳಕಿನಾ ಅಮಲು ನಡು ನೆತ್ತಿಗೇರಿ..
ನನ್ನೊಳಗೆ ನಾ ಇಳಿದಂತೆ
ಅರ್ಥವಾಗದ ಗದ್ದಲ ಪ್ರತಿ ಸಾರಿ..
ಈಗಲೂ
ಅಂತರ್ ಬಹಿರ್ ಮಧ್ಯಂತರದಿ
ನಾ ಅಲೆಮಾರಿ!…

‍ಲೇಖಕರು Admin

September 11, 2016

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಯಾವ ‘ಮೋಹನ’ ಮುರಲಿ ಕರೆಯಿತೋ…

ಯಾವ ‘ಮೋಹನ’ ಮುರಲಿ ಕರೆಯಿತೋ…

ಸಂಗೀತ ರವಿರಾಜ್ ನನ್ನನ್ನು ಅತಿಯಾಗಿ ಕಾಡಿದ ಅಗಲಿಕೆಗಳಲ್ಲಿ ಇದೂ ಒಂದು. ನಿರಂತರ ಒಡನಾಟದಲ್ಲಿ, ಮಾತುಕತೆಯಲ್ಲಿ ಇಲ್ಲದೆ ಇದ್ದರು ಕೆಲವುಸಾವು...

ನರೇಂದ್ರ ಪೈ ಅವರ “ಕನಸುಗಳು ಖಾಸಗಿ”

ನರೇಂದ್ರ ಪೈ ಅವರ “ಕನಸುಗಳು ಖಾಸಗಿ”

ಕಮಲಾಕರ ಕಡವೆ ಕತೆಯಿರುವುದು ಕಣ್ಣಲ್ಲಿ. ಕತೆಗಾರರ ಕಣ್ಣು ಕಾಣಲು ನಿರ್ಧರಿಸುವ ಜಗತ್ತು ಅವರ ಸುತ್ತಲಿನದೋ, ಒಳಗಿನದೋ, ಹಿಂದೆಂದಿನದೋ,...

ಅಂದಿನಿಂದಿಂದಿಗೆ

ಅಂದಿನಿಂದಿಂದಿಗೆ

ಶ್ಯಾಮಲಾ ಮಾಧವ ಮೊರೆಯುವ ಕಡಲು. ವಿಶಾಲ ಮರಳ ಹಾಸು. ಗಾಳಿಯಲೆಯಾಡುವ ಸುವಿಶಾಲ ಚಬುಕಿನ ತೋಪು. ಅದರ ನಡುವೆ ವೃತ್ತಾಕಾರದ, ಕಟ್ಟೆಯಿರದ, ಇಳಿಯಲು...

೧ ಪ್ರತಿಕ್ರಿಯೆ

  1. 'ಶ್ರೀ' ತಲಗೇರಿ

    ತುಂಬು ಮನದ ಧನ್ಯವಾದಗಳು ಅವಧಿ… 🙂 🙂 🙂

    ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: