ಜಿ ಪಿ ಕಾಲಂ : ಕುಲ ಮತ್ತು ಕುಲ ಕಸುಬುಗಳು

ಕುಲ ಮತ್ತು ಕುಲ ಕಸುಬುಗಳು ಹಳ್ಳಿಯ ಹಿನ್ನೆಲೆಯಿಂದ ಬಂದಿರುವ ನಮ್ಮೆಲ್ಲರ ಬಾಲ್ಯದ ದಿನಗಳ ಅನುಭವ ಚೇತೋಹಾರಿಯಾಗಿರಲು ಕಾರಣವೇನು ಎಂದು ಒಮ್ಮೊಮ್ಮೆ ಪ್ರಶ್ನಿಸಿಕೊಳ್ಳುತ್ತೇನೆ. ಬಾಲ್ಯದ ಆ ದಿನಗಳನ್ನು ನೆನೆಯುವಾಗ ಸಾಲು ಸಾಲು ಚಿತ್ರಗಳು ಕಣ್ಮುಂದೆ ಹಾದು ಹೋಗುತ್ತವೆ: ನಮ್ಮೂರಿಗೆ ಕರಡಿ ಕುಣಿಸುವವರು ಬರುತ್ತಿದ್ದರು. ಕರಡಿಯನ್ನು ನೋಡಿದರೆ ಒಳಗೇ ಭಯ. ಹತ್ತಿರ ಹೋಗುವ ಕುತೂಹಲ. ಆದರೆ ಭಯ. ಮೊರದ ತುಂಬ ಕಾಳು ತಂದು ಕರಡಿ ಆಡಿಸುವವನ ಜೋಳಿಗೆಗೆ ಸುರಿಯುವ ನಮ್ಮಜ್ಜಿ. ಸಂಪ್ರೀತನಾಗುತ್ತಿದ್ದ ಕರಡಿ ಆಡಿಸುವವನು ತನ್ನ ತೃಪ್ತಿಯನ್ನು ತೋರಿಸುವುದಕ್ಕಾಗಿಯೇ ಮಕ್ಕಳಾದ ನಮ್ಮನ್ನೆಲ್ಲ ಕರಡಿಯ ಮೇಲೆ ಕೂಡಿಸಲು ಉತ್ಸುಕನಾಗುತ್ತಿದ್ದ. ಸುತ್ತ ನೆರೆದವರಿಗೂ ಉಮೇದು. ಭಯದಲ್ಲಿ ದೂರವೇ ಇರುತ್ತಿದ್ದ ನಮ್ಮನ್ನೆಲ್ಲ ದೊಡ್ಡವರು ಹಿಡಿದು ಕರಡಿಯ ಮೇಲೆ ಕೂಡಿಸಿಬಿಡುತ್ತಿದ್ದರು. ಕರಡಿಯ ಮೇಲೆ ಕುಳಿತರೆ ಒಳ್ಳೆಯದಾಗುತ್ತದೆ ಎಂಬ ನಂಬಿಕೆ. ಆದರೆ ಕರಡಿಯ ಮೇಲೆ ಕುಳಿತುಕೊಳ್ಳಬೇಕಾದ ನಮ್ಮ ಒಳಗಿನ ಭಯ ತೀವ್ರಗೊಂಡು ಪ್ರತಿರೋಧವೇ ಹೆಚ್ಚಾಗುತ್ತಿತ್ತು. ಭಯದಲ್ಲಿ, ಪ್ರತಿರೋಧದಲ್ಲಿ, ಚಡಪಡಿಕೆಯಲ್ಲಿ ಕರಡಿಯ ಬೆನ್ನಮೇಲೆ ಕುಳಿತ ಅನುಭವವೇ ಕರಗಿ ಹೋಗಿ ಇತರ ಸಂಗತಿಗಳೇ ಮನಸ್ಸಿನಲ್ಲಿ ಅಚ್ಚೊತ್ತಿಬಿಡುತ್ತಿದ್ದವು. ಕರಡಿ ಆಡಿಸುವವನು ಬಂದ ಬೆಳಗು ನಮಗೆಲ್ಲ ಸಾಮಾನ್ಯ ಬೆಳಗಾಗಿರುತ್ತಿರಲಿಲ್ಲ. ಅದು ತುಂಬುತ್ತಿದ್ದ ಉತ್ಸಾಹ, ಸಂಭ್ರಮ ಇಡೀ ದಿನ ಉಳಿದುಬಿಡುತ್ತಿತ್ತು. ಇನ್ನೊಂದು ದಿನ ಗಿಳಿಶಾಸ್ತ್ರ ಹೇಳುವವನು ಬರುತ್ತಿದ್ದ. ಅವನು ಹೇಳುವುದೆಲ್ಲ ನಿಜವೆಂದೇ ನಾವು ನಂಬಿಕೊಂಡಿದ್ದೆವು. ಇಡೀ ಊರೇ ಹಾಗೆ ನಂಬಿಕೊಂಡಿತ್ತು. ಯಾರಿಗೂ ಅಪನಂಬಿಕೆ ಇದ್ದಂತೆ ನಮಗೆ ಆಗ ಅನ್ನಿಸುತ್ತಿರಲಿಲ್ಲ. ಹೇಳುವುದನ್ನು ಕೇಳುವುದು ಮಾತ್ರವಲ್ಲ, ನೋಡುವುದಕ್ಕೂ ಅನೇಕ ಸಂಗತಿಗಳಿರುತ್ತಿದ್ದವು. ನಮ್ಮ ಕಣ್ಣು, ಕಿವಿ, ಮನಸ್ಸು ಎಲ್ಲವೂ ಚುರುಕಾಗಿ ಅವನು ಊರು ಬಿಡುವವರೆಗೂ ನಾವೆಲ್ಲ ಹೆಚ್ಚು ಕಡಿಮೆ ಅವನ ಹಿಂದೆಯೇ ಹೋಗುತ್ತಿದ್ದೆವು. ಶಾಸ್ತ್ರ ಕೇಳಿಸಿದವರು ಹಣ ಕೊಡುತ್ತಿದ್ದರು. ಕೇಳಿಸದವರು ಅವನಿಗೆ ಒಂದಿಷ್ಟು ಕಾಳನ್ನೊ, ರೊಟ್ಟಿಯನ್ನೊ ಕೊಡುವುದು ರೂಢಿ. ಅವನಿಗೆ ಕೊಡುವುದನ್ನು ಯಾರೂ ಭಿಕ್ಷೆ ಎಂದು ಭಾವಿಸುತ್ತಿರಲಿಲ್ಲ. ಅವನೂ ಹಾಗೆಯೇ ಹಕ್ಕಿನಿಂದ ಪಡೆದುಕೊಳ್ಳುತ್ತಿದ್ದ. ಅವನ ಉಡುಗೆ ತೊಡುಗೆ, ಚಾಲೂಕುತನ, ಮಾತುಗಾರಿಕೆ ನಮ್ಮನ್ನೆಲ್ಲ ಕಟ್ಟಿಹಾಕುತ್ತಿದ್ದವು. ಮುಳ್ಳಹಾವಿಗೆಯ ಮೇಲೆ ನಿಂತು ಕಠೋರ ತಪಕ್ಕೆ ತೊಡಗಿದವನಂತೆ ಕಾಣುವ ಜಂಗಮಯ್ಯ ಒಡಪಿನ ಭಾಷೆಯಲ್ಲಿ ಭವಿಷ್ಯ ನುಡಿಯುತ್ತಿದ್ದ. ಊರ ಆಯಕಟ್ಟಿನ ಜಾಗದಲ್ಲಿ ಕದಲದೆ ನಿಂತ ಈ ಜಂಗಮಯ್ಯ ಊರೊಳಗೆ ಭಿಕ್ಷಾಟನೆಗೆ ಹೋಗುತ್ತಿರಲಿಲ್ಲ. ಇಡೀ ಊರು ಅವನ ಬಳಿಗೆ ಬರುತ್ತಿತ್ತು. ಅವನ ಮಾತುಗಳನ್ನು ಶ್ರದ್ಧೆಯಿಂದ ಕೇಳಿ ತಮಗೆ ತಿಳಿದಂತೆ ಅಥರ್ೈಸುತ್ತ, ಇಡೀ ದೇಶವೇ ಅಲ್ಲೊಲ ಕಲ್ಲೋಲವಾಗುವ ಚಿತ್ರವನ್ನು ಕಣ್ಮುಂದೆ ತಂದುಕೊಂಡು ಜನ ಭೀತರಾಗುತ್ತಿದ್ದರು. ಜಂಗಮಯ್ಯನಿಗೆ ಸಲ್ಲಬೇಕಾದ ಕಾಣಿಕೆ ಸಂದಾಯವಾಗುತ್ತಿತ್ತು. ಬುಡುಬುಡಿಕೆಯವರು, ಗೊರಪ್ಪಗಳು, ದಾಸಯ್ಯಗಳು, ಹಗಲು ವೇಷದವರು, ಗೊಂಬೆಯಾಟದವರು, ಗಂಗಮ್ಮ ಗೌರಮ್ಮ, ಎಷ್ಟೊಂದು ಜನ! ಎಲ್ಲಿಂದ ಬರುತ್ತಿದ್ದರು, ಎಲ್ಲಿಗೆ ಹೋಗುತ್ತಿದ್ದರು. ಊರ ನಾಯಿಗಳು ಪ್ರಚಂಡ ರೌದ್ರಾವತಾರ ತಾಳಿ ದಾರಿಯನ್ನು ಅಡ್ಡಗಟ್ಟಿ ನಿಂತರೂ ಅವರ್ಯಾರೂ ನಾಯಿಗಳನ್ನು ಲೆಕ್ಕಿಸುತ್ತಿರಲಿಲ್ಲ. ಅವರು ಬಂದ ಸೂಚನೆಯನ್ನು ಮಾತ್ರ ಕೊಡುವುದು ನಾಯಿಗಳಿಗೆ ಸಾಧ್ಯವಾಗುತ್ತಿತ್ತೇ ಹೊರತು, ಅವರನ್ನು ತಡೆಯುವ ಶಕ್ತಿ ಬೀದಿನಾಯಿಗಳಿಗೆ ಇದ್ದಂತಿರಲಿಲ್ಲ. ಈ ಬೀದಿನಾಯಿಗಳ ಪೌರುಷ ಸಾಮಾನ್ಯವೆನ್ನುವಂತಿರಲಿಲ್ಲ. ಇವರನ್ನೆಲ್ಲ ಭಿಕ್ಷುಕರೆಂದು ಅವಮಾನಿಸಿದ್ದು, ಕಡೆಗಣಿಸಿದ್ದು ಇಲ್ಲವೇ ಇಲ್ಲವೆನ್ನಬೇಕು. ಅವರು ಕೂಡಾ ಹೀಗೆ ಬಂದು ‘ಊರಾಡಿ’ ಹೋಗುವುದನ್ನು ತಮ್ಮ ಹಕ್ಕೆಂದೇ ಭಾವಿಸಿದ್ದರು. ಹಂಚಿ ಉಣ್ಣುವ, ಸಂಸ್ಕೃತಿಯ ಬಹುಮುಖಗಳನ್ನು ಗೌರವಿಸುವ ಮನೋಭಾವ ಹಳ್ಳಿಗಳಲ್ಲಿತ್ತು; ಗ್ರಾಮಸಂಸ್ಕೃತಿಯ ಭಾಗವಾಗಿತ್ತು. ಎಷ್ಟೊಂದು ಕಸುಬು ಬಲ್ಲವರು ನಮ್ಮೂರಲ್ಲಿದ್ದರು. ಕ್ಷೌರಿಕರು, ಅಗಸರು, ಚಮ್ಮಾರರು, ಕಮ್ಮಾರರು, ಪೂಜಾರಿಗಳು, ತಳವಾರರು, ನೀರಗಂಟಿಗಳು ಇತ್ಯಾದಿ. ಇವರಿಗೆಲ್ಲ ಕರ್ತವ್ಯಗಳೂ ಇದ್ದವು; ಹಕ್ಕುಗಳೂ ಇದ್ದವು. ಸುಗ್ಗಿಯಲ್ಲಿ, ರಾಶಿಪೂಜೆಯ ಸಂದರ್ಭದಲ್ಲಿ ಇವರಿಗೆಲ್ಲ ರಾಶಿಯಲ್ಲಿ ಪಾಲು. ಭತ್ತ, ರಾಗಿ, ಶೇಂಗಾ, ಹುರುಳಿ, ತೊಗರಿ ಹೀಗೆ ಪ್ರಧಾನವಾಗಿ ಯಾವುದನ್ನೇ ಬೆಳೆದರೂ ರಾಶಿಯ ಸಮಯಲ್ಲಿ ಇವರಿಗೆಲ್ಲ ಪಾಲನ್ನು ಸಲ್ಲಿಸಲೇ ಬೇಕು. ಯಾರಾದರೂ ಬಂದಿಲ್ಲದಿದ್ದರೆ ಅವರನ್ನು ಕರೆಸಿ, ಇಲ್ಲವೇ ಅವರ ಪಾಲನ್ನು ಎತ್ತಿಟ್ಟು ಗೌರವಿಸಲಾಗುತ್ತಿತ್ತು. ಈ ಪಾಲು ಸಂದಾಯವಾಗಲೇ ಬೇಕು. ಯಾಕೆಂದರೆ ರೈತನ ಇಡೀ ವರ್ಷದ ಕೆಲಸ ಕಾರ್ಯಗಳು ನಡೆಯಬೇಕಾದರೆ, ಈ ಕಸುಬುದಾರರು ಬೇಕೇಬೇಕು. ಕುಳ, ಹಾರೆ, ಸಲಿಕೆ, ಗುದ್ದಲಿ, ಮಚ್ಚು, ಕುಡುಗೋಲು ಇತ್ಯಾದಿ ಹತಾರಗಳಿಲ್ಲದೆ ಬೇಸಾಯ ನಡೆಯುವುದು ಹೇಗೆ? ಎಲ್ಲ ಕಸುಬು ಬಲ್ಲವರೂ ಬೇಕಾಗುತ್ತಿದ್ದರು. ಅವರಿಗೆ ಗೌರವವೂ ಇರುತ್ತಿತ್ತು. ಸಹಕಾರವಿಲ್ಲದಿದ್ದರೆ ಹಳ್ಳಿಗಳಲ್ಲಿ ಬದುಕುವುದೇ ದುಸ್ಸಾಧ್ಯ ಎಂಬ ಸ್ಥಿತಿಯೂ ಇತ್ತು. ಎಲ್ಲವೂ ಹಣದ ಮೇಲೆಯೇ ನಡೆಯುತ್ತಿರಲಿಲ್ಲ. ದವಸ ಧಾನ್ಯ ಬೇಳೆಯ ಕಾಳು, ಹಾಲು ಮೊಸರು, ಎಣ್ಣೆ ಬೆಣ್ಣೆ ಎಲ್ಲವನ್ನೂ ಕೊಡುವುದು ತೆಗೆದುಕೊಳ್ಳುವುದು ನಡೆಯುತ್ತಿತ್ತು. ಹಣವಿದ್ದರೂ, ಎಲ್ಲ ಹಣದಿಂದಲೇ ನಡೆಯುತ್ತದೆ ಎನ್ನುವಂತಿರಲಿಲ್ಲ. ಹಣವಿದ್ದ ಶ್ರೀಮಂತರು ನಮ್ಮೂರಲ್ಲಿ ಬೆರಳೆಣಿಕೆಯಷ್ಟು ಮಾತ್ರ. ಗಾಂಧೀಜಿಯವರು ಪ್ರತಿಪಾದಿಸಿದ ಸ್ವಾವಲಂಬನೆ ಹಳ್ಳಿಗಳಲ್ಲಿ ತಾನೇ ತಾನಾಗಿತ್ತು. ಎಲ್ಲವೂ ಸಮೃದ್ಧಿಯಿಂದ ಕೂಡಿತ್ತು ಎಂದು ಹೇಳಲಾಗದಿದ್ದರೂ, ಒಂದು ಬಗೆಯ ನೆಮ್ಮದಿ, ಬಡತನದಲ್ಲೂ ಹಂಚಿಕೊಂಡು ತಿನ್ನುವ ಉದಾರತೆ, ಒಟ್ಟಾಗಿ ಬದುಕುವ ಸಂಭ್ರಮ ಇದ್ದವು. ಮೋಸಗಾರರು, ಕಳ್ಳರು, ದೋಚುವವರು, ಕಿಡಿಗೇಡಿಗಳು, ದುಷ್ಟರು, ಕುಡುಕರು, ಜೂಜುಕೋರರು ಎಲ್ಲರೂ ನಮ್ಮೂರಲ್ಲಿದ್ದರು. ಆದರೂ ಅವರು ನಿರ್ಲಜ್ಜರಾದಂತಿರಲಿಲ್ಲ. ಅಂತೂ ಇವರೆಲ್ಲರನ್ನೂ ಸರಿದೂಗಿಸಿಕೊಂಡು ಹೋಗುವ ಒಂದು ವ್ಯವಸ್ಥೆ ಇದ್ದೇ ಇತ್ತು. ಬದುಕು ಘೋರವೂ, ಅಸಹನೀಯವೂ ಆಗಿರಲಿಲ್ಲ. ಕಾಲ ಬದಲಾಗುತ್ತದೆ. ಹಳ್ಳಿಗಳು, ನಗರಗಳು, ಸಮಾಜಗಳು ಬದಲಾಗುತ್ತವೆ. ಸ್ಥಿತ್ಯಂತರ ಅನಿವಾರ್ಯ. ಕೆಲವು ಒಳ್ಳೆಯ, ಕೆಲವು ಕೆಟ್ಟ ಬದಲಾವಣೆಗಳು. ಫ್ಯೂಡಲ್ ವ್ಯವಸ್ಥೆಗೆ ತೆರೆಬಿದ್ದು, ಎಲ್ಲರ ಸಮಾನತೆಯನ್ನು ಸಾರುವ ಪ್ರಜಾಪ್ರಭುತ್ವ ಬಂದದ್ದು ಒಳ್ಳೆಯ ಬೆಳವಣಿಗೆಯೇ. ಆಧುನಿಕ ವಿಜ್ಞಾನ ಮತ್ತು ತಂತ್ರಜ್ಞಾನ ತಂದ ಕೊಡುಗೆಗಳು ಮನುಷ್ಯನ ಬದುಕನ್ನು ಅನಿರೀಕ್ಷಿತ ರೀತಿಯಲ್ಲಿ ಪಲ್ಲಟಿಸಿವೆ. ಜಾಗತೀಕರಣವಂತೂ ಎಲ್ಲರ ಊಹೆಗಳನ್ನೂ ತಲೆಕೆಳಗೆ ಮಾಡುವ ಬದಲಾವಣೆಗಳನ್ನು ತಂದಿದೆ. ಯಾವುದು ಹಿತ, ಯಾವುದು ಅಹಿತ ಎಂದು ಯೋಚಿಸಲೂ ಸಮಯವಿಲ್ಲದಷ್ಟು ಮನುಷ್ಯ ಬಿಜಿಯಾಗಿದ್ದಾನೆ. ಎಲ್ಲರೂ ತಮ್ಮ ಗೂಡುಗಳಲ್ಲೇ ಮಹಾನ್ ಲೋಕಗಳನ್ನು ಸೃಷ್ಟಿಸಿಕೊಂಡಿದ್ದಾರೆ. ಅಥವಾ ಹೊರಗಿನ ಲೋಕದಲ್ಲೇ ಮೈಮರೆತು ತಮ್ಮೊಳಗಿನ ಲೋಕವನ್ನೇ ಮರೆತಿದ್ದಾರೆ. ಗಾಂಧೀ ಹೇಳುತ್ತಿದ್ದ ಸ್ವಾವಲಂಬನೆಯ ಹೆದ್ದಾರಿ ಎಲ್ಲಿ ಮಾಯವಾಯಿತು? ನಮ್ಮಲ್ಲೇ ಇದ್ದದ್ದನ್ನು ನಾವು ಹೇಗೆ ಕಳೆದುಕೊಂಡೆವು? ನಮ್ಮ ಅರಿವಿಗೇ ಬಾರದಂತೆ ನಮ್ಮ ಹಳ್ಳಿಗಳು ಬರಡಾಗಿವೆ; ಹಳ್ಳಿಗಳಲ್ಲಿದ್ದ ಕಸುಬುದಾರರೆಲ್ಲ ಕಣ್ಮರೆಯಾಗಿದ್ದಾರೆ. ನಗರಗಳನ್ನರಸಿ ಅವರು ಯಾಕೆ ವಲಸೆ ಹೋದರು? ತಮ್ಮ ಕಸುಬುಗಳನ್ನು, ಕುಶಲತೆಯನ್ನು, ತಂತ್ರಜ್ಞಾನವನ್ನು ಅವರು ಬಿಟ್ಟುಕೊಟ್ಟದ್ದು ಯಾಕೆ? ಕಸುಬುಗಳು ಕುಲಕಸುಬುಗಳಾಗಿ, ಜಾತಿ ವ್ಯವಸ್ಥೆಯ ಈ ಸಮಾಜದಲ್ಲಿ ಕಸುಬಿನ ಮೂಲಕವೇ ಜಾತಿಯನ್ನು ಗುರುತಿಸಿ ಅಪಮಾನ ಮಾಡುವ ಪರಿಪಾಠ ನಮ್ಮ ಕಸುಬುದಾರರು ಅವುಗಳಿಂದ ಹೊರಬರಲು ಕಾರಣವಾಗಿರಬೇಕು. ಜಾತಿ ಅಪಮಾನ ಮನುಷ್ಯನನ್ನು ಕುಗ್ಗಿಸಿಬಿಡುತ್ತದೆ. ಕಸುಬುಗಳ ಘನತೆಯನ್ನು ಎತ್ತಿಹಿಡಿಯುವ ದಾರಿ ಎಂದರೆ ಹಳ್ಳಿಹಳ್ಳಿಗಳಲ್ಲೂ ಈ ಕಸುಬಿನ ತರಬೇತಿ ಕೇಂದ್ರಗಳನ್ನು ತೆರೆದು ಎಲ್ಲ ಜಾತಿಯ ತರುಣ ತರುಣಿಯರನ್ನೂ ತೊಡಗಿಸುವುದು ಮತ್ತು ಆ ಮೂಲಕ ಜಾತಿಯನ್ನು ಮೀರುವುದು. ನಮ್ಮ ತರುಣರು ನಗರಗಳನ್ನು ಹುಡುಕಿ ಹೋಗುವುದರ ಹಿಂದೆಯೂ ಈ ತತ್ವ ಅಡಗಿರುವಂತಿದೆ. ಕೃಪೆ : ವಿಜಯ ಕರ್ನಾಟಕ]]>

‍ಲೇಖಕರು G

September 11, 2012

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಲಂಕೇಶ್ ಅವರ ‘ಅಕ್ಷರ ಹೊಸಕಾವ್ಯ’ ದೊಡ್ಡ ವಿವಾದವನ್ನೇ ಏಳಿಸಿದ ಕಾವ್ಯ ಸಂಚಯ

ಜಿ.ಪಿ.ಬಸವರಾಜು 1970ರ ದಶಕದ ಆರಂಭದಲ್ಲಿ ಕತೆಗಾರ ಪಿ.ಲಂಕೇಶ್ ಅವರು ಸಂಪಾದಿಸಿದ 'ಅಕ್ಷರ ಹೊಸಕಾವ್ಯ' ಕನ್ನಡದಲ್ಲಿ ದೊಡ್ಡ ವಿವಾದವನ್ನೇ ಏಳಿಸಿದ...

ಲಂಕೇಶ್ ಅವರ 'ಅಕ್ಷರ ಹೊಸಕಾವ್ಯ' ದೊಡ್ಡ ವಿವಾದವನ್ನೇ ಏಳಿಸಿದ ಕಾವ್ಯ ಸಂಚಯ

ಜಿ.ಪಿ.ಬಸವರಾಜು 1970ರ ದಶಕದ ಆರಂಭದಲ್ಲಿ ಕತೆಗಾರ ಪಿ.ಲಂಕೇಶ್ ಅವರು ಸಂಪಾದಿಸಿದ 'ಅಕ್ಷರ ಹೊಸಕಾವ್ಯ' ಕನ್ನಡದಲ್ಲಿ ದೊಡ್ಡ ವಿವಾದವನ್ನೇ ಏಳಿಸಿದ...

೧ ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: