ನಾವಾಗ..

ದಾದಾಪೀರ್ ಜೈಮನ್

ನೀವು ನಮ್ಮ ಹೆಸರು ಕೇಳುತ್ತೀರಿ
ನಾವಾಗ
ಈ ಬೀದಿಯಲ್ಲಿ ರಾಧೆ ಆ ಬೀದಿಯಲ್ಲಿ ಮಜನು
ಅದರ ಪಕ್ಕದ ಓಣಿಯಲ್ಲಿ ಜ್ಯುಲಿಯೆಟ್
ನಿಮ್ಮ ಕಣ್ಣುಗಳು ಕೆಂಪಾಗುತ್ತವೆ
ನಾವಾಗ
ಈ ಬೀದಿಯಲ್ಲಿ ಮಳೆ, ಪಕ್ಕದ ಬೀದಿಯಲ್ಲಿ ಚಳಿ
ಅದರ ಪಕ್ಕದ ಓಣಿಗಳಲ್ಲಿ ಮಂಜು ಮಂಜಾಗಿ..
ನೀವಾಗ
ಮಂಜು ಮಂಜಾಗಿ
ದಿಕ್ಕೆಟ್ಟು ಓಡುತ್ತೀರಿ

ನೀವು ಜಾಗಗಳಿಗೆ ಬೇಲಿ ಹಾಕಿಸುತ್ತೀರಿ
ನಾವಾಗ
ಹೂ ಪರಿಮಳದ ಜಾಡಿನಲ್ಲಿ
ನೋಟಗಳು ಭೇಟಿಯಾಗಿ ಕಟ್ಟಿದ ಅದೃಶ್ಯ ಸೇತುವೆಯ
ನಡುವಲ್ಲಿ ಕೂಡಿಬಿಡುತ್ತೇವೆ
ತುಟಿಗಳು ಮುತ್ತಿಕ್ಕುತ್ತವೆ
ಬಾಹುಗಳು ಬೆಸೆದುಕೊಳ್ಳುತ್ತವೆ
ಆತ್ಮಗರ್ಭದಲ್ಲಿ ಕೆಂಪುಗುಲಾಬಿ ಕುಡಿಯೊಡೆಯುತ್ತದೆ

ನೀವು ಪ್ರೇಮಿಸಿದ್ದಕ್ಕೆ ಜುಲ್ಮಾನೆ ಹಾಕುತ್ತೀರಿ
ನಾವಾಗ
ಜೀವವಿಲ್ಲದ ನಿಮ್ಮ ಹಾಳೆಯ ಮೇಲೆ
ಪ್ರೇಮ ಪದ್ಯವ ಗೀಚಿ ನಿಮ್ಮ ಜೇಬಿಗಿಡುತ್ತೇವೆ

ನೀವು ನಮ್ಮನ್ನು ಗಲ್ಲಿಗೇರಿಸುವ ನಿರ್ಧಾರ ಮಾಡುತ್ತೀರಿ
ನಾವಾಗ
ನಿಮ್ಮೆದೆಯ ಗೂಡಿನೊಳಗೆ
ಪ್ರೀತಿ ಕಾವ್ಯವಾಗಲೆಂದು ಮಮತೆಯಿಂದ ಬೇಡುತ್ತೇವೆ

ನೀವು ಗುಂಡು ಹಾರಿಸುತ್ತೀರಿ
ನಾವಾಗ
ನಮ್ಮುಸಿರಿನ ನಿಶ್ವಾಸದಿಂದ
ಉಸುರುತ್ತೇವೆ
ಪ್ರೀತಿ ಪ್ರೇಮ ಪ್ಯಾರ್ ಮೊಹಬ್ಬತ್

ನೀವು ನಮ್ಮನ್ನು ಅಗಲಿಸಿ
ಬೇರೆ ಬೇರೆ ದಿಕ್ಕುಗಳಿಗೆ ಎಸೆಯುತ್ತೀರಿ
ನಾವಾಗ
ಹೂವಾಗಿ ಮೇಲೆದ್ದು ಪರಿಮಳವಾಗಿ ಭೇಟಿಯಾಗುತ್ತೇವೆ

ನೀವು ಗುಂಡು ಹಾರಿಸಿದ ಗರ್ವದಿಂದ
ನಿದ್ದೆ ಹೋಗಲು ಕಣ್ಣು ಮುಚ್ಚುತ್ತೀರಿ
ನಾವಾಗ
ನಿಮ್ಮ ಕನಸುಗಳಲ್ಲಿ ಬಂದು ಪ್ರೇಮಿಸುತ್ತೇವೆ
ಪ್ರೇಮಿಸುತ್ತಲೇ ಇರುತ್ತೇವೆ
ಕೊನೆಗೆ
ಪ್ರೇಮವೇ ನಾವಾಗುತ್ತೇವೆ

‍ಲೇಖಕರು Avadhi

December 12, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಹಳೆಯ ಮೌನ…

ಹಳೆಯ ಮೌನ…

ಸೌಜನ್ಯ ನಾಯಕ ಅಮ್ಮ, ಉಪ್ಪಿಟ್ಟು ಬೇಕುಎಂದು ಆಕೆ ಕೇಳಿದಾಗಲೆಲ್ಲನಿನ್ನದೆ ನೆನಪಾದರೂಉಣ ಬಡಿಸುತ್ತೇನೆ ಖುಷಿಯಿಂದಲೇಅವಳು ಇಷ್ಟಪಟ್ಟಿದೆಲ್ಲವನ್ನು...

ಅವನು ಮತ್ತು ಮಗು

ಅವನು ಮತ್ತು ಮಗು

ಡಾ ಪ್ರೀತಿ ಕೆ ಎ  ಅವನಿಗೆ ಮೈಕು ಸಿಕ್ಕಿದರೆ ಎಲ್ಲೆಂದರಲ್ಲಿ ಭಾಷಣ ಬಿಗಿವ ಖಯಾಲಿ ಚಪ್ಪಾಳೆ ತಟ್ಟಿದರೆಮತ್ತಷ್ಟು...

ಜೀವದ ಎರಕ

ಜೀವದ ಎರಕ

ನಾ ದಿವಾಕರ ಸವೆದ ಹಾದಿಯ ಮರೆಪೊರೆದ ದಾದಿಯ ತೊರೆಎರೆದ ಹಾಲನು ಸವಿದುವಿಷ ಒಸರುವೆಯೇಕೆ ಮಗೂ; ಒಡಲ ವಾತ್ಸಲ್ಯವ ತ್ಯಜಿಸುಮಡಿಲ ಒಲುಮೆಯ...

೧ ಪ್ರತಿಕ್ರಿಯೆ

  1. ಶ್ರುತಿ

    ಚಂದದ ಕವನ… ಸೂಕ್ತ ಆಶಯದೊಂದಿಗೆ ಸುಂದರ ಪ್ರಸ್ತುತಿ

    ಪ್ರತಿಕ್ರಿಯೆ

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This
%d bloggers like this: