ಭೂಗರ್ಭ ಜಾತರು

ಯಮುನಾ_ಗಾಂವ್ಕರ್

ಅಗುಳನ್ನ ಬೀಳಲು ಬಿಡದ ನನ್ನಬ್ಬೆ ಅಪ್ಪಂದಿರು
ನೇಗಿಲು ನೊಗದ ಸಂಗಾತಿಗಳು
ಕೊಟ್ಟಿಗೆಯೊಳಗಿನ ಜೋಡೆತ್ತುಗಳೇ ಸಂಪತ್ತಿವರದು.
ನಸುಕಿಂದ ಮುಸುಕಿನ ತನಕ
ಬೆವರು ಹಾಕಿ ಸಸಿ ಸಾಕುತ್ತ
ಚುಮುಚುಮು ಚಳಿಯ
ಅರೆಬೆಳಗಿಂದ ತಡರಾತ್ರಿ ತನಕ
ನೊಗಕ್ಕೆ ಜೊತೆ ನೀಡುತ್ತ ಸಾಗಿದ್ದರವರು…

ಆ ಜೋಪಡಿಯೊಳಗೂ ಈ ಹೊಲಗದ್ದೆಗೂ
ಜೀಕಿದ್ದಾರವರು ಜೀವದುಸಿರಾಗಿ…
ಶತಶತಮಾನಗಳ ವಾರಸುದಾರರಾಗಿ.

ಅವರ ಕಣ್ಹನಿಗಳಲಿ ಬೆರೆತ
ಮಣ್ಣು ನೆನೆನೆನೆದು,
ತೇವಗೊಂಡು, ಬಿತ್ತಿದ ಬೀಜ ಮೊಳೆತು,
ಆಳೆತ್ತರಕೆ ಬೆಳೆದು, ತುಂಬಿದವು
ಹಸಿದೊಡಲ ಖಜಾನೆಗಳ.
ಭೂಮಿಯೊಳಗೆ ಇಂಗಿಹೋದ ಹನಿ ನೀರಂತೆ,
ಖಾಲಿಯಾಗುತ್ತಲೇ ಮತ್ತೆ ಮತ್ತೆ ತುಂಬಿಸುತ್ತ ಸಾಗಿದರು ಅನುದಿನವೂ…

ಊರಲಾಗದ ಒಡೆದ ಹಿಮ್ಮಡಿಯಲ್ಲೇ
ಓಡುತ್ತೋಡುತ್ತ,
ಒಡಕು ಪಾದದ ಗುರುತು ಬಿಟ್ಟರು
ಬಿರುಕುಬಿಟ್ಟ ಹೊಲದೊಳಗೆಲ್ಲ.

ಕಣ್ಣಲ್ಲಿ ಕಣ್ಣಿಟ್ಟು ಕಾಯುತ್ತ,
ಹಾಲ್ಬತ್ತದ ತೆನೆ ಚಿವುಟುವವರ ಕಾದು
ಕದಿರು ಕದ್ದು ಕಡಿಯುವವರ ಓಡಿಸಿ
ಮಣ್ಣ ಕಣಕಣದ ಮನಸನರಿತು
ಜೀವಜಲವುಣಿಸಿ, ಪೈರು ಫಸಲನು ಹೊತ್ತು,
ಕನಸುಗಳ ಸುತ್ತಿಟ್ಟು
ಬಣಿವೆಯ ಗೋಪುರ ಕಟ್ಟಿದರವರು…

ಆದರೀಗೀಗ ಬರುತ್ತಿದ್ದಾರೆ
ಕೊಯ್ದು ಒಟ್ಟಿದ ಬಣಿವೆಗೆ ಕಡ್ಡಿಗೀರಲು.
ಅನ್ನದೊಳಗಿನ ನನ್ನಿಗೆ ಉರಿಯನಿಕ್ಕಲು.

ಬೆಳೆಯ ಒಕ್ಕುವ ಕಣದಲಿ ಸಾಗಿದೆ
ರೈತ-ರೈವತರ ರಣರಂಗ
ಸೆಲೆ ಬತ್ತಿಹೋದ ಹೀನ ಹೃದಯದವರಲಿ
ನೆರಳನರಸುವುದುಂಟೇ?
ಸೋಲು ಸುಳಿಯದಿರಲಿ ಭೂಗರ್ಭ ಜಾತರಿಗೆ!!

‍ಲೇಖಕರು Avadhi

December 16, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಜಗವನುದರದಿ ಧರಿಸಿದವಳು..

ಜಗವನುದರದಿ ಧರಿಸಿದವಳು..

ಸುಮಾ ಕಂಚೀಪಾಲ್ ಅವನದೊಂದು ಕುಡಿಹೊಟ್ಟೆಯ ಹೊಕ್ಕುಇಂಚಿಂಚಾಗಿ ಹಿಗ್ಗುತ್ತಿತ್ತು. ನಿಂತರೆ ನೆಲಕಾಣದಷ್ಟುಹಗಲು ರಾತ್ರಿಗಳುಕಳೆಯುತ್ತಿತ್ತು. ಅವಳ...

ಎಚ್ ಆರ್ ರಮೇಶ ಹೊಸ ಕವಿತೆ- ಸಾವು

ಎಚ್ ಆರ್ ರಮೇಶ ಹೊಸ ಕವಿತೆ- ಸಾವು

ಎಚ್ ಆರ್ ರಮೇಶ ಉದುರಬೇಕು, ಉದುರುತ್ತದೆ;ಕಾಯಬೇಕು ಕಾಯದೆ,ಅಳಿವಿಲ್ಲದೆ ಉಳಿವಿಲ್ಲ,ಜೀವಕ್ಕೆ ಗೊತ್ತಿರುವುದೇ ಇದು,...

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This