ಹಳೆಮನೆ ರಾಜಶೇಖರ್ ಕವಿತೆಗಳು

ಡಾ. ಹಳೆಮನೆ ರಾಜಶೇಖರ

ರೂಪಾಂತರ

ಮೊಲೆ ಹಾಲು ಕುಡಿದ ನಾಲಗೆ
ಮೃದತ್ವ ಕಳೆದುಕೊಂಡು ಕಠಿಣ ಕಠಾರಿಯಾಗಿ
ಮೊಲೆ ಹಾಲ ತೊಟ್ಟುಗಳ ಸೀಳಿ ರಕ್ತ ಕುಡಿಯುತಿರುವುದು

ಯೋನಿಯಿಂದ ಹೊರಬಂದ ಜೀವ
ಉದ್ದಂಡ ಮಾರ್ತಾಂಡನಾಗಿ
ನವಿಲ ಗರಿಯ ಕತ್ತರಿಸುವ ಕುವರನಾಗಿ
ಗರ್ಭಕೋಶವ ಹೊಕ್ಕು, ಜೀವಗಳ ಮುಕ್ಕುತಿಹನು

ಪಾದಳಿಗೆ ಗೆರೆ ಹಾಕಿ ನಡೆಯುವದ ಕಲಿಸಿದ ಕೈಗಳು
ತ್ರಿಶೂಲಗಳಾಗಿ ಅಂಗಾಲುಗಳ ಸೀಳಿ ರಕ್ತ ಬಸೆದು
ಬಾಂಬುಗಳ ಬೀಜ ಬಿತ್ತಿ ಗಗನಯಾಮಿಯಾಗಿ
ಅಗ್ನಿ ಮಳೆಯ ಸುರಿಯುತಿಹದು

ಅಕ್ಷರಗಳ ಕಲಿಸಿದ ಧ್ವನಿಪೆಟ್ಟಿಗೆ ಕೂಗುಮಾರಿಯಾಗಿ
ಮಾತುಗಳನು ಮೊನಚು ಮಾಡಿ ಬಾವಕೋಶಗಳ
ಲಯಗಳನು ಮಣ್ಣು ಮಾಡಿ ಸ್ಮಶಾನದ ಹಾಡು ಹಾಡುತಿದೆ

ಮೃದುವಾದ ನಾಲಗೆಯ ಮೇಲೆ
ರಕ್ತ ಮೆತ್ತಿದ ಕಠಾರಿಯ ಹಿಡಿದು
ಶಾಸನಗಳ ಬರೆಯುತಿಹರು

ಜೀವ ಉಸಿರುವ ಹೃದಯಗಳು ಗಾಯಗೊಂಡು
ಅರೆಬರೆಯ ಜೀವ ಹಿಡಿದು ನರಳುತಿವೆ
ರಕ್ತ ನಾಳದ ಕೊಳವೆಗಳು ತೂತುಬಿದ್ದು
ರಣಕಹಳೆ ಊದುತಿವೆ.

ಯಂತ್ರ ಮಾಂತ್ರಿಕರು

ಕಪ್ಪು ನಾಲಿಗೆಯ ಬಿಳಿ ತಲೆಯ
ನಭೋವೀರರು ಉಕ್ಕಿನ ರೆಕ್ಕೆಯ ಹೊತ್ತು
ಥಳ ಥಳಿಪ ಝಗಮಗಿಸುವ ಕೆಂಡಗಳ ಹಿಡಿದು
ಕೊತಕೊತನೆ ಕುದಿಸಲು ಬರುತ್ತಿದ್ದಾರೆ

ಬಹು ನಾಲಿಗೆಗಳ ಸುಟ್ಟು ಒಂದೆ ನಾಲಿಗೆಯ
ಅಚ್ಚು ಹಾಕಿಸಿ ಅಚ್ಚಿಗೆ ತಕ್ಕಂತೆ
ನಾಲಗೆಯ ಓರೆ ಕೋರೆಯ ಕತ್ತರಿಸಿ
ಸಪೂಟ ಮಾಡುವವರು

ಆಗಾಗ ಧ್ವನಿ ಮಾಡುವ ನಾಲಗೆಗಳಿಗೆ
ಅರವಳಿಕೆ ನೀಡಿ, ನೋಯದಂತೆ ಬರೆ ಹಾಕಿ
ನಕ್ಷತ್ರಾಕಾರಕ್ಕೆ ಕೊರೆದು
ಮೋಡದಲ್ಲಿ ಬಿತ್ತನೆ ಮಾಡುವವರು

ಬಂದೂಕಿನ ಭದ್ರತೆಯಲ್ಲಿ ಅರಮನೆಗಳ ಕಟ್ಟಿ
ಸಾಲು ಸಾಲು ಗಂಜಿ ಕೇಂದ್ರಗಳ ನರ‍್ಮಿಸಿ
ಅರವಟಿಗೆಗಳ ಅರಳಿಸುವವರು

ಕೂಸುಗಳ ಕೊರಳ ಕೊಯ್ದು
ಮೃದು ಪಾದಗಳ ಬೆರಳ ಕತ್ತರಿಸಿ
ಚಿತ್ತ ಚಿತ್ತಾರದ ಗೊಂಬೆಗಳ ಮಾಡಿ
ಅರಮನೆಗೆ ಅಲಂಕಾರ ಮಾಡುವವರು

ಕಿವಿ ಮೂಗು ತುಟಿಗಳ ಹೊಲೆದು
ಉಸಿರಿಗೆ ವಿಷದ ಬಟ್ಟೆಯ ತೊಡಿಸಿ
ನರನಾಡಿಗಳ ಉರಿಗೊಳಿಸಲು
ಬೆಂಕಿ ಜ್ವಾಲೆಗಳ ಬಿತ್ತಿ ಬೆಳೆವವರು

ಕೈ ಕೈ ಕೂಡದ ಹಾಗೆ
ಹೃದಯ ಹೃದಯ ಬಡಿಯದ ಹಾಗೆ
ಗೋಡೆಗಳ ಕಟ್ಟುವವರು

ಕಣ್ಣುಗಳಿಗೆ ಕಳ್ಳಿ ಹಾಲು ಬಿಟ್ಟು
ಕನ್ನಡಕ ಕೊಡಿಸುವವರು

ಮೊಲೆ ತೊಟ್ಟುಗಳ ಹಿಂಡಿ
ಹಾಲುಂಡು ತೇಗುವವರು

ಶಾಪ

ಯೋನಿ ಬಟ್ಟಲಲ್ಲಿ ಬೆಂಕಿ ಮಳೆ ಸುರಿಸಿ
ಹಸಿರು ಉದ್ಯಾನ ಮಾಡುವ ತಾಯ್ಗಂಡರ
ಮರ್ಮಾಗಂಗಳಿಗೆ ಮುಳ್ಳು ಬೆಳೆದು
ರಕ್ತ ನಾಳಗಳು ಪಾಚಿಗಟ್ಟಿ
ಅಂಗಾಗಳೆಲ್ಲ ಲಾವರಸದಲ್ಲಿ ಕುದ್ದು ಹೋಗಲಿ

ಬೇಟೆಯಾಡುವ ಶೀಳು ನಾಯಿಗಳ
ತೊಗಲು ಮೂಸಿ ನೋಡುವ
ಮೋಹದ ಮನ್ಮಥಲೀಲೆ
ಅಗ್ನಿಕುಂಡದಲಿ ಆಹತಿಯಾಗಲಿ

ಸುಖಾಣುವಿನ ನಳಿಗೆಯಲ್ಲಿ ತೂರಲೆಣಿಸುವ
ತೋರು ಬೆರಳಿನ ಮುಖೇಡಿಗಳು
ಅಮಾಯಕ ಕಂದಮ್ಮಗಳ ಕೆಚ್ಚಲಿಗೆ
ಕತ್ತಿಯಾಡಿಸುವ ಅರ್ಬುದರು
ನರಕದ ಕೆಂಡದುಂಡೆಯ ನರ್ತಕಿಯರ
ಆಲಂಗನದಲಿ ಆವಿಯಾಗಲಿ

ಕೂಟಗಳ ಹುತ್ತ ಹೂಡಿ
ಅಂಗನೆಯರ ಹರಿದು ಮುಕ್ಕುವ
ರಕ್ತ ಸಿಕ್ತ ನಾಲಗೆಗಳು
ಕಾದ ಕಬ್ಬಿಣದ ಚೂರು ತಿಂದು
ಜ್ವಾಲಮುಖಿಯ ಹಾಸು ಹೊದ್ದು ಮಲಗಲಿ

‍ಲೇಖಕರು Avadhi

October 12, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಚೆಗೆವಾರ

ಚೆಗೆವಾರ

ಪಿ ಆರ್ ವೆಂಕಟೇಶ್ ನಿಜವೆಂದು ನಂಬಿಸಿದ ನಿಜಗಳೆದೆಯನು ಸೀಳಿಕೆಂಡದುಂಡೆಯಮೇಲೆ ಎದ್ದು ನಿಂತವನೆ ಹೆಗಲ ಮೇಲೆ ಕೋವಿ ಎದೆಯೊಳಗೆ ಗುಲಾಬಿದೂರಗಳ...

ಖಲೀಲ್ ಗಿಬ್ರಾನ್ ಕವಿತೆ ‘The Poet’

ಖಲೀಲ್ ಗಿಬ್ರಾನ್ ಕವಿತೆ ‘The Poet’

ಮೂಲ ಆಂಗ್ಲ ಲೇಖಕರು: ಖಲೀಲ್‌ ಗಿಬ್ರಾನ್ ಕನ್ನಡಕ್ಕೆ -ಚೈತ್ರಾ ಶಿವಯೋಗಿಮಠ ಕವಿ ಇವನು, ಭೂತ - ಭವಿತವ್ಯದನಡುವಿನ ಕೊಂಡಿಜಗದ ಪ್ರತಿ...

ಮಗುವಂತೆ ಕವಿತೆ..

ಮಗುವಂತೆ ಕವಿತೆ..

ಡಾ.ಗೋವಿಂದ ಹೆಗಡೆ ಮಗುವಂತೆ ಕವಿತೆ ಕವಿತೆಗಳಲ್ಲಿ ಕೆಲವುಜುಳುಜುಳು ಹರಿವ ನದಿಇಕ್ಕೆಲದ ದಡವ ತಟ್ಟುತ್ತ ತಬ್ಬುತ್ತಇನ್ನು ಕೆಲವು ಜೋರಾಗಿಸುರಿವ...

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This