ಹೀಗೇ ಒತ್ತಡದ ನಡುವೆ ಬರೆದದ್ದು..

naa-divakar

ನಾ ದಿವಾಕರ

( ನೋಟು ವಿನಿಮಯ ಮತ್ತು ಜನಸಾಮಾನ್ಯರ ಪರದಾಟಕ್ಕೆ ಸ್ಪಂದಿಸುವ ನಿಟ್ಟಿನಲ್ಲಿ ಕಪ್ಪು ಹಣ ಮತ್ತು ನೋಟು ಅಮಾನ್ಯೀಕರಣವನ್ನು ಕುರಿತು ಗಂಭೀರವಾಗಿ ಕುಳಿತು ಯೋಚಿಸುವ ವ್ಯವಧಾನವನ್ನೂ ಕಳೆದುಕೊಂಡಿದ್ದೆ. ಬೆಳಿಗ್ಗೆ 9 ರಿಂದ ರಾತ್ರಿ 9ರವರೆಗಿನ ಬ್ಯಾಂಕ್ ಕೆಲಸದ ಒತ್ತಡಗಳ ನಡುವೆ ಆಗಾಗ್ಗೆ ತೋಚಿದ ಫೇಸ್ ಬುಕ್ ನಲ್ಲಿ ಗೀಚಿದ ಕೆಲವು ಸಾಲುಗಳು ಇಲ್ಲಿವೆ. ಇವು ನ್ಯಾನೋ ಕಥೆಗಳೋ, ಅನಿಸಿಕೆಗಳೋ, ಹೈರಾಣಾದ ಮನಸ್ಸಿನ ಹುಚ್ಚು ಕೋಡಿ ಮಾತುಗಳೋ. ಓದಿ ಆನಂದಿಸಿ )

fill-in1

ನೆಲ ಸಮ ಮಾಡಲು ಜೆಸಿಬಿ ಬಾಗಿಲ ಹೊರಗೆ ನಿಂತಿತ್ತು
ನೆಲ ಗುಡಿಸುತ್ತಿದ್ದವ ಕೇಳಿದ, ಸಮ ಎಂದರೇನು ?

fill-in1

 

ತಾನು ಹಾಕಿದ ಗಾಳಕ್ಕೆ ಸಹಸ್ರ ಮೀನುಗಳು ಸಿಲುಕುತ್ತಿರುವುದನ್ನು ಕಂಡು ಸಂಭ್ರಮಿಸುತ್ತಿದ್ದ ಮೀನುಗಾರನಿಗೆ ದೂರದಲ್ಲಿದ್ದ ತಿಮಿಂಗಿಲವೊಂದು ಹೇಳಿತು –
ಮೊದಲು ನಾನು ಹಾಕುವ ಗಾಳದಿಂದ ತಪ್ಪಿಸಿಕೋ ನೋಡೋಣ !

fill-in1

ಕೊಳೆಗೇರಿಯೊಂದರ ಪಕ್ಕದಲ್ಲೇ ತನ್ನ ಬೃಹತ್ ಸೌಧ ನಿರ್ಮಿಸಲು
ಗುದ್ದಲಿ ಪೂಜೆ ನಡೆಸುತ್ತಿದ್ದ ಧನಿಕನಿಗೆ ಗಂಟೆ ಜಾಗಟೆಗಳ ನಡುವೆಯೂ
ಸಣ್ಣ ನಗುವೊಂದು ಕೇಳಿಸಿತು – ದೂರದಲ್ಲೊಂದು ತಲೆಬುರುಡೆ ಬಾಯ್ಬಿಟ್ಟು ಕುಳಿತಿತ್ತು !

fill-in1

 

ಅತ್ಯಂತ ಜನಪ್ರಿಯ ರಾಜಕೀಯ ನಾಯಕನೊಬ್ಬನನ್ನು ಮಾಧ್ಯಮ ಮಿತ್ರನೊಬ್ಬ ಕೇಳಿದ

– ಸ್ವಾಮಿ ನಿಮಗೆ ಜನಸಾಮಾನ್ಯರ ನಾಡಿ ಮಿಡಿತ ಅರಿವಾಗುತ್ತದೆಯೇ ?
ಥಟ್ಟನೆ ಜನನಾಯಕ ಕೇಳಿದ – ನಾಡಿ ಅಂದ್ರೇನಯ್ಯಾ ?’

fill-in1

ಆರು ಗಂಟೆಗಳ ಕಾಲ ಬಿಸಿಲ ಝಳಪಿನಲ್ಲಿ ನಿಂತು ಹೈರಾಣಾಗಿ

ಒಂದು ನೋಟು ಕೈಯ್ಯಲ್ಲಿ ಹಿಡಿದು ಮನೆಗೆ ಹಿಂದಿರುಗಿದವನನ್ನು ಅವನ ಮನೆಯ ಸಾಕು ನಾಯಿ ಕೇಳಿತು –
ನಾನೆಂದಾದರೂ ಕ್ಯೂನಲ್ಲಿ ನಿಂತಿರುವುದನ್ನು ನೋಡಿದ್ಯಾ ?

fill-in1

ಮೂರೇ ಜನರಿದ್ದ ತನ್ನ ಕುಟುಂಬಕ್ಕೆ ಮೂವತ್ತು ಅಂತಸ್ತಿನ ವೈಭವೋಪೇತ ಬಂಗಲೆಯನ್ನು

ಕಟ್ಟಿಸಿದ ಧನಿಕ ಹರುಷ ಉಕ್ಕಿ ತನ್ನ ಬಿಎಂಡಬ್ಲ್ಯು ಕಾರನ್ನು ಏರಲು ಹೋಗಿ,

ಪಂಚರ್ ಆಗಿದ್ದ ಕಾರಿನ ಟೈರ್ ನಲ್ಲಿ ಸಿಲುಕಿದ್ದ ಮೂಳೆಯ ತುಂಡನ್ನು ನೋಡುತ್ತಲೇ ನಿಂತುಬಿಟ್ಟ.

fill-in1

 

ಹೃದಯ ಸಂಬಂಧಿಯೊಬ್ಬರ ಶವಸಂಸ್ಕಾರ ಮುಗಿಸಿ ಮಸಣದಿಂದ

ಹೊರಬರುತ್ತಿದ್ದವನಿಗೆ ಕೀರಲು ದನಿಯೊಂದು ಕೇಳಿಸಿತು

– ನಿನ್ನ ಮುಂದಿನ ಹಾದಿ ಯಾವುದಯ್ಯಾ ?
ಅವನು ನಿರುತ್ತರನಾದ !

fill-in1

ತಾನು ಮುಟ್ಟಿದ್ದೆಲ್ಲಾ ಚಿನ್ನವಾಗುತ್ತದೆ ಎಂಬ ಭ್ರಮೆಯಲ್ಲಿರುವ

ದೊರೆಗೆ ತನ್ನ ಅಂಗಾಂಗಗಳ ಪರಿವೆ ಇರಬೇಕಲ್ಲವೇ ?

fill-in1

ಜೀವನವಿಡೀ ದೇವಸ್ಥಾನದ ಹೊರಗೆ ಬಿಡಿಗಾಸು ಭಿಕ್ಷೆಗಾಗಿ ಸಾಲಿನಲ್ಲಿ
ನಿಂತು ಹೈರಾಣಾಗಿದ್ದ ವ್ಯಕ್ತಿಯೊಬ್ಬ ಹೇಳಿದ – ನನ್ನ ಭಾರತ ಬ್ಯಾಂಕುಗಳ ಮುಂದಿದೆ ನೋಡಾ !

fill-in1

ಶವಾಗಾರವನ್ನು ಪ್ರವೇಶಿಸಿದ ಹೊಸ ಮೃತಾತ್ಮವನ್ನು ಅಲ್ಲಿಯೇ ತಂಗಿದ್ದ
ಮತ್ತೊಂದು ಆತ್ಮ ಪ್ರಶ್ನಿಸಿತು

– ನಿನಗೆ ಎಷ್ಟು ನೋಟುಗಳು ಸಿಕ್ಕಿದವು ?

fill-in1

ನೋಟು ವಿನಿಮಯದ ಭರಾಟೆಯಲ್ಲಿದ್ದ ಬ್ಯಾಂಕ್ ನೌಕರನೊಬ್ಬನ

ಕಿವಿಯ ಬಳಿ ಕುಳಿತ ಸೊಳ್ಳೆಯೊಂದು ಕಚ್ಚಲು ಹಿಂಜರಿದು ಮೆಲ್ಲನೆ ಉಸುರಿತು
– ನಿನ್ನಲ್ಲಿ ರಕ್ತವೇ ಇಲ್ವಲ್ಲೋ !!!!

fill-in1

ಶ್ರೀಮಂತರ ಮನೆಯ ರಾಜವೈಭೋಗದ ಮದುವೆಯೊಂದರಲ್ಲಿ
ಮಾಂಗಲ್ಯಂ ತಂತುನಾನೇನಾ ಎಂಬ ಮಂತ್ರವನ್ನಾಲಿಸಿದ ಶ್ರಮ ಜೀವಿಯೊಬ್ಬ
ಪುರೋಹಿತರನ್ನು ಕೇಳಿದ, ಸ್ವಾಮಿ ಮಾಂಗಲ್ಯದ ತಂತು ನಾನೇನಾ ?

fill-in1

ದಿನವಿಡೀ ಬೆವರು ಸುರಿಸಿ ಕೂಲಿನಾಲಿ ಮಾಡುತ್ತಾ ಹಸಿದು ಬೆಂದ
ವ್ಯಕ್ತಿಯೊಬ್ಬ ಒಂದು ನೋಟಿಗಾಗಿ ಸಾಲಿನಲ್ಲಿ ನಿಂತಾಗ ಅವನ ನೋಟ
ವೇಗದಿಂದ ಚಲಿಸುತ್ತಿದ್ದ ಬಿಎಂಡಬ್ಲ್ಯು ಕಾರಿನ ಮೇಲಿತ್ತು.

fill-in1

ಇನ್ನು ಮುಂದೆ ಮನೆಯಲ್ಲಿ ಸಾವು ಸಂಭವಿಸಿದರೆ ಆತಂಕ ಬೇಕಿಲ್ಲ.

ಶವ ಸಾಗಿಸಲು ಯಾವುದೇ ಸಹಕಾರ ದೊರಕದೆ ಇದ್ದಲ್ಲಿ

ಹತ್ತಿರದಲ್ಲಿರುವ ಯಾವುದೇ ಸಾರ್ವಜನಿಕ ಬ್ಯಾಂಕ್ ಶಾಖೆಯನ್ನು ಸಂಪರ್ಕಿಸಿ

. ಕನಿಷ್ಠ ನಾಲ್ಕು ಸಿಬ್ಬಂದಿ ಇದ್ದೇ ಇರುತ್ತಾರೆ.

fill-in1

ಜೈಲಿನಲ್ಲಿದ್ದ ಅಕ್ರಮ ಆಸ್ತಿಯ ಒಡೆಯನ ರಾಜವೈಭವದ ಭಾಜಾ ಭಜಂತ್ರಿಯ ನಡುವೆ

ಪರಾರಿಯಾಗಿದ್ದ ವಂಚಕನೊಬ್ಬನಿಗೆ ರತ್ನಗಂಬಳಿಯ ಸ್ವಾಗತ

– ಅಮಾನ್ಯೀಕರಣವಾದದ್ದು ಹಳೆಯ ನೋಟುಗಳೋ ನೈತಿಕ ಮೌಲ್ಯಗಳೋ ?

fill-in1

ಕಿಂಗ್ ಫಿಷರ್ ಹಕ್ಕಿ ಸಂಕುಲದ ಒಡೆಯನ ಎದುರು ನಿಂತ
ಸಾವಿರ ರೂ ಮೌಲ್ಯದ ಕರೆನ್ಸಿ ನೋಟ್ ಹೇಳಿತು – ” ನೀನೇ ಅದೃಷ್ಟವಂತ ಕಣಯ್ಯಾ “!

fill-in1

ಶವ ಸಾಗಿಸುತ್ತಿದ್ದ ವಾಹನವೊಂದು ಪ್ರಪಾತಕ್ಕೆ ಬಿದ್ದು ವಾಹನದಲ್ಲಿದ್ದವರೆಲ್ಲೂ
ಶವಗಳಾದರು. ಕಮರಿಯೊಳಗಿಂದ ಸಣ್ಣ ಕೇಕೆಯೊಂದು ಕೇಳಿಸಿತು.

fill-in1

ತನ್ನ ಯಜಮಾನನ ಸೇವೆಯಲ್ಲಿ ದಿನವಿಡೀ ದುಡಿದು ದಣಿದು ಬೆವರಿಳಿಸಿ
ಮುಸ್ಸಂಜೆಯ ವೇಳೆಗೆ ಉಸ್ಸಪ್ಪಾ ಎಂದು ವಿರಮಿಸಿದ ಕತ್ತೆಯ ಬೆನ್ನಮೇಲೆ
ಯಜಮಾನ ಮತ್ತೊಂದು ಹೊರೆ ಹೊರಿಸಿದಾಗ ಕತ್ತೆ ಮನದಲ್ಲೇ ಹೇಳಿತು

– ಕತ್ತೆ ನಾನಲ್ಲ ಅವನು !

fill-in1

 

ಔದಾರ್ಯದ ಭಾವದಲ್ಲಿ ಶ್ರೀಮಂತನೊಬ್ಬ ದಾನ ಮಾಡಿದ ಒಂದು ದಟ್ಟಿ ಪಂಚೆ
ಈ ಹಿಂದೆ ತನ್ನಿಂದಲೇ ನಗ್ನರಾಗಿದ್ದವರ ಇತಿಹಾಸವನ್ನೇ ಮುಚ್ಚಿಹಾಕಿಬಿಟ್ಟಿತು.

fill-in1

ಇತಿಹಾಸದ ಕಂದಕಗಳಲ್ಲಿ ಗುಲಾಬಿಯ ಸುಗಂಧ ಶೋಧಿಸುತ್ತಿದ್ದಾಗ
ಕಾಲಿಗೆ ನೆಟ್ಟ ಮುಳ್ಳು ನೆನಪಿಸಿತು – ಎಲ್ಲಿರುವೆನೆಂದು !

fill-in1

ಹಾರಿ ಹೋಗುತ್ತಿದ್ದ ಪ್ರಾಣಪಕ್ಷಿಯನ್ನು
ಹಿಡಿಯಲು ಹೋದವ ಮರಳಲೇ ಇಲ್ಲ
ಪಕ್ಷಿಯೊಂದು ಕಾಯುತ್ತಲೇ ಇತ್ತು !

fill-in1

ಹೋರಾಟದ ಸಾಗರಕ್ಕೆ ಸಾವಿರಾರು ನದಿಗಳು
ಮಾರಾಟದ ಕಡಲಿನಲಿ ಬಿಸಿಲು ಬೆಳದಿಂಗಳು
ನದಿಗಳು ಬತ್ತಿಹೋಗುತ್ತಿವೆ ಬಿಸಿಲು ಝಳಪಿಸುತ್ತಿದೆ
ಬೆಳದಿಂಗಳ ತಂಪಿನಲಿ ತೋಳಗಳು ಸಂಭ್ರಮಿಸುತ್ತಿವೆ.

fill-in1

ಬೆವರಿನ ಗುಳ್ಳೆಯೊಂದು ಅದ್ಧೂರಿ ಮದುವೆಯ
ಸುಗಂಧ ದ್ರವ್ಯಗಳ ನಡುವೆ ನುಸುಳಲು ಯತ್ನಿಸಿದಾಗ
ಬೂಟುಗಾಲುಗಳಡಿ ಸಿಲುಕಿ ನಲುಗಿಹೋಯಿತು
ಚೀತ್ಕಾರವನು ಕೇಳಿಸಿಕೊಂಡ
ನೆತ್ತರಿನ ಬಿಂದು ಮತ್ತೊಂದು ಬದಿಯಿಂದ
ಕೂಗಿ ಹೇಳಿತು
ನೀ ನನ್ನೊಡನೆ ಬಾ, ನಾವಿಬ್ವರೂ ಒಂದಾಗೋಣ !
ಸೆಲ್ಫಿಗಳ ಭರಾಟೆಯಲಿ ಗಾಂಧರ್ವ ವಿವಾಹ
ಗಮನಕ್ಕೇ ಬರದೆ ಹೋಯಿತು !

‍ಲೇಖಕರು Admin

November 21, 2016

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ಒಂದು ಆಕಸ್ಮಿಕ ಅವಘಡದ ಜಾಡು ಹಿಡಿದು…

ಒಂದು ಆಕಸ್ಮಿಕ ಅವಘಡದ ಜಾಡು ಹಿಡಿದು…

 ರೇಷ್ಮಾ ನಾಯ್ಕ ಅಡವಿಯ ಹತ್ತಿರದ ಶಾಲೆಗಳಲ್ಲಿ ಕೆಲಸ ಮಾಡುವ ನಮ್ಮಂಥವರಿಗೆ ಗಾಡಿ ಓಡಿಸುವಾಗ ಒಂದು ಅಪಾಯದ ಮುನ್ಸೂಚನೆ ಯಾವಾಗಲೂ...

ಸಲೀಂ ನನ್ನ ಜೀವದ ಅವಿಭಾಜ್ಯ ಅಂಗ

ಸಲೀಂ ನನ್ನ ಜೀವದ ಅವಿಭಾಜ್ಯ ಅಂಗ

ಅಂಜಲಿ ರಾಮಣ್ಣ ಇಂದು ಅಂತಾರಾಷ್ಟ್ರೀಯ ಮಕ್ಕಳ ಹಕ್ಕುಗಳ ಸಪ್ತಾಹದ ಕೊನೆಯ ದಿನ ಇದರ ಅಂಗವಾಗಿ 'ಮಕ್ಕಳ ಕಲ್ಯಾಣ ಸಮಿತಿ' ಅಧ್ಯಕ್ಷರೂ, 'ಅಸ್ತಿತ್ವ...

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This