ಹ್ಳುಹ್ಳುಹ್ಳುಳ್ಳಾಯೀ

ಲಲಿತಾ ಸಿದ್ಧಬಸವಯ್ಯ

ಅಕ್ಕಾ ಕೇಳೇ
ನಾನೂ ಒಂದು ಕನಸ ಕಂಡೆ
ಕನಸಿನ ತುಂಬ ಗಂಡರ ಕಂಡೆ
ಒಬ್ಬರಾದ ಮೇಲೊಬ್ಬರ ಪಾಳಿ
ತಾಳಿಯ ಮೇಲೆ ತಾಳಿ ತಾಳಿ
ಕೊರಳೊಳಗಿದ್ದೇ ಹಳೇನೂಲು
ಒಂದರ ಮೇಲೊಂದು ಜೋಲು
ಮುಂಡೆಯ ಪಟ್ಟ ಬಾರದೆ ಎನಗೆ
ಹೊಸಹೊಸ ಗಂಡರ ನಿತ್ಯ ಒಸಗೆ
ಲಜ್ಜೆಯ ತೊರೆದು ಸಜ್ಜೆಯನೇರಿ
ವರ್ಷವರ್ಷವು ಮಕ್ಕಳು ಹುಟ್ಟಿ
ಮಕ್ಕಳೆ ಮತ್ತೆ ಗಂಡರು ಎನಗೆ
ನಿತ್ಯಯೌವನದ ಪಥ್ಯದ ಮರ್ಮ
ಈ ಪೃಥುವಿಗೆ ಬಂದ ಬಿಟ್ಟೀ ವರವು
ಬಂದವರೆಲ್ಲ ತಿಂದೇ ಹೋದರೂ
ಒಲೆಯ ಕೊಳ್ಳಿ ಆರದು ನೋಡು

-೨-

ಒಬ್ಬನೆ ಗಂಡಗೆ ಹೆದರಿದೆ ನೀನು
ಮಂಡೆಯ ಕೆದರಿ ಊರೇ ತೊರೆದೆ
ಇಲ್ಲದ ನಲ್ಲನ ಕರೆಯುತ ಹೋದೆ
ಹೊರದೆ ಹೆರದೆ ನೀ ಅಕ್ಕ ಮಾತ್ರ‌ವೆ
ಅಮ್ಮನೂ ಆಗಿ ನಾ ಅಕ್ಕನೂ ಆಗೀ
ಹೆಂಡಿರೂ ಆಗಿ ಅತ್ತೆಯೂ ಆಗಿ
ನನ್ನ ಮಗಳೇ ನನ ಸವತೀ ಕಾಣೆ
ಕುಗ್ಗದೆ ಸಿಗ್ಗದೆ ದಿನ ಪ್ರಸ್ತದ ಕೋಣೆ
ವ್ಯಾಜ್ಯದ ಮೇಲೆ ವ್ಯಾಜ್ಯಗಳಾಡಿ
ಹಳೆಯ ಗಂಡರ ಹೊಸಬರು ಕೊಂದು
ಹೊಂದುವರೀ‌ ನವವಧುವ ನೋಡೇ
ಮೈಯಿಗೆ ಮೈಯ್ಯಿ ಬೆಸೆಯುವಾಗಲೇ
ಕೊರಳು ಸೀಳಿಸುವ ತಂತ್ರವು ಸಿದ್ಧ
ಗದ್ದುಗೆಯೊಳಗಂಥದ್ದೇನಿದೆ ಹೇಳೇ
ಅಳಲೂ ಕೂಡಾ ಪುರಸೊತ್ತಿಲ್ಲವೇ
ಇಂದಿನ ಗಂಡನ ಸಾವಿನ ವಾರ್ತೆ
ಜೊತೆಗೇ ಬರುವುದು ಲಗ್ನಪತ್ರಿಕೆ

-೩-

ಅಕ್ಕಾ ಕೇಳೇ ನಾ ಕಂಡುದೆಲ್ಲವೂ
ಕನಸಲ್ಲಕ್ಕ, ನಾನೊರೆದುದೆಲ್ಲವೂ
ಕಥೆಯಲ್ಲಕ್ಕ, ಕದಳಿಯ ಕದಲಿಸಿ
ಹೊರಗಡೆ ಬಾರೇ ಚೆನ್ನಯ್ಯನ ನೀರೇ
ನಾ ಧರಣೀದೇವಿ ಕರೆವನು ಬಾರೇ
ಇದುವೆ ಇಲ್ಲಿನ ಸಚ್ಚನಿಚ್ಚದ ನಿಜವೇ 
ಗದ್ದುಗೆ ಗುಣಿ ತಳಗರಚುವ ಪಿಶಾಚಕೆ
ತೊಟ್ಟಿಲ ಹಬ್ಬ ತೂಗಲು ಬಾ ಬಾರೇ
ಹ್ಲುಹ್ಳುಹ್ಳುಆಯೀ ಪಾಚ್ಚಳ್ಳೊ ಪಿಶಾಚೀ
ಹ್ಲುಹ್ಳುಹ್ಳುಆಯೀ ಪಾಚ್ಚಳ್ಳೊ ಪಿಶಾಚೀ
ಹ್ಲುಹ್ಳುಹ್ಳುಆಯೀ ಪಾಚ್ಚಳ್ಳೊ ಪಿಶಾಚೀ
ಹಾಡೋಣಾ ಬಾರೆ ಪಿಶಾಚಜೋಗುಳ
ಹ್ಲುಹ್ಳುಹ್ಳುಆಯೀ ಪಾಚ್ಚಳ್ಳೊ ಪಿಶಾಚೀ
ಈ ಮರಿಪಿಶಾಚಿಯೇ ನಾಳೆಯ ವರನು
ಒಟ್ಟಿಗೆ ಲಗ್ನದ ಊಟವನುಂಡು ಹೋಗೇ

-೪-
ಅಕ್ಕಾ ಕೇಳೇ 
ಕನಸಲು ಕೂಡಾ ಒಬ್ಬನೆ ಚೆನ್ನನ‌ ಪುಣ್ಯಸ್ತ್ರೀಯೆ
ನೀ ಹೊರಡುವ ಮೊದಲು ನಿಜವ ಹೇಳುವೆ
ನನಗೆ ಕನಸೇ ಬೀಳುವುದಿಲ್ಲವೇ

‍ಲೇಖಕರು Avadhi

December 16, 2020

ಹದಿನಾಲ್ಕರ ಸಂಭ್ರಮದಲ್ಲಿ ‘ಅವಧಿ’

ಅವಧಿಗೆ ಇಮೇಲ್ ಮೂಲಕ ಚಂದಾದಾರರಾಗಿ

ಅವಧಿ‌ಯ ಹೊಸ ಲೇಖನಗಳನ್ನು ಇಮೇಲ್ ಮೂಲಕ ಪಡೆಯಲು ಇದು ಸುಲಭ ಮಾರ್ಗ

ಈ ಪೋಸ್ಟರ್ ಮೇಲೆ ಕ್ಲಿಕ್ ಮಾಡಿ.. ‘ಬಹುರೂಪಿ’ ಶಾಪ್ ಗೆ ಬನ್ನಿ..

ನಿಮಗೆ ಇವೂ ಇಷ್ಟವಾಗಬಹುದು…

ನೆನಪೇ ನೀನದೆಷ್ಟು ಸುಂದರ

ನೆನಪೇ ನೀನದೆಷ್ಟು ಸುಂದರ

ಸರೋಜಿನಿ ಪಡಸಲಗಿ ತಲೆ ತುಂಬ ಗೋಜಲು ಗೊಂದಲಎದೆ ತುಂಬ ನೆನಪುಗಳ ನೆರವಿ||ಕಣ್ಣಂಚಲಿ ಕಂಡೂ ಕಾಣದ ತೇವುತುಟಿಯಂಚಲೊಂದು ಹೂ ನಗು||ಮನದಿ ಮೌನ ರಾಗದ...

ನಾಗರಾಜ್ ಹರಪನಹಳ್ಳಿ ಹೊಸ ಕವಿತೆಗಳು- ಧ್ಯಾನ ಮತ್ತು ಪ್ರೀತಿ

ನಾಗರಾಜ್ ಹರಪನಹಳ್ಳಿ ಹೊಸ ಕವಿತೆಗಳು- ಧ್ಯಾನ ಮತ್ತು ಪ್ರೀತಿ

ನಾಗರಾಜ್ ಹರಪನಹಳ್ಳಿ ೧ ಧ್ಯಾನ ಧ್ಯಾನಿಸುವುದು ಎಂದರೆಅದು ನಿನ್ನೆದುರು ಕುಳಿತಂತೆ ಮುಗಿಲ ಕಡೆ ದಿಟ್ಟಿ ನೆಡುವುದೆಂದರೆಅದು ನಿನ್ನೆದೆಯ...

ಹಳೆಯ ಮೌನ…

ಹಳೆಯ ಮೌನ…

ಸೌಜನ್ಯ ನಾಯಕ ಅಮ್ಮ, ಉಪ್ಪಿಟ್ಟು ಬೇಕುಎಂದು ಆಕೆ ಕೇಳಿದಾಗಲೆಲ್ಲನಿನ್ನದೆ ನೆನಪಾದರೂಉಣ ಬಡಿಸುತ್ತೇನೆ ಖುಷಿಯಿಂದಲೇಅವಳು ಇಷ್ಟಪಟ್ಟಿದೆಲ್ಲವನ್ನು...

0 ಪ್ರತಿಕ್ರಿಯೆಗಳು

ಪ್ರತಿಕ್ರಿಯೆ ಒಂದನ್ನು ಸೇರಿಸಿ

Your email address will not be published. Required fields are marked *

ಅವಧಿ‌ ಮ್ಯಾಗ್‌ಗೆ ಡಿಜಿಟಲ್ ಚಂದಾದಾರರಾಗಿ‍

ನಮ್ಮ ಮೇಲಿಂಗ್‌ ಲಿಸ್ಟ್‌ಗೆ ಚಂದಾದಾರರಾಗುವುದರಿಂದ ಅವಧಿಯ ಹೊಸ ಲೇಖನಗಳನ್ನು ಇಮೇಲ್‌ನಲ್ಲಿ ಪಡೆಯಬಹುದು. 

 

ಧನ್ಯವಾದಗಳು, ನೀವೀಗ ಅವಧಿಯ ಚಂದಾದಾರರಾಗಿದ್ದೀರಿ!

Pin It on Pinterest

Share This