ಕಿರುಹೊತ್ತಿಗೆಗಳು ಸದ್ದು ಮಾಡುತ್ತಿವೆ.. 

 

ಇದು ಕಿರು ಓದಿನ ಕಾಲವಾಗಿರುವಂತೆಯೇ ಕಿರು ಹೊತ್ತಿಗೆಗಳ ಕಾಲವೂ ಹೌದು.

ಪುಟಾಣಿ ಗಾತ್ರದ ಈ ಪುಸ್ತಕಗಳು ಓದುಗರನ್ನು ವಿಚಾರ, ಪುಟಗಳ ಸಂಖ್ಯೆ, ಬೆಲೆಯಲ್ಲಿ ಸೆಳೆಯುತ್ತಿವೆ.

ಕಿರುಹೊತ್ತಿಗೆಗಳ ಲೋಕದಲ್ಲಿ… 

ವಿದ್ಯಾರಶ್ಮಿ ಪೆಲತ್ತಡ್ಕ 

ಅದು ಭಾರತಿ ಬಿ.ವಿ. ಅವರ ‘ಕಿಚನ್‌ ಕವಿತೆಗಳು’ ಕೃತಿ. ನೋಡಿದಾಕ್ಷಣ, ಕೈಗೆತ್ತಿಕೊಂಡಾಕ್ಷಣ ಎಲ್ಲರಿಗೂ ಇಷ್ಟವಾಯಿತು. ಐವತ್ತೇ ಪುಟಗಳು. ಮೂವತ್ತೇ ರುಪಾಯಿ. ಬೇಗನೆ ಓದಿ ಮುಗಿದೂ ಬಿಡುತ್ತದೆ. ಒಳಗಿನ ಸರಕೂ ಅಂಥದ್ದೇ, ಬಾಯಿಗೆ ಹಾಕಿ ಚೀಪಿ ಮುಗಿದ ಬಹುಹೊತ್ತಿನ ಬಳಿಕವೂ ಅದೇ ಸವಿಯನ್ನು ಬಾಯಲ್ಲೇ ಉಳಿಸುವ ಮಿಠಾಯಿಯಂತೆ. ಇದೊಂದೇ ಅಂತಲ್ಲ. ಈಚೆಗೆ ಬಂದಿರುವ ಲಕ್ಷ್ಮೇಶ ತೋಳ್ಪಾಡಿಯವರ ಉಪನ್ಯಾಸಗಳ ಕಿರುಸಂಗ್ರಹ ‘ಮಹಾಯುದ್ಧಕ್ಕೆ ಮುನ್ನ’, ನವಕರ್ನಾಟಕ ಈಚಿನ ವರ್ಷಗಳಲ್ಲಿ ಹೊರ ತರುತ್ತಿರುವ ವಿವಿಧ ಕ್ಷೇತ್ರಗಳ ಸಾಧಕರ ಕುರಿತ ಕೃತಿಸಾಲುಗಳು… ಇವೆಲ್ಲವೂ ಗಾತ್ರದಲ್ಲಿ ಪುಟಾಣಿ ಪುಸ್ತಕಗಳು. ವಿಚಾರಗಳಲ್ಲಿ ಮಾತ್ರ ಹಿರಿದಾದವು.

ಎಲ್ಲರೂ ಬಿಝಿ, ಕುಳಿತು ಓದುವುದಕ್ಕೆ ಸಮಯವಾಗುತ್ತಿಲ್ಲ ಎಂಬ ಕಾಲದಲ್ಲಿ ಪುಸ್ತಕೋದ್ಯಮವೇ ಓದುಗರ ಅನುಕೂಲಕ್ಕೆ ಬದಲಾಗುತ್ತಿದೆಯೇನೋ ಎಂಬಂತೆ ಈಚೆಗೆ ಕನ್ನಡ ಸಾಹಿತ್ಯ ಲೋಕದಲ್ಲಿ ಇಂತಹ ಬುಕ್‌ಲೆಟ್‌ಗಳ ಸಂಖ್ಯೆ ಹೆಚ್ಚಿವೆ. ವಿಶೇಷವೆಂದರೆ ಓದುಗರಿಗೆ ಆಪ್ತವೂ ಆಗುತ್ತಿವೆ ಕೂಡ. ಪುಸ್ತಕ ಓದುವುದೆಂದರೆ ಇಷ್ಟ, ಆದರೆ ದೊಡ್ಡ ದೊಡ್ಡ ಕೃತಿಗಳನ್ನು ಓದುವುದಕ್ಕೆ ವೇಳೆಯಿಲ್ಲ ಅನ್ನುವವರಿಗೆಲ್ಲ ಈ ಪುಟಾಣಿ ಕೃತಿಗಳು ಕಡಿಮೆ ಅವಧಿಯಲ್ಲೇ ಓದಿದ ತೃಪ್ತಿಯನ್ನು ಒದಗಿಸಿಕೊಡುತ್ತವೆ. ಬೆಲೆಯಲ್ಲೂ ದುಬಾರಿಯಲ್ಲದ ಕಾರಣ ಓದಿಗಾಗಿ ದೊಡ್ಡ ಬಜೆಟ್‌ ಮೀಸಲಿಡುವ ಅಗತ್ಯವೂ ಇಲ್ಲದ ಓದುಗಸ್ನೇಹಿ ಹೊತ್ತಿಗೆಗಳಿವು.

ಅಂದಿನ ಪರಿಕಲ್ಪನೆ 

ಹಾಗೆ ನೋಡಿದರೆ, ಈ ಬುಕ್‌ಲೆಟ್‌ ಪರಿಕಲ್ಪನೆ ಇಂದಿನದೇನಲ್ಲ. ಐವತ್ತರ ದಶಕದಲ್ಲೇ ಸಮಾಜೋನ್ನತಿ ಪುಸ್ತಕಮಾಲೆಯಿಂದ ‘ಒಂದಾಣೆ ಮಾಲೆ’ ಹೆಸರಿನಲ್ಲಿ ಹಲವಾರು ಪುಸ್ತಕಗಳು ಪ್ರಕಟವಾಗುತ್ತಿದ್ದವು. ಸ್ಥಳಚರಿತ್ರೆ, ಯಕ್ಷಗಾನ ಪ್ರಸಂಗಗಳು, ಕಥೆ, ಲೇಖನ ಇತ್ಯಾದಿಗಳನ್ನೆಲ್ಲ ಹೊಂದಿರುತ್ತಿದ್ದ ಈ ಕಿರುಹೊತ್ತಿಗೆಗಳ ಬೆಲೆ ಕೇವಲ ಒಂದಾಣೆ! ಬಳಿಕ ಮೈಸೂರು ವಿಶ್ವವಿದ್ಯಾಲಯವು ‘ಪ್ರಚಾರ ಪುಸ್ತಕ ಮಾಲೆ’ ಹೆಸರಿನಡಿಯಲ್ಲಿ ನಾಲ್ಕಾಣೆಗೆ ಹಲವು ಪುಸ್ತಕಗಳನ್ನು ಹೊರತರುತ್ತಿತ್ತು. ಈ ಕೃತಿಗಳ ಪ್ರಕಟಣೆಯ ಉದ್ದೇಶದಿಂದ ವಿದ್ವಾಂಸರಿಂದ ಉಪನ್ಯಾಸಗಳನ್ನು ಏರ್ಪಡಿಸಿ ಅವುಗಳನ್ನೇ ಪ್ರಕಟಿಸಲಾಗುತ್ತಿತ್ತು. ‘ಪಂಪನ ಬಗ್ಗೆ ತೀನಂಶ್ರೀಕಂಠಯ್ಯನವರು, ಹರಿಹರನ ಬಗ್ಗೆ ಡಿಎಲ್‌ಎನ್‌ ಅವರಂತಹ ದೊಡ್ಡ ವಿದ್ವಾಂಸರೆಲ್ಲ ಈ ಕೃತಿಗಳನ್ನು ಬರೆದಿದ್ದರು. ಬರಿಯ ಸಾಹಿತ್ಯವಷ್ಟೇ ಅಲ್ಲ, ಆರೋಗ್ಯ, ಆಹಾರ ಇತ್ಯಾದಿ ಎಲ್ಲ ವಿಚಾರಗಳ ಬಗೆಗೂ ಈ ಮಾಲಿಕೆಯಲ್ಲಿ ಪುಸ್ತಕಗಳು ಬಂದವು. ವಿದ್ಯೆ ಬರಿಯ ವಿವಿ ಆವರಣಕ್ಕಷ್ಟೇ ಸೀಮಿತವಾಗಬಾರದು, ಅದರ ಹೊರಗಿನ ಜನರನ್ನೂ ತಲುಪಬೇಕು ಎಂಬ ಉದ್ದೇಶದಿಂದ ಈ ಮಾಲಿಕೆಯನ್ನು ಪ್ರಾರಂಭಿಸಲಾಯಿತು’ ಎನ್ನುತ್ತಾರೆ ವಿಮರ್ಶಕ ನರಹಳ್ಳಿ ಬಾಲಸುಬ್ರಹ್ಮಣ್ಯ.

ಇದಲ್ಲದೆ, ಧಾರವಾಡದ ಕರ್ನಾಟಕ ವಿವಿಯೂ 60-70ರ ದಶಕದಲ್ಲಿ 25 ಪೈಸೆಗೆ(ನಾಲ್ಕಾಣೆ) ಹಲವು ಕಿರುಹೊತ್ತಿಗೆಗಳನ್ನು ತಂದಿತು. ಅಂಗೈಯಷ್ಟೂ ಇಲ್ಲದ ಈ ಪುಟಾಣಿ ಕೃತಿಗಳನ್ನು ಎತ್ತಿ ಓದಿಕೊಂಡವರು ಅದೆಷ್ಟೋ ಜನ. ಇದೇ ರೀತಿ ಹಲವು ವರ್ಷಗಳ ಅಂತರದಲ್ಲಿ ವಿವಿಧ ಕಿರುಹೊತ್ತಿಗೆಗಳು ಆಗಿಂದಾಗ್ಗೆ ಬಂದವು. ಮೈಸೂರಿನ ಡಿವಿಕೆ ಮೂರ್ತಿಯವರು ಎಪ್ಪತ್ತರ ದಶಕದಲ್ಲಿ ಭರತನ ನಾಟ್ಯಶಾಸ್ತ್ರ, ಭಗವದ್ಗೀತೆ ಇತ್ಯಾದಿ ವಿವಿಧ ವಿಚಾರಗಳನ್ನು ಪರಿಚಯಿಸುವ ಐವತ್ತು ಪುಟಗಳ ಆಸುಪಾಸಿನ ಪುಸ್ತಕಗಳನ್ನು ತಂದರು. 90ರ ದಶಕದಲ್ಲಿ ಇವು ಮರುಮುದ್ರಣಗೊಂಡವು. ರಾಷ್ಟ್ರೋತ್ಥಾನ ಪರಿಷತ್‌, ಕ್ರಿಯಾ ಪ್ರಕಾಶನ, ಸಂಚಯ ಇತ್ಯಾದಿ ಹಲವು ಪ್ರಕಾಶನಗಳು ವಿವಿಧ ಕಾಲಘಟ್ಟದಲ್ಲಿ ಕಿರುಹೊತ್ತಿಗೆಗಳನ್ನು ಹೊರತಂದಿದ್ದವು.

ನವ ಕರ್ನಾಟಕ ಪ್ರಕಾಶನವಂತೂ ಈಚಿನ ವರ್ಷಗಳಲ್ಲಿ ಸಾಲುಸಾಲಾಗಿ ಹಲವಾರು ಕಿರುಹೊತ್ತಿಗೆಗಳನ್ನು ತರುತ್ತಲೇ ಇದೆ. ಆಧುನಿಕ ಮನೋವಿಜ್ಞಾನದ ಪಿತಾಮಹ ಸಿಗ್ಮಂಡ್‌ ಫ್ರಾಯ್ಡ್‌, ಕಾರ್‌ ಸಾಮ್ರಾಜ್ಯದ ಸಾಮ್ರಾಟ ಹೆನ್ರಿ ಫೋರ್ಡ್‌, ನೊಬೆಲ್‌ ಸಂಸ್ಥಾಪಕ ಆಲ್ಫ್ರೆಡ್‌ ನೊಬೆಲ್‌ ಇತ್ಯಾದಿ ಹಲವು ವ್ಯಕ್ತಿ, ವಿಚಾರಗಳ ಬಗ್ಗೆ ಬಂದಿರುವ ಈ ಕೃತಿಗಳಿಗೂ ಬೆಲೆ. 25 ರೂ.

ಓದುಗಸ್ನೇಹಿ ಪುಸ್ತಕಗಳು 

ಅಂದಿನಿಂದ ತೊಡಗಿ ಇದೀಗ ಬರುತ್ತಿರುವ ಎಲ್ಲ ಬುಕ್‌ಲೆಟ್‌ಗಳ ಪ್ರಮುಖ ಗುಣವೆಂದರೆ ಅವುಗಳ ಓದುಗಸ್ನೇಹಿ ಗುಣ. ಸ್ವತಂತ್ರ ಬಸವಧರ್ಮ ಕುರಿತಂತೆ ಚಳವಳಿ ನಡೆದ ಸಮಯದಲ್ಲಿ ಬಸವಧರ್ಮ ಎಂದರೇನು ಎಂಬ ಪರಿಚಯಾತ್ಮಕ ಕಿರುಪುಸ್ತಕವನ್ನು ತಂದ ಬಹುರೂಪಿ ಇದೀಗ ಅದೇ ಜಾಡಿನಲ್ಲಿ ಹಲವು ಕೃತಿಗಳನ್ನು ತಂದಿದೆ. ಇವರ ಪ್ರಕಟಣೆಯ ಹಿಂದೆ 1979 ಮತ್ತು 1981ರ ‘ಸಮುದಾಯ’ದ ಕಿರುಹೊತ್ತಿಗೆಗಳು ಮಾಡಿದ ಪರಿಣಾಮವೇ ಪ್ರೇರಣೆಯಾಗಿ ನಿಂತಿದೆ. ‘ಆಗ ಸಮುದಾಯದ ಪ್ರಕಟಣೆಗಳು ಎಲ್ಲ ಹಳ್ಳಿಹಳ್ಳಿಗಳಲ್ಲಿ ಬಹಳ ಪರಿಣಾಮ ಬೀರಿದ್ದವು. ನಾನೂ ಆ ಚಳವಳಿಯಲ್ಲಿದ್ದು ಬೀದಿನಾಟಕಗಳಲ್ಲಿ ಪಾಲ್ಗೊಂಡು ಅಂತಹ ಕೃತಿಗಳನ್ನು ಗಮನಿಸಿದ್ದೆ. ಅದೇ ಮಾದರಿಯಲ್ಲಿ ಇದೀಗ ವಿಚಾರ, ಸೃಜನಶೀಲ ಸಾಹಿತ್ಯ ಎಲ್ಲವನ್ನೂ ಈ ಮಾದರಿಯಲ್ಲಿ ಮಾಡುತ್ತಿದ್ದೇವೆ’ ಎನ್ನುತ್ತಾರೆ ಬಹುರೂಪಿಯ ಜಿ.ಎನ್‌.ಮೋಹನ್‌. ಕರೆಂಟ್‌ ಅಫೇರ್ಸ್‌ ವಿಚಾರಗಳ ಜತೆಗೇ ಕವಿ, ಕಥೆಗಾರರನೇಕರ ಆರಂಭಿಕ ಕೃತಿಗಳೂ ಇದೇ ಗಾತ್ರದಲ್ಲಿ ಬರಲಿವೆ. ಅವು ಆ ಬರಹಗಾರರ ಮುಂದಿನ ಪ್ರಕಟಣೆಗಳಿಗೆ ಚಿಮ್ಮು ಹಲಗೆಯಾಗಬಹುದು ಎಂಬ ಆಶಯ ನಮ್ಮದು ಎನ್ನುತ್ತಾರೆ ಜಿ.ಎನ್‌.ಮೋಹನ್‌.

ಅಡಿಗರ ಶತಮಾನೋತ್ಸವದ ಹಿನ್ನೆಲೆಯಲ್ಲಿ ವರ್ಷದ ಹಿಂದಷ್ಟೇ ‘ಗೆರೆ ಮಿರಿವ ಚಿನ್ನದದಿರು’ ಕೃತಿ ಹಾಗೂ ತೋಳ್ಪಾಡಿಯವರ ಉಪನ್ಯಾಸಗಳ ಸಂಗ್ರಹಿತ ಕೃತಿಗಳನ್ನು ತಂದಿರುವ ಅಭಿನವದ ಪ್ರಕಾಶನ ಕನ್ನಡದ ಪ್ರಕಾಶನ ಸಂಸ್ಥೆಗಳ ಬಗೆಗೇ ಕಿರುಹೊತ್ತಿಗೆಗಳನ್ನು ತಂದು ಉಚಿತವಾಗಿ ನೀಡಿತ್ತು. ‘ದೆಹಲಿಯ ಕಿಂಗ್‌ ಪಾಕೆಟ್‌ ಸಂಸ್ಥೆ ಇಂಗ್ಲಿಷ್‌ನಲ್ಲಿ ಈ ಬಗೆಯ ಪುಸ್ತಕಗಳನ್ನು ತಂದು ‘ಪಾಕೆಟ್‌ ಬುಕ್ಸ್‌’ ಎಂದು ಕಿರಾಣಿ ಅಂಗಡಿಗಳಲ್ಲೂ ಇರಿಸಿ ಮಾರಾಟ ಮಾಡಿ ದೊಡ್ಡ ಕ್ರಾಂತಿ ಮಾಡಿತು. ಕನ್ನಡದಲ್ಲಿ ಈ ಪ್ರಕಾರವನ್ನು ಸಮರ್ಥವಾಗಿ ದುಡಿಸಿಕೊಳ್ಳಬೇಕಿದೆ’ ಎನ್ನುತ್ತಾರೆ ಅಭಿನವದ ನ.ರವಿಕುಮಾರ.

ನಾನ್‌ಫಿಕ್ಷನ್‌ ಓದು ಹೆಚ್ಚುತ್ತಿರುವ ಈ ದಿನಗಳಲ್ಲಿ ಈ ಗಾತ್ರದ ಪುಸ್ತಕಗಳು ಓದುಗರಿಗೂ ಪ್ರಿಯವಾಗಿವೆ. ಬೆಲೆ, ಪುಸ್ತಕದ ಗಾತ್ರ ನೋಡಿ ದೂರ ಹೋಗುತ್ತಿದ್ದ ಅನೇಕ ಹೊಸ ಓದುಗರೂ ಮತ್ತೆ ಪುಸ್ತಕಗಳ ಬಳಿ ಬರುವಂತಾಗಿದೆ. ‘ಬಹುಹೊತ್ತು ಕೂತು ಓದಲಾಗದ ನಮಗೆ ಇಂತಹ ಬುಕ್‌ಲೆಟ್‌ಗಳು ಬಹಳ ಇಷ್ಟವಾಗುತ್ತವೆ, ಪುಸ್ತಕ ಓದಿದೆ ಎನ್ನುವ ಸಮಾಧಾನವನ್ನೂ ನೀಡುತ್ತವೆ. ಸ್ವಲ್ಪ ದೂರದ ಪ್ರಯಾಣದ ಸಮಯದಲ್ಲೂ ಓದಿ ಮುಗಿಸಬಹುದಾದ ಪುಸ್ತಕಗಳಿವು’ ಎನ್ನುತ್ತಾರೆ ಬ್ಯಾಂಕ್‌ ಉದ್ಯೋಗಿ ಪ್ರಿಯಾ.

ವರ್ಣಮಯ ಪ್ರಕಟಣೆಗಳಂತೆ ಓದುಗರ ಬೇಡಿಕೆಯನ್ನೂ ಹೊಂದಿರುವ ಈ ಕಿರುಹೊತ್ತಿಗೆಗಳು ಕನ್ನಡ ಓದುಗ ಬಳಗವನ್ನು ಇನ್ನಷ್ಟು ವಿಸ್ತರಿಸಲಿ.

ಕನ್ನಡದಲ್ಲಿ ಬರುತ್ತಿರುವ ಅನೇಕ ಪುಸ್ತಕಗಳು ಓದುಗಸ್ನೇಹಿಯಾಗಿಲ್ಲ. ಪುಟಗಳ ಸಂಖ್ಯೆ, ಗುಣಮಟ್ಟ, ಬೆಲೆಯಲ್ಲಿ ಅವರಿಗೆ ಸೂಕ್ತವಾಗುವಂತೆ ತಂದರೆ ಕನ್ನಡದಲ್ಲಿ ಓದುಗರು ಖಂಡಿತ ಇದ್ದಾರೆ ಎಂಬುದನ್ನು ಈ ಕಿರುಹೊತ್ತಿಗೆಗಳು ಸೂಚಿಸಿವೆ.

-ಜಿ.ಎನ್‌.ಮೋಹನ್‌, ಲೇಖಕ, ಪ್ರಕಾಶಕರು

ಕುವೆಂಪು ಅವರ ಕಾಲದಲ್ಲಿ ಮೈಸೂರು ವಿವಿಯಿಂದ ಹೊರಬಂದಿದ್ದ ಕಿರುಹೊತ್ತಿಗೆಗಳು ಇಂದಿನ ಅಗತ್ಯವೂ ಹೌದು. ಅವುಗಳು ಓದುಗರ ಸಂಖ್ಯೆಯನ್ನು ಇನ್ನಷ್ಟು ಹೆಚ್ಚಿಸುವಂತಾಗಬೇಕು.

-ನರಹಳ್ಳಿ ಬಾಲಸುಬ್ರಹ್ಮಣ್ಯ, ವಿಮರ್ಶಕರು 

‘ಬಹುರೂಪಿ’ಯ ಕಿರು ಹೊತ್ತಿಗೆಗಳನ್ನು ಕೊಳ್ಳಲು-

ನಮ್ಮ ಆನ್ ಲೈನ್ ಸ್ಟೋರ್ 

bahuroopi.in ಗೆ ಭೇಟಿ ಕೊಡಿ 

ಅಥವಾ 

1 comment

  1. ವಿದ್ಯಾ ..ನಿಮ್ಮಂತೆಯೇ ಚಂದದ ..ಲೇಖನ
    ಒಳ್ಳೆಯ ವಿಶ್ಲೇಷಣೆ

Leave a Reply